De Vorsterman Bijbel

§ Dat .Lx. Capittel.

1

⁺STaet op, ende wort verlicht Hierusalem, want v licht is ghecomen, ende die heerlicheyt des HEEREN is ouer v opghegaen. ☜

+ A

2

Want siet die duysternissen sullen daerde bedecken, ende die schemeringe die volcken.

[p. L6v]

Maer ouer v sal die HEERE opgaen, ende zijn heerlicheyt sal ouer v ghesien worden.

3

Ende die Heydenen sullen ^* in v licht) wandelen, ende die Coninghen ^* inden schijnsel ws opgancs.)

* The. naer uwe licht.

* th. na dat scijnsel dat v opgaet.

4

Heft uwe ooghen alomme, ende siet alle dese selue zijn vergadert, ⁺ ende zijn tot v ghecomen, v kinderen sullen van verre comen, ende v dochteren ^* sullen van die syde opstaen.)

+ Mr. viij.a

* th. salmen daer toebrenghen.

5

Dan sult ghi sien ende ^* oueruloeyen), ende v herte sal verwonderen ende verbreet worden, als die menichte der zee tot v bekeert sal zijn, ende die macht der Heydenen tot v sal ghecomen zijn.

* th. verlicht worden.

6

⁺Oueruloedicheyt der kemelen sal v bedecken, die dromedarisen van Madian ende Epha, si alle van Saba sullen comen, gout, siluer ende wieroock brengende, ende die louen des HEEREN vercondighende.

+ B

7

Alle vee van Cedar sal v vergadert worden, Die rammen van Nabaioth sullen v dienen, si sullen gheoffert worden op minen welbehaechlijcken altar, ende ick sal dat huys mijnder grootmakinghe verheffen.

8

☞ Wie zijn dese die welcke ghelijck wolcken vlieghen, ende ghelijck duyuen tot haeren ^* vensteren)

* th. koten.

9

Want die eylanden sullen mi verwachten, ende die schepen der zee ghelijck int beghinne, op dat ick v kinderen van verre toe brenghen soude, haer siluer ende haer gout met hen, totten naem des HEEREN ws Gods, ende totten heylighen van Israel, want hi heeft v heerlijck ghemaect.

10

Ende die vremde kinderen sullen v mueren tymmeren, ende haer Coninghen sullen v dienen, Want in mijnder vertoornicheyt hebbe ick v gheslaghen, ende in mine versoeninghe hebbe ick ws ontfermt.

11

⁺Ende v poorten sullen altijt open ghedaen zijn, dach ende nacht en sullen si niet ghesloten worden, op dat die machticheyt der Heydenen tot v ghebracht worde, ende haer Coninghen souden toeghebracht worden.

+ C

12

Want dat volck, ende dat Coninckrijck welcke v niet en dienen, sullen vergaen, ende die Heydenen sullen ^* met verwoestheyt) verwoest worden.

* th. quadelijck.

13

Die heerlicheyt van Libanon sal tot v comen, den Abiel boom, den Pijnboom, ende den Bueckenboom tsamen, om die plaetse mijnder heylichmakinghe te vercyeren, ende die plaetse mijnder voeten welcke ick heerlijck maken sal.

14

Ende die kinderen der ghenen die v verootmoedicht hebben, sullen crom tot v comen, ende alle die v lasterden, sullen die voetstappen uwer voeten aenbidden, ende si sul-[kolom]len v heeten, des HEEREN stadt Syon, des heylighen Israels.

15

Daer voor, dat ghi verlaten ende ghehaet hebt gheweest, ende daer gheen en was die door ghinck, so sal ick v stellen tot hoouaerdicheyt der werelden blijschap, van gheboorte tot gheboorte.

16

☞ Ende ghi sult dat melck der Heydenen suyghen, ende ghi sult metter Coninghen borste ghesooghet worden, ende ghi sult weten dat ick die HEERE ben v salichmaker ende verlosser die stercke Iacobs. ☜

17

☞ Voor dat metael sal ick gout bringhen, ende voor dat yser siluer, ende voor dat houte coper, ende voor steenen yser, Ende ick sal v besoeckinghe vrede setten, ende v ^* Prouoesten) rechtuaerdicheyt.

* th. driuers

18

⁺☞ Daer en sal niet voort meer in uwen lande boosheyt ghehoort worden, roof, verwoestinghe, ende in stucken wrijuinghe in uwen eynden, ende v mueren, sal salicheyt beuanghen, ende uwe poorten lofsanck.

+ D

19

☞ Die zonne en sal v niet meer om te lichten door den dach zijn, ende der manen schijnsel en sal v niet meer verlichten, Maer die HERE sal v tot eenen eewighen lichte zijn, ende uwen God tot uwer grootmakinghe. ☜

20

V Zonne en sal voortmeer niet meer ondergaen, ende v Mane en sal niet meer minder worden, want die HEERE sal v tot een eewich licht zijn, ende die daghen uwer weeninghe sullen wt zijn.

21

Want alle v volck sullen rechtuaerdich zijn, ende inder eewicheyt sullen si die aerde bewoonen, Die wtspruyt mijnder plantinghe is dwerc mijnder handen tot grootmakinge.

22

Die cleyne, sal tot duysent worden, ende dat cleyne kindeken tot eenen stercken volcke, Ick ben die HEERE, in zijnder tijt sal ick dat haestelijck doen.

§ Van Christus saluinghe ende zijnder sendinghe, van sinen woorden totten predicanten, Ende hoe dat die heylighe Kercke haer verhuecht ende sine vercyeringhe.