De Vorsterman Bijbel

§ Dat .xxvij. Capittel.

1

⁺INden beginne van Ioachims rijck Iosias sone des conincs van Iuda, gesciede vanden HERE dit woort tot Ieremiam ende seyde.

+ A

2

Dit seyt die HERE tot mi.

Maect v banden ende ketenen, ende ghi sultse legghen op uwen hals,

3

ende ghi sult seynden totten Coninc van Edom, ende totten coninck van Moab, ende totten coninc van Ammons kinderen, ende totten coninc van Tyrus, ende totten coninc van Sidonien door der boden hant, die gecomen zijn in Ierusalem tot Sedechiam den Coninc van Iuda,

4

ende ghi sult hen beuelen, dat si tot haeren HERE segghen.

⁺ Dit seyt die HERE der heyrscaren God van Israel. Dit suldi tot uwen heeren seggen

+ B

5

Ic maecte die aerde ende den mensch, ende de beesten die op dat aensicht der aerden zijn, met mine groote stercheit ende minen wtgesteken arm, ende ic hebse dien gegeuen die mi genoechde in minen ooghen.

6

Ende nv hierom heb ic alle dese landen gegeuen in Nabuchodonosors des conincs van Babilonien mijns knechts hant. Hierenbouen heb ic hem ooc gegeuen die dieren des veldts, dat si hen dienen sullen,

7

ende alle vorsten sullen hem dienen, ende sinen sone, ende zijns soons sonen, tot die tijt van sinen lande comen sal.

Ende hem sullen dienen vele volcken, ende grote coningen

8

Ende dat volc, ende dat rijc dat Nabuchodonosor den coninc van Babilonien niet dienen en sal, ende so

[p. N5r]

wie sinen hals nyet neder en buycht onder des conincs van Babylonien iock, dat volc sal ic metten swaerde, ende metten honger, ende pestilencie besoecken (seyt die HEERE) tot dat icse verdriuen sal in zijn hant,

9

Hierom en wilt niet hooren uwen propheten, ende die waerseggers ende die droomers, ende die waerseggers vander vogelen sanc, ende die toeueraers die tot v seggen, ghi en sult niet dienen den Coninc van Babilonien,

10

want die propheteren v luegenen, om dat si v verre doen souden van uwen lande, ende dat ^* si v souden) verdriuen, ⁺ ende dat ghi verghaen sout.

* th. ic v soude

+ C

11

Maer dat volc dat sinen hals onder dat iock des conincs van Babilonien doet, ende hem dienen sal, die sal ic setten in haer lant, (seyt die HERE) ende si sullent bouwen, ende woonen daer in,

12

Ende ic sprac tot Sedechiam den coninc van Iuda, na alle dese woorden, ende seyde, Doet uwe halsen onder des conincks van Babilonien iock, ende dient hem ende sinen volcke ende sult leuende bliuen,

13

Waerom sult ghi steruen, ghi ende v volc metten swaerde, ende metten honger, ende metter pestilencie, also die HERE ghesproken heeft tot den volcke, dat den coninc van Babilonien niet dienen en wilde?

14

En wilt der propheten woorden nyet hooren, die v segghen, ghi en sult den coninc van Babilonien niet dienen, want si spreken v lueghenen,

15

Want ic en hebse v nyet gesonden, seyt die HERE, ende si propheteren luegenachtelic in minen naem, om dat ^* si v verdriuen souden) ende dat ghi vergaen sout beyde ghi ende die propheten, die v propheteren.

* th. ic v verdriuen soude

16

⁺Ende ic sprack totten priesteren, ende tot desen volcke, ende seyde, Dit seyt die HERE, En wilt nyet hooren uwer propheten woorden, die v propheteren, ende seggen, siet des HEREN vaten sullen weder keeren van Babilonien nv haestelijck, Want si propheteren v lueghenen,

+ D

17

Hierom en wilt daer niet nae hooren, maer dient den coninc van Babilonien, op dat ghi leuen moecht, Waeromme wort dese stadt gegeuen in verwoestinghe?

18

Ende oft si propheten zijn, ende is des HEREN woort in hen, laet hen gaen tegen den HERE der heyrscharen, op dat die vaten die gelaten waren in des HEEREN huys, ende in des conincs huys van Iuda, ende in Ierusalem, ⁺ niet en comen in Babilonien.

+ iiij.re. xv d.

19

Want dit seyt die HERE der heyrscharen totten columnen, ende totter zee, ende totten fundamenten, ende tot den anderen vaten, die gebleuen zijn in dese stadt,

20

die Nabuchodonosor die coninc van Babylonien niet wech [kolom] en voerde, doen hi Iechoniam Ioachims sone den coninc van Iuda oueruoerde wt Ierusalem in Babilonien, ende alle die edel luyden van Iuda ende Ierusalem,

21

Want dit seyt die HERE der heyrscharen God van Israhel tot die vaten, die ghelaten zijn in des HEEREN huys ende in des conincs huys van Iuda ende Ierusalem,

22

Si sullen worden ouer gheuoert in Babilonien, ende si sullen daer wesen totten daghen haerder versoeckinghe, seyt die HERE, Ende ic salse doen weder brengen, ende weder setten in dese stadt.

§ Hoe dye propheet Ananias seyt tot Ieremiam, dattet volck na twee iaren van Babilonien soude wederkeeren, ende alle die ghereetschap des tempels, Ende Ieremias antwoorde, Amen.