De Vorsterman Bijbel

§ Dat .xxviij. Capittel.

1

⁺ENde het geschiede in dien iare int beginsel des rijcs van Sedechias des conincs van Iuda, int vierde iaer, in die vijfste maent, ende Ananias Azurs sone een Propheet van Gabaon seyde tot mi, in des HEREN huys voor die priesteren, ende voor al dat volck, segghende,

+ A

2

Dit seyt die HEERE der heyrscharen, God van Israhel, Ick heb in twee ghewreuen des conincs van Babilonien iock,

3

Noch ouer twee iaren der daghen, so sal ic weder doen brenghen tot deser stadt alle des HEREN vaten, dye Nabuchodonosor dye coninc van Babilonien wech geuoert heeft van deser stadt, ende die hi ouergeuoert heuet in Babilonien,

4

Ende Iechoniam Ioachims sone den coninc van Iuda, ende die ^* oueruoeringe) van Iuda, die in Babilonien ghecomen is, die sal ic weder brengen tot deser stadt, seyt dye HERE, Want ic sal instucken wriuen des conincs van Babylonien iock.

* th. gheuanghene

5

⁺Ende Ieremias die propheet seyde tot Ananiam den propheet inder priesters ooghen, ende in alle des volcs ooghen, dat in des HEREN huis stont,

+ B

6

ende Ieremias die propheet seyde, Amen, Die HERE diemoet also doen Die HERE moet verwecken dye woorden, die ghi ghepropheteert hebt, dat dye vaten weder ghebracht worden in des HEREN huys, ende alle die oueruoeringhe van Babylonien tot deser stadt,

7

Maer nochtans hoort dit woort, dat ic in dinen ooren spreke, ende in al des volcs ooren,

8

Die propheten die voor v ende voor mi geweest hebben vanden beginne, ende die propheteerden op vele landen, ende op vele rijcken van strijde ende van verdriet ende van honger,

9

die propheet die gepropheteert heeft den vrede, als zijn woort coemt, so salmen weten, dat hi een propheet is, dien dye HERE ghesonden heeft inder waerheyt.

10

⁺Ende Ananias dye Propheet nam dye

+ C

[p. N5v]

ketenen van Ieremias des propheten halse, ende hi bracse intwee,

11

Ende Ananias die Propheet seyde in alle des volcs aensien, ende sprac, Dit seyt die HEERE, Aldus sal ic in twee breken Nabuchodonosors des conincs van Babilonien iock van alre heydenen halsen, na twee iaeren van desen dage,

12

Ende Ieremias die propheet ghinc henen in sinen wech.

⁺ Ende des HEEREN woort gesciede tot Ieremiam den propheet, na dat Ananias die propheet ghebroken hadde dye ketenen van des Propheten Ieremias hals, segghende,

+ D

13

Ghaet, ende ghi sult tot Ananiam segghen, Dit seyt die HEERE, Ghi hebt die houten ketenen ghebroken, ende daer voor sult ghi yseren ketenen maken,

14

Want dyt seydt dye HERE der heyrscharen God van Israhel, Ick hebbe een yseren iock gheleydt op den hals van al desen heydenen, dat si Nabuchodonosor den coninc van Babylonien dienen souden, ende si sullen hem dienen, ende hierenbouen hebbe ic hem gegheuen die beesten vanden lande.

15

Ende Ieremias die propheet seyde tot Ananiam den propheet, Hoort Anania, die HERE en heeft v niet gesonden, ende ghy hebt dyt volck doen betrouwen in lueghenen,

16

Hierom seyt die HERE, Siet, ic sal v wech seynden vanden aensichte des landts, Binnen desen iare sult ghi steruen. Want ghi hebt teghen den HERE ghesproken,

17

Ende Ananias die prophete sterf binnen dien iare, in die seuenste maent.

§ Die propheet bescrijft die oueruoeringe datment hem geloouen soude, ende scrijft tot die geuangenen in Babylonien, dat si int seuentichste iaer souden besocht worden van Gode