De Vorsterman Bijbel

§ Dat .xxxi. Capittel.

1

⁺IN dien tijden (seyt die HERE) so sal ick alle den gheslachten van Israel Godt zijn, Ende si sullen mi wesen tot eenen volck.

+ A

2

Dit seyt die HERE. Dat volc dat gebleuen was vanden swaerde inder wildernissen, vant ghenade, Israel sal gaen tot zijnre rusten.

3

Die HEERE openbaerde mi van verre, Ende [kolom] in eewigher liefden so heb ick v lief gehadt, hieromme hebbe ick ontfermende v tot my ghetrocken.

4

⁺Ende ic sal v weder stichten, ende ghi sult worden gesticht o maecht van Israel, Noch suldi verciert worden met uwen tamboeren, ende ghi sult wtgaen inden dansse der spelender

+ B

5

Ende noch sult ghy wijnghaerden planten inden berghen van Samarien, Die planters sullen planten, ende si en sullen die wijnbesien niet lesen, voor dat den tijt comen sal,

6

Want den dach sal wesen daer die wachters in roepen sullen op die berghen van Samarien, ende op Ephraims berch.

Staet op ende laet ons gaen in Sion, toten HERE onsen God

7

Want dit seyt die HERE, Verblijt van Iacobs blijschap, ende neyet teghen dat hooft der heydenen, roept, singt, ende segt. HERE behout v volc, dat ouerblijft van Israhel.

8

Siet, ic salse brengen vanden lande van noorden, ende ick salse vergaderen vanden eynden der aerden, Onder welcke zijn sullen die blinde ende die cruepel, ende vrouwen die kinderen draghen, ende die baren te gader een grote vergaderinge der ghenen die herwaerts wederkeeren sullen.

9

Met gheween sullen si comen, ende ic salse in ontfermherticheden wederom leyden. Ende ic salse brengen door doorloopende riuieren van wateren op eenen rechten wech, ende si en sullen hen daer op niet stooten, want ick ben Israels vader gheworden, ende Ephraim is mijn eerste geboren sone.

10

Ghi heydenen hoort des HEEREN woort, ende bootschappet inden eylanden verre, ende segt, Die Israel verstroyet heeft, die salse vergaderen, ende hi salse bewaren, also een herder zijn cudde bewaert.

11

⁺Want die HERE heeft Iacob verlost, ende hi heeft hem los ghemaect van des ghenen handt die machtigher was.

+ C

12

Ende si sullen comen, ende sullen lof gheuen opten berch van Sion, ende si sullen tsamen vergaderen tot des HEREN goeden, op die vruchten, ende wijn, ende olie, ende totter drachten vanden schapen ende runderen, ende haer siele sal zijn ghelijck een veruersschten hof, ende hen en sal voortmeer niet hongheren.

13

Dan sal dye maghet verblijden inden dansse, die ionghelinghen, ende die oude luyden al te samen.

Ende ic sal haer weeninghen verkeeren in blijscappen, ende ic salse vertroosten, ende verbliden van haeren rouwe.

14

Ende ic sal der priesteren sielen droncken maken met vetheyden, ende mijn volc sal veruult worden van

[p. N7r]

minen goede, seyt die HEERE,

15

Dit seyt die HERE, Een stemme des clagens, ende eens bitter weenens is int hooge gehoort, Rachel beweende haer sonen, ⁺ ende en wilde haer niet laten troosten ouer haer sonen, want si niet en zijn

+ Mat. ij.d.

16

Dit seyt die HERE, Laet v stemme rusten van geween, ende v oogen van tranen want tis nv ws wercs loon, seyt die HERE nv, Ende si sullen wederkeeren van des viants lant,

17

ende in uwen wtersten is hope, seyt die HERE, Ende uwe kinderen sullen wederkeeren tot haren palen,

18

Hoorende heb ic Ephraim hooren oueruaren

⁺ Ghi hebt mi gecastijt HERE, ende ic ben onderwesen, als een onghetemt calf, Bekeert mi, ende ick sal bekeert worden, want ghi zijt die HERE mijn Godt,

+ D

19

Want na dien dat ghi mi bekeert hebt, so heb ic berou gehadt, ende na dien dat ghi mi verthoonde, so heb ic op mijn dgie geslagen, Ic ben bescaemt gheworden, ende ic schaemde mi, want ic heb gheleden den lachter mijnre ioncheyt,

20

Is mi Ephraim een eerlijc sone, is hi een teeder kint? want van dier tijt dat ic van hem gesproken heb, so sal ic zijns noch gedencken. Hierom zijn mijn inghewanden verstoort ouer hem, ende ontfermende sal ic zijnder ontfermen, seyt die HEERE,

21

Maect v een hooge plaetse tot eenen waectorren, sedt di bitterheden, Beweecht v herte inden rechten wech, daer ghi ingewandelt hebt. O maget van Israel, keert weder, keert weder tot desen uwen steden,

22

Hoe lange suldi ^* ontbonden worden van weeldicheden, wilde dochter?) Want dye HERE heeft een nieu dinck geschapen opter aerden, Een vrouwe sal eenen man omuangen.

