De Vorsterman Bijbel

§ Dat .lix. capittel.

1

⁺SIet des HEEREN hant en is niet afghecort, ⁺ dat hi niet salich en mach maken, noch zijn oore en is niet beswaert, dat hi niet en verhoore.

+ A

+ Num. xi.c.

2

Maer uwe ^* onrechtuaerdicheden deelden) tusschen v ende tusschen uwen God, ende v sonden hebben zijn aensichte van v verborghen, dat hi niet hooren en soude.

* the. misdaden onderscheyden.

3

Want v palmen zijn besmet met bloede, ende v vingheren met ^* onrechtuaerdicheyt) v lippen hebben lueghene ghesproken, v tonghe clapt ^* onrechtuaerdicheyt. ⁺

* h. misdaet

* the. onbehoorlicheyt.

+ Iob. xv.d.

4

Niemant en aenroept die rechtuaerdicheyt, noch daer en is niemant die oordeelt metter waerheyt, maer si betrouwen in niet ende spreken ydelheyden, Si hebben ontfanghen den arbeyt, ende ghebaert onrechtuaerdicheyt.

5

Si braken der slanghen eyeren, ende der spinnen webben gheweuen, Die van haeren eyeren etet, die sal steruen, ende wort opgeuoet, so sal daer een Basiliscus wt cruypen

6

⁺Haer webben en sullen tot gheen cleet zijn, noch si en sullen niet bedect worden met haeren wercken, haer wercken zijn wercken ^* sonder orbaer,) ende dat werck des boosheyts in haeren handen. ⁺

+ B

* h. der ongerechticheit

+ Proue. i.d

7

Haer voeten loopen totten quade, ende si haesten om ontschuldich bloet te storten, haer ghedachten zijn ghedachten ^* sonder orbaer) woestheyt ende in stucken wrijuinghe is in haeren weghen.

* th. der ongherechticheyt.

8

☞ Si en hebben den wech des vreets niet ghekent, ende daer en is gheen oordeel in haeren ganghen, Haer paden zijn haer gecrommet, dat al die daer in wandelt, en kent geenen vrede.

9

Daerom ist oordeel verre van ons, ende die rechtuaerdicheyt en sal ons niet omuanghen, wi verwachteden dat licht, ende siet, duysternisse, claer schijnselen, ende wi wandelden in ^* schemeringhen.)

* th. int donckere:

10

Wi tasten den wandt ghelijck blinde, ende ghelijck die gheen ooghen en hebben, hebben wi voort aenghetast, wi aenstieten in den middage, gelijck in ^* duysternisse ende duyster plaetsen) ghelijck dooden.

* h. den nacht ende inden grauen.

11

Wi sullen alle brullen ghelijck beyren, ende ghelijck duyuen sullen wi droeflijck gheluyt makende suchten, wi hebben oordeel verwacht, ende het en is niet, salicheyt, ende si is verre van ons.

12

⁺Want onse onrechtuaerdicheden zijn vermenichfuldicht voor v, ende onse sonden hebben ons ^* gheantwoort) want onse ouertredinghen zijn met ons, ende wi hebben [kolom] onse onrechtuaerdicheden bekent.

+ C

* th. beschuldicht.

13

^* Sondighen ende lieghen teghen den HEERE) ende wi zijn afghekeert, dat wi niet na onsen God en ginghen, sprekende valsche beclappinghe, ende ouertredinghe, wi hebben ontfanghen, ende wi hebben ghesproken vander herten die woorden der lueghenen.

* the. dat wi den Heere verlaten hebben, ende hem verloochent hebben

14

Ende dat oordeel is achterwaerts ghekeert, ende die rechtuaerdicheyt stont van verre,

15

want in die strate is gheuallen die waerheyt, ende rechuaerdicheyt en mochte daer niet comen.

Want die waerheyt is gheworden tot verghetenheyt, ende die wech ghinck vanden quade, was den roof gheleuert, Ende die HEERE sacht, ende het scheen quaet in sinen ooghen, want daer en was gheen oordeel.

16

Ende hi sach datter gheen man en was, ende hi is ^* bedroeft gheweest) datter gheen tusschen tredende en was, ^* ende sinen arm sal hi voor hem seluen behouden, ende zijn rechtuaerdicheyt selue sal hem beuestigen.)

* th. verwondert.

* th. dien sinen arm holpe ende zijn gherechticheit onthielt.

17

Ende hi dede die rechtuaerdicheyt aen, ⁺ ghelijck een pantzier, ende den helm der salicheyt was op zijn hooft, ⁺ Ende hi dede aen dat cleet der wraken, ende hi is omghecleet met vreeselijcke liefde, ghelijck met eenen mantel.

+ D

+ Ephe. vi.c i.Tes. v.b.

18

^* Als totter betalinghe zijnder veronwaerdicheyt sinen vianden, met vergeldinghe sinen vianden, den eylanden sal hi wederbetalen.)

* th. Dat hi zijnder wederpartye ende vianden met toornicheit vergelde ende betale.

19

Ende die vanden Westen zijn, sullen den naem des HEREN vreesen, ende die vanden opganck der Sonnen zijn, heerlicