De Vorsterman Bijbel

§ Dat .xiij. Capittel.

1

⁺DIt seyt die HEERE tot mi, gaet ende besit eenen linen ghordel, ende ghi sult [kolom] dien legghen op v lendenen, ende en sult dien niet steken int water.

+ A

2

Ende ic besadt eenen gordel na des HEEREN woort, ende ic leyden omme mijn lendenen,

3

Ende des HEREN woort gesciede anderwerf tot mi, seggende,

4

Doet af den gordel den welcken ghi beseten hebt, die omme uwe lendenen is, ende staet op ende gaet tot Euphraten, ende borget dien in een gat van eenen steene.

5

Ende ic ginc wech ende berchden hem bi Euphraten, also mi die HERE beuolen hadde.

6

Ende het geuiel na vele dagen, so seyde die HEERE tot mi, staet op ende gaet tot Euphraten, ende neemt den gordel dien ick v daer beual te bergen.

7

Ende ic ginc wech tot Euphraten, ende ic groef, ende ic nam van daer den gordel van dier stadt daer ic hem gheborgen hadde, Ende siet die gordel was verrot, also dat hi nyet betamelijck en was nerghens toe te besigen.

8

⁺Ende des HEREN woort gesciede tot mi, seggende,

+ B

9

Dit seyt die HEERE, Aldus sal ic doen verrotten die hoouaerdicheyt van Iuda, ende die groote hoouaerdie van Ierusalem,

10

dit zeer quade volc die mijn woorden niet hooren en willen, ende wandelen na die boosheden haerder herten, ende si zijn wech gegaen na vremde goden, om hen te dienen, ende die te aenbeden, Ende si sullen zijn gelijc dien gordel, die niet betamelijck en is yewaerts toe te besigen.

11

Want gelijc dat die gordel vast is aen eens mans lendenen, also vergaderde ic aen mi al dat huys van Israel, ende al dat huys van Iuda, seyt die HERE dat si mi souden zijn tot een volc, ende tot eenen naem, ende tot lof ende tot eere, ende si en hoordens niet.

12

Hierom suldi hen segghen dit woort, Dit seyt die HEERE die God van Israel, Elcke flesse sal geuult worden met wijne. Ende si sullen tot v seggen, En weten wi niet dat elc flesse sal worden gheuult met wijne.

13

⁺Ende ghi sult tot hen segghen, Dit seyt die HEERE, Siet, ick sal alle die ghene die in desen lande woonen, ende die Coningen van Dauids geslachte die op sinen throon sitten, ende die priesteren ende die propheten, ende alle die in Ierusalem woonen, met dronckenschap veruullen,

+ C

14

ende ick salse verstroyen den man van sinen broeder, ende die vaders ende die kinderen te samen, seyt die HEERE.

Ick en salse niet sparen, ende ick en salse niet ^* toelaten,) noch ontfermen dat icse niet verderuen en sal,

* h. ouersien

15

Hoort ende begrijpet metten ooren, En verheft v niet, Want die HEERE heuet gesproken,

16

Geeft die eere den HERE uwen Gode, eert doncker wort, ende eer uwe voeten stooten aen die doncker bergen, Ghi sult dat licht ontbeyden, ende hi salt setten tot scaduwe

[p. M7r]

des doots, ende in donckerheden,

17

Ist dat ghi dat niet en hoort, so sal in die verborgen plaetse mijn ziele weenen vanden aensicht der houerdien

Mijn ooge sal weenende weenen, ende tranen storten, Want des HEEREN cudde is geuaen

18

Segt tot den coninc ende der vrouwen, Verootmoedicht v, sidt op die eerde, want die croone uwer heerlicheyt sal neder vallen van uwen hoofde.

19

Die steden vant Zuyden zijn gesloten, ⁺ ende niemant en is diese op doet, Alle Iuda is ouergeuoert in volmaecter oueruoeringe.

+ § Die steden etc. dat zijn die steden van Iuda tegen babilonien te rekenen.

20

Heft op v oogen, ende besiet, die vant Noorden coemt Waer is die kudde die v gegeuen is, v edele ^* huysvee)

* the. schaep

21

Wat suldy seggen, als hi v besoeken sal? Want ghi hebtse geleert tegen v ^* ende v hooft) En hbben v niet beuaen pinen als een vrouwe in kintsbarens noot is?

* h. dat si uwe hooft zijn souden.

22

Ist dat ghi in v herte segt, ⁺ waerom zijn dese dingen op mi gecomen. Om die menichte uwer boosheyt, zijn ontdect uwe scamelheden, uwe planten vanden voeten zijn besmet.

+ D

23

☞ Ist dat een mooriaen zijn vel veranderen mach, oft een lupaet zijn sprickelen? so muechdy ooc weldoen, ghi die quaet geleert hebt,

24

Ende ic salse verstroyen gelijck stoppelen, die vanden winde gegrepen worden in die wildernisse,

25

Dit is uwe lot ende tdeel uwer maten, van mi, seyt die HERE, want ghi hebt mijns vergheten, ende betrouwet in luegenen,

26

Daerom heb ic ontdect uwe dgyen tegen uwe aensicht, ende uwe scamelheyt is vertoont Vwe ouerspel, ende uwe neyen, ende die misdaet uwer oncuyscheden,

27

Ic sach uwe afgriselijc wercken inden acker opten berge, Wee v Ierusalem, Ghi en sult niet gesuyuert worden na mi, Hoe lange salt noch zijn?

§ Van dat gebrec des reghens, Die stemme vanden ghenen die berou hadden, Ende dat der valscher propheten vasten, bidden, ende offerhanden niet en baten. Ende dat hi om des volcs vernielinge droef was, Ende hoe den Heere geuraecht wert waerom dat hi dat volc verworpt.