De Vorsterman Bijbel

§ Dat .lxiiij. Capittel.

1

⁺OCh oft ghi den hemel schoerdet, ende nederdaeldet, Die bergen souden van uwen aensichte neder vloeyen.

+ A

2

Si souden verdwinen als een brant des viers, ende de wateren souden verbranden metten vier, op dat uwen naem uwen vianden bekent soude worden, de heydenen souden van uwen aensichte verschrict worden.

3

Als ghi wonderlike dingen ^* doen sult, so en sullen) wijt niet verdragen, Ghi daeldet neder, ende van uwen aensichte vloeyden de berghen af.

* h. dedet en consten

4

⁺Vant beginne der werelt en hadden zijt niet gehoort, ⁺ noch si en haddent metten ooren niet vernomen.

Die ooghe en hadde niet gesien o God sonder v, de dingen die ghi bereyt hebt uwen verwachtere.

+ B

+ i.corin. ij.b

5

Ghi liept te gemoete die verblidende, ende den ghenen die rechtuaerdicheyt dede, in uwe weghen sullen si ws gedencken, Siet, ghi zijt gram, want wi hebben gesondicht, daer in hebben wi altoos gheweest, ende wi sullen salich ghemaect worden.

6

⁺☞ Ende wi zijn alle gheworden, gelijc een besmette, ende alle onse rechtuaerdicheden, gelijc een doeck van een maensuchtighe vrouwe, ende wi zijn alle geuallen ghelijck een blat, ende onse onrechtuaerdicheden hebben ons wech genomen, gelijc wint

+ C

7

Ende daer en is niemant die uwen naem aenroept, die opstaet ende v grijpt, Ghi hebt uwe aensicht van ons verborgen, ende ghi hebt ons gestooten, in die hant onser onrechtuaerdicheden.

8

Ende nv HEERE, ghi zijt onse vader, wi dat slijc, ende ghi onse potbacker, ende wi alle, dat werck uwer handen.

9

HERE, en wort niet altoos so zeer gram, ende en gedenct der onrechtuaerdicheit niet voortmeer, ⁺ siet, aenscout doch, dat bid ic v, ⁺ dat wi alle zijn v volck.

+ ps. lxxxviij

+ D

10

Die stede ws heylichs, is woest gheworden, Sion is een woestine geworden, Ierusalem is verwoest.

11

Thuys onser heylichmakinge ende onser heerlicheyt is verlaten, in dwelcke v onse vaders loefden, is tot een verberninghe des viers geworden, ende alle onse begheerlicheden zijn tot veruallen plaetsen verkeert.

12

HERE suldy v ooc van desen dingen onthouden? suldy swighen, ende ons wtermaten zeer quellen?

1

Si bebben mi ghesocht, die te voren niet en vraechden, Si hebben mi geuonden, die mi niet en sochten.

[p. L8r]

§ Vanden heydenen die totten gelooue souden comen, Ende van dat liden Christi teghen die Ioden, ende vanden ouerbleuenen, ende vanden voorspoet, Ende hoe God Ierusalem vernieuwet, ende van haerder salicheyt.