De Vorsterman Bijbel

§ Dat .lxiij. Capittel.

1

⁺WIe is dese die van Edom coemt, met ^* geuerude) cleederen van Bozra? dese is schoone in zijn ^* stoole voortgaende in menichte zijnder cracht) Ick ben die spreect die rechtuaerdicheyt ende een vooruechter, om salich te maken.

+ A

* h. rootachtighe

* the. cleedt ende bereyt met zijnder macht

2

☞ Waerom is uwe cleet root, ende uwe cleederen gelijc der tredender in de wijnpersse?

3

☞ Ic heb die wijnpersse alleen getreden, ende vanden volcken en was gheen man met mi, Ic hebse in mijnder verbolgentheyt getreden, ende ic hebse vertreden in mijnder gramschappen, ende haer bloet is gesprenct op mijn cleet, ende alle mijn cleederen heb ick besmet.

4

Want den dach der wraken is in mijnder herten, ende dat iaer mijnder vergeldinghe is ghecomen.

[p. L7v]

5

⁺Ende ic aensach rontsomme, ende daer en was gheen hulper, Ic sochte ende daer en was gheen die holpe, ende minen arm behielt mi, ende mijn gramschap selue heeft mi gheholpen.

+ B

6

Ende ic vertrac die volcken in mijn verbolgentheden, ende ic maectese droncken in mijn gramscappen, ende ic trac haer stercheyt ter aerden.

7

Ic sal der ontfermherticheden des HEEREN gedencken, des HEREN lofsanc van alle die goeden die ons die HERE heeft gegheuen, ende ouer die menichte der goeden den huyse van Israel, die hi hen heeft gegeuen na zijn ontfermherticheden, ende na die menichte zijnder ontfermherticheden.

8

Ende hi seyde si zijn immer mijn volck, die kinderen niet ^* missakende), ende hi was een salichmakere geworden.

* h. liegende

9

In alle haeren druck en was hi niet gemoeyt, ende die Enghel zijns aensichts behielt hen, In zijnder liefden, ende in zijnre genaden heeft hise selue verlost, ende hi droechse, ende hiefse op, alle die dagen der werelt.

10

Ende si verwecten tot gramschappen, ⁺ ende verstoorden den gheest zijns heylighen, ende hi is hen tot een viant gheworden, ende hi selue vocht teghen hen.

+ C

11

Ende hi bracht in ghedachtenisse die dagen der werelt, Moysi ende zijns volcs, Waer is hi diese wtleyde vander zee metten herderen zijnder cudden?

12

Waer is hi die in zijn middel sinen heyligen gheest settede?

Die Moysen ter rechter hant leyde met den arm zijnder heerlicheyt, die de wateren voor hen deylde, op dat hi hemseluen eenen eewighen naem soude maken?

13

Diese door die afgronden leyde, ghelijck een paert in die woestine, daer dat niet en strunckelt.

14

Gelijc een beeste die nederdaelt inden velde, Des HEEREN gheest was zijn leydtsman, alsoo leyde ghi v volck, ⁺ op dat ghi v eenen naem der eeren soudt maken.

+ D

15

Anschout vanden hemel, ⁺ ende siet van uwer heyliger wooninge, ende vanden conincliken stoel uwer eeren, waer is uwe vreeselike liefde, ende uwe starcheyt, die menichte ws ^* ingewants) ende uwer ontfermherticheden, die welcke hen teghen mi hart hebben gehouden.

+ Deu. xxvi. Baruch. ij

* th. heerlijcheyts

16

Ghi zijt onse vader, ende Abraham en wiste niet van ons, ende Israel en kende ons niet Ghi HERE zijt onse vader, onse verlosser van der eewicheyt ist uwen naem.

17

HERE, waeromme hebt ghi ons doen dwalen, van uwen wegen, ghi hebt onse herte verhert, dat wi v niet en souden vreesen? Bekeerdt, om uwer knechten wil, die gheslachten uwer erffenissen.

18

Onse vianden hebben, als niet, beseten v heerlike volck, si hebben v gheheylechde plaetse vertreden, [kolom]

19

Wi zijn geworden, als int beghin, doen ghi gheen heerscapie ouer ons en hadt, ende uwen naem niet aengeroepen en werde ouer ons.

§ Hoe Christus toecoemst begheert wert, ende coemt den genen die rechtuaerdicheyt doet, ten ghemoete, Ende dattet alleen Gode bekent is wat God den ghenen bereyt heeft die welcke hem verwachten, Ende wat alle onse rechtueerdicheyt is, hi vertelt ooc die goetheit Gods.