De Vorsterman Bijbel

§ Dat .xxix. Capittel.

1

⁺DIt zijn die woorden des ^* boecs) die Ieremias die propheet sandt van Ierusalem totten ouerbleuenen ouders der ^* oueruoeringhen) ende totten priesters ende propheten, ende tot al den volcke dat Nabuchodonosor ouergeuoert hadde van Ierusalem in Babylonien,

+ A

* th. briefs

* th. geuanckenis.

2

na dien dat Iechonias die Coninc wt ginc, ende die vrouwe, ende die ^* gelubde knapen) ende dye princen van Iuda ende van Ierusalem, ende die ^* smit ende de besluyter) van Iherusalem,

* th. kamerlinghen

* the. werckmeester ende poortwachter

3

door dye hant van Elasa Saphans sone, ende ^* Gamalie) Helchias sone, die Sedechias die coninc van Iuda sandt tot Nabuchodonosor den coninc van Babylonien, in Babilonien, seggende.

* th. Gamarie

4

⁺Dit seydt dye HEERE der heyrscharen God van Israel, tot al die ^* oueruoeringe) die ic ouer gesonden heb van Ierusalem in Babylonien,

+ B

* th. geuanckenis

5

Timmert huysen ende woon-[kolom]ter in, ende plant houen, ende etet die vruchten daer af,

6

Neemt wiuen, ende wint sonen, ende dochteren, Ende geeft uwen sonen wiuen, ende geuet uwen dochteren mannen, ende laetse baren sonen ende dochteren, Ende wort daer vermenichfuldicht, ende en wilt niet weynich wesen van getale,

7

Ende soect den vrede der stadt daer ic v toe heb doen oueruaren, ende bidt daer voor tot den HERE, want in dier stadt vrede, sal v vrede wesen.

8

Want aldus seyt die HERE der heyrscharen God van Israhel, En laet v propheten v niet verleyden die int midden van v luyden zijn, ende uwe waersegghers ende en merct op uwen droom niet dien ghi droomt,

9

want si propheteren v valschlijck in minen naem, ende ic en santse niet, seyt die HERE,

10

Want dit seyt die HERE, Als beghinnen voleynt te worden in Babylonien tseuentich iaeren, so sal ic v versoecken, ende ic sal op v verwecken mijn goede woort, ende ick sal v wederom leyden tot deser plaetsen.

11

Want ic weet die gedachten die ic op v dencke, ⁺ seyt die HERE, ghedachten van vrede, ende niet van druck, dat ick v geuen sal dat eynde ende ^* lijdtsaemheyt,)

+ C

* th. dat ghy verwacht

12

ende ghi sult my aenroepen, ende ghi sult ^* leuen) ende aenbidden mi ende ic sal v verhooren,

* th. gaen

13

Ghi sult mi soecken, ende ghi sult mi vinden, Als ghi my soecken sult in al v herte,

14

so sal ic van v geuonden worden, seyt die HERE, Ende ic sal v geuangenisse wederom leyden, ende ic sal v vergaderen van allen heydenen, ende van allen steden daer ic v toe verdreuen hebbe, seyt die HERE, Ende ic sal v doen wederkeeren vander stadt daer ic v toe heb ouer doen varen:

15

want ghi hebt geseyt, Die HERE heeft ons verwect propheten in Babylonien.

16

⁺Want dit seyt die HERE totten coninck, die sittet op Dauids throon, ende tot al den volcke dat in deser stadt woont, tot uwen broeders die met v nyet en zijn wtgegaen in die ^* oueruoeringhe,)

+ D

* th. geuanckenis

17

Dyt seyt die HERE der heyrscharen, Siet, ick sal in hen seynden dat sweert, den hongher, ende dye pestilencie, ende ick salse stellen ghelijck quade vighen, dyemen nyet eten en mach, om dat si veel te quaet zijn,

18

Ende ic salse veruolgen metten swaerde, ende met hongher, ende met pestilencie, Ende ick salse gheuen in quellinghen allen rijcken der werelt, In vermaledijnghen, ende in verwonderen, ende in gheblaes, ende in lachter allen heydenen, ende daer ickse toe verworpen hebbe,

19

Om dat si mijn woorden nyet ghehoort en hebben, (seyt die HEERE) die ic tot hen ghesonden

[p. N6r]

heb door mine knechten die propheeten, des ^* nachts opstaende ende) seyndende, ende ghi en hebbes niet ghehoort, seyt die HERE.

* th. morgens vroech ende naerstich

20

⁺Hierom hoort ghi des HEEREN woort alle die ^* oueruaert) die ic wt Ierusalem gesonden hebbe in Babilonien,

+ E

* th. geuangenen.

21

Dit seyt die HERE der heyrscaren God van Israel, tot Achab ^* Chulie) sone, ende tot Sedechiam Maasias sone, die v lueghentalen propheteren onder minen naem. Siet, ic salse leueren in Nabuchodonosors des conincks van Babilonien hant, ende hi salse verslaen voor uwen ooghen

* th. Koloia.

22

^* Ende men sal van hen aennemen een veruloeckinge alder oueruaert van Iuda die in Babilonien is, vanden ghenen die seggen sullen). Die HERE moet v setten, als Sedechiam ende Achab, die de coninc van Babilonien roostede int vier,

* th. Ende van hen sal die geheele geuangenis van Iuda die te babilonien is eenen vloeck aennemen datmen seggen sal

23

om dat si sotheit deden in Israel Ende ouerspel deden met haerder vrienden wiuen, ende om dat si spraken dat woort luegenachtelijc in minen naem, ⁺ dat ic hen niet en beual. Ic ben dies rechters ende die getuyge, seyt die HERE.

+ F

24

Ende ghi sult seggen tot Semeiam den Neelamijt.

25

Dit seyt die HERE de heyrscaren God van Israel. Om dat ghi in minen name ^* boecken) gesonden hebt tot al den volcke dat in Ierusalem is, ende tot Sophoniam, Maasias sone den priester, ende tot al den priesteren, seggende.

* th. brieuen.

26

Die HERE heeft v gegeuen tot eenen priester voor Ioiada den priester, dat ghi een leytsman soudt zijn in des HEREN huys, ouer elcken rasenden man, ende propheterende, dat ghi hem leggen sult in eenen stock ende inden kercker.

27

Ende nv waerom en straft ghi niet Ieremiam van Anathot die v propheteert?

28

Want noch heeft hi tot ons gesonden in Babilonien seggende. ⁺ Tsal noch lanc wesen, Maect huysen ende woont daer in, ende plant boomgaerden ende eet die vruchten daer af.

+ G

29

Sophonias die priester las daerom desen ^* boec) in Ieremias des propheten ooren.

* th. brief.

30

Ende des HEEREN woort gesciede tot Ieremiam, seggende.

31

Seynt tot ^* alder oueruaert) seggende. Dit seyt die HERE tot Semeiam den Neelamijt, Om dat v Semeias gepropheteert heeft, ende ic hem niet gesonden en hebbe, ende heeft v doen betrouwen in lueghenen,

* th. die gehele geuangenisse.

32

hieromme seyt dit die HERE also.

Siet, ic salt versoecken op Semeiam den Neelamijt, ende op zijn zaet. Hi en sal ghenen man hebben, sittende int midden van desen volcke, ende hi en sal dat goet niet sien, dat ic in minen volcke doen sal, seit die HERE, want hi heeft ouertredinge ghesproken teghen den HERE.

[kolom]

§ Van die toecomende droeffenisse, Ende hoe Iuda gheuangen moeste worden, Van die blijscap der verlossinghen, Ende vander wraken tegen die vianden des volcs Gods.