* th. afweynden, ghi verdwaelde dochter

23

Dit seyt die HERE der heyrscharen, die Godt van Israel, Noch sullen si dit woort seggen in dat lant van Iuda, ende in zijn steden, als ic die geuanckenisse bekeeren sal, Die HEERE moet v gebenedien, o ^* schoonheyt) der rechtuaerdicheyt, heylighe berch,

* theb. wooninge

24

⁺Ende daer sal Iuda woonen, ende alle zijn steden te gader, Acker luyden, ende die die cudden driuen,

+ E

25

want ic heb die vermoeyde sieleh droncken gemaect, ende alle hongerende sielen heb ic verzaet.

26

Hierom ben ic gewect als van eenen slape, ende ic sach, ende minen slaep was mi soete,

27

Siet, die daghen comen seyt dye HERE, ende ic sal dat huys van Israel, ende van Iuda bezayen met ^* menschen zade, ende met beesten zade)

* the. menscen ende met beesten.

28

Ende gelijc ic ouer haer waecte op dat icse wt plucken, omwroeten, scheyden ende verstroeyen soude, ende verdrucken, Also sal ic op hen luiden waken, om dat icse timmeren ende planten sal, seyt die HERE.

29

In dien dage en sullen si nyet meer seggen, Die vaders aten die suere druyuen, ende der [kolom] kinderen tanden werden boomich,

30

Maer elc sal in zijn boosheyt steruen, Elck mensche, dye suer druyuen eten sal, diens tanden sullen boomich worden.

31

Siet, dye daghen sullen comen, seyt die HERE, ende ic sal metten huyse van Israel, ende den huyse van Iuda een nieu verbont maken,

32

Niet na dat verbont, dat ic met uwen vaderen gemaect heb, in die dagen, doen ick haer hant greep, dat ickse wt den lande van Egypten leyden soude, dat verbont dat si te niet gemaect hebben, Ende doen ic heerschappie bouen hen hadde, seyt die HEERE,

33

Maer dit sal dat verbont zijn, dat ic metten huyse van Israhel maken sal, Na dien daghe seyt dye HEERE, ⁺ sal ic mijn wet gheuen in haeren binnensten ingewanden, ende in haer herten sal icse scriuen, ende ick sal hen een Godt zijn, ende si sullen mijn volc zijn

+ F

34

Ende voortmeer en sal een man sinen naesten niet leeren, ende een man sinen broeder, seggende, Bekent den HERE Want si sullen mi alle kennen, van haeren meesten totten minsten, ⁺ seyt die HERE, Want ic sal op haer boosheden genadich worden, ende haerder sonden en sal ic voort meer niet gedencken.

+ Hebr. viij.c

35

Dit seyt die HERE, Die die Sonne geeft tot een licht des daechs, ende die ^* oordinancie) der manen ende der sterren, tot een licht des nachts, Die die zee verstoort, ende haer vloeden gheuen geluyt, HEERE der heyrscharen is sinen naem,

* the. zeden.

36

Ist dat dese wetten gebreken voor mi, seyt die HERE, ⁺ dan sal dat zaet van Israel oock ghebreken, dattet gheen volc meer en si voor my tot allen dagen,

+ G

37

Dit seyt die HERE, Ist dat dye hemelen van bouen mogen worden gemeten ende ondersoecken die fundamenten der aerden beneden, so sal ic dat zaet van Israel, oock van mi steken, om al dat si ghedaen hebben, seyt die HERE,

38

Siet, die daghen comen, seyt die HERE, ende men sal den HERE die stadt stichten van Hanameels torren, totter poorten vanden hoecken,

39

Ende si sal wtgaen ouer dye regel der maten voor zijn aenschouwen opten berch Gareb, ende si sal omgaen Goatha,

40

ende alle dat dal der dooder lichamen ende der asschen, ende al dat ^* lantschap des doots,) totter beken van Cedron, ende totten hoeck der oostpoorten vanden paerden, Dat heylighe des HEREN en sal niet wt gepluct worden, noch voort meer inder eewicheyt niet verdoruen worden

* th. tgeheel Asseremot

§ Hoe Ieremias inden kercker propheteert dat zedechias geuanghen ende berooft zijnde tot Babilonien gheleyt soude worden, Ende hoe hi eenen acker in Anathot coopt, Ende hoe hi den Heere voor zijn volc bidt, Hoe God tot hem seyt, dat Ierusalem verbrant soude worden.