De Vorsterman Bijbel

§ Dat .xij. Capittel.

1

⁺HEERE ghi zijt rechtueerdich, al ist dat ic met v ^* disputere), maer nochtans sal ic rechtueerdige dingen spreken tot v, Waerom wort der quader wech voorspoedich, ende waerom is, wel, alle den genen die ouertredinge ende ongerechtelijc doen?

+ A

* the. twiste

2

Ghi hebtse geplant ende si hebben haer wortel gescoten, si hebben voortganc, ende maken vrucht, Ghi zijt bi haeren monde, ende verre van haeren nieren,

3

Ende HERE ghi kent mi, ghi hebt mi gesien, ende ghi hebt mijn herte ^* met) v beproeft.

Vergadertse als een cudde ter offerhanden ende heylichtse totten dage des dootslachs,

* the. voor.

4

Hoe lange sal dat lant weenen, ende dat cruyt van alle den lantscappen verdrooget wor-

[p. M6v]

den? ⁺ om die boosheyt der genen die daer in woonen, so is dat vee te niet geworden, ende die vogelen, want si seyden, Hi en sal onse wterste niet sien.

+ B

5

Ist dat ghi metten voetloopers lopende ^* gearbeyt hebt) hoe suldi mogen strijden metten paerden? Ende als ghi inden lande van vrede seker hebt geweest, ^* wat suldi doen in die hoouaerdicheyt der Iordanen?)

* the. moede geworden zijt

* the. hoe suldi v dan houden metter houaerdicheyt aenden Iordaen

6

Want uwer broeders ende ws vaders huys, vochten ooc tegen v, ende riepen na v met volre stemmen, Als si v goede dingen spreken sullen, en geloeft hen niet.

7

Ic heb mijn huys verlaten, ende mijn erue verlaten. Ic gaf mijn beminde ziele in haerder vianden handen,

8

mijn erflicheyt is mi geworden als een leeu inden bossche, Hi gaf zijn stemme tegen mi, hierom haetede icse.

9

⁺En is mijn erflicheyt niet een vogel van gesprickelder verwen? ^* En ist niet een vogel altemael geuerwet?) Coemt ende vergadert v al ghi dieren des velts, haest v om te verslinden,

+ C

* the. om den welken vele vogelen rontsomme alomme sitten

10

Vele harderen hebben mijnen wijngaert verdoruen, si hebben mijn deel vertreden, Si hebben mijn een begeerlijc erfdeel gegeuen verwoest wildernisse.

11

Si hebbense ^* ghestelt tot een verderuenisse, ende si weenden op mi, Met verwoestheden is al dat lant verwoest), want niemant en isser diet ouerdenct metter herten.

* the. woest geleet ende tegen mi ist geschiet. Dat lant is gheheel woest worden

12

Die verderuers zijn gecomen op alle die ^* wegen) der wildernissen, want des HEEREN swaert heeft verslonden vanden eenen eynden vanden lande tot dander eynde, Geen vrede en is in allen vleesche.

* the. heyde.

13

Si zaeyden tarwe, ende si oogsteden doornen, si ontfingen die erflicheyt, ende ten sal hen niet vorderen, Ghi sult worden beschaemt van uwen vruchten, om die gramscap des corens des HEREN.

14

Dit seyt die HERE, tegen mijn alder quaetste gebueren, die die hant slaen aen dat erfdeel, dat ic gedeylt hebbe minen volcke van Israel. Siet, ick salse wtroeyen wt haeren lande, ende ic sal dat huys van Iuda wtroeyen wten midden van hen,

15

⁺Ende als icse sal hebben wtgesteken, so sal ic mi omkeeren ende ontfermen haers, ende ic salse wederbrengen ^* den man) tot zijn erfdeel, ende den man tot zijn lant.

+ D

* the. een yeghelijc

16

Ende tsal zijn, ist dat si onderwesen worden ende leeren mijns volcs wegen, so dat si sweeren bi minen naem, Leeft die HERE, also si leerden mijn volc te sweeren bi Baal, so sullen si worden gesticht int midden mijns volcs.

17

Maer ist dat zijt niet en hooren, so sal ic dat volc wtroeyen met wtroeyinge ende verderuenisse seyt die HERE

§ Vander linen dwaele, Ende van dat flesken, Ende vander quader dronckenschap, Vanden duysteren berghen, Ende van die menichte der sonden van Iuda, Ende van die onbekeerlicheyt des volcs.