De Vorsterman Bijbel

§ Dat .xxx. Capittel.

1

⁺DAt woort dwelck vanden HERE gheschiet is tot Ieremiam den prophete, seggende.

+ A

2

Dit seyt die HERE God van Israel. Scrijft ghi alle dese woorden, die ic tot v ghesproken hebbe in eenen boeck,

3

Want siet, die dagen comen seyt die HERE, dat ick sal ^* bekeeren die bekeeringe) mijns volcs van Israel ende van Iuda, seyt die HERE, ende ic salse brengen totten lande waert, dat ic haeren vaderen gaf, ende si sullent besitten.

* h. omwenden de geuangenis.

4

Ende dit zijn die woorden die die HERE ghesproken heeft tot Israhel ende tot Iuda.

5

Want dit seyt die HERE, wi hebben gehoort tgeluyt des anxts ende der vreesen, ende daer en is ghenen vrede.

6

⁺Vraghet ende siet, ofte een man kinderen baert, Waerom heb ic dan elcs mans hant op zijn lendenen ghesien, ghelijck eens wijfs handen die in arbeyt leyt? Ende alle die aensichten verkeert zijn in bleecheyt?

+ B

7

Wee, want dien dach is groot, ende gheenen dach en is dien ghelijck, ende het is dye tijt van Iacobs verdriet, ende hy sal noch van dyen behouden worden,

8

Ende het sal zijn in dien daghe seyt die HEERE der heyrscharen, dat sal ic zijn iock in stucken wriuen van uwen halse ende ic sal sine banden in tween breken. Ende voortmeer en sullen die vreemde gheen heerschappie ouer hen hebben,

9

maer si sullen den HEERE haeren God dienen, ende Dauid haeren Coninck dien ick hen verwecken sal.

10

Hierom en ontsiet v niet o Iacob mijn knechte, seyt die HERE, noch en vreest ghi niet Israel, Want siet, ick sal v verlossen van verren lande, ende v zaet vanden lande haerder gheuangenissen, Ende Iacob sal wederkeeren ende rusten, ende oueruloeyen van allen goeden niemant en sal zijnder dien hi ontsien sal.

11

Want ic ben met v, dat ic v helpen sal, seyt die HERE. Want ic salt een eynde maken met alle den heydenen, daer ic v inne gestroeyt hebbe, maer v en sal ic niet maken in voleyndinge, maer ic sal v castien na trecht, ^* om dat v nyet duncken en sal, dat ghy sonder misdaet zijt).

* th. daermede dat ick v noch niet leege wech en late.

12

Want dit seyt die HERE, v quetsure is ongheneselijck, v wonde is seer quaet,

13

⁺Niemant en is die vonnissen mach v oordeel, v quetsure toe te binden, v en is geen bate van genesingen.

+ C

14

Al v liefhebbers hebben v vergeten, si en sullen v niet soecken, Want ick heb

[p. N6v]

v gheslaghen ^* met eens viants wonde) met fellen castien, Om die menichte uwer boosheyt so zijn v sonden ^* hart) gheworden.

* th. gelijc een viant.

* th. menichfuldich

15

Wat roept ghi om uwe in twee wriuinghe. Vwe smerte is ongheneselijck. Om die menichte uwer boosheit, ende uwe harde sonden, soo hebbe ic v dese dingen ghedaen.

16

Hierom al die ghene die v eten, sullen verslonden worden Ende alle uwe vianden sullen in die geuangenisse gheleyt worden. Ende alle die v verwoesten, sullen verwoest worden. Ende ic sal alle v roouers geuen tot rooue,

17

Want ic sal uwe litteeken ouerdecken, ende ic sal v genesen van uwen wonden, seit die HERE. Want si heeten v verworpen Syon, dit is si, daer niemant na en sochte.

18

Dit seyt die HERE, Siet ic sal ^* bekeeren die bekeeringe van Iacobs wooningen, ende ic sal ontfermen sinen daken). Ende die stadt sal gesticht worden in haer boosheit, Ende den tempel sal worden gefundeert na zijn ordinancie,

* the. Iacobs geuangen tenten weder omkeeren ende zijnder wooningen ontfermen.

19

⁺Ende lof sal wt hen beyden comen, ende der ghenen stemmen die spelen sullen. Ende ic salse vermenichfuldighen, ende si en sullen niet ghemindert worden, ende ic salse verheffen, ende si en sullen niet vermagert worden,

+ D

20

haer kinderen sullen wesen alsoo si vanden beghinne waren. Ende haer vergaderinghe sal voor mi geduerich bliuen. Ende ic salt versoecken tegen al die gheene die hen quellen.

21

Ende haer hertoech sal wt hen luyden zijn, ende sine princen sullen voort comen wten midden van hen, Ende ick sal hem trecken, dat hy sal tot mi comen.

Want wie is dese die zijn herte toe voegen sal, dat hi mi ghenaken sal, seit die HERE?

22

Ende ghi sult mi zijn tot een volc, Ende ick sal v wesen tot een God.

23

Siet des HEREN gedruysch is gramschap wt comende, een vallende storm, Si sal rusten op der ongoddeliker hooft.

24

Die HERE en sal niet afkeeren de gramscap der toornicheyt voor dat hi doen sal ende voldoen dat ghedachte zijnre herten, Inden wtersten vanden dagen suldi die dinghen verstaen.

§ Hoe Israel weder gesticht sal worden, Ende hoe Rachel vertroost wert van haerder kinderen doot, Ende hoe Godt Ephraim ende Israel totten gelooue riep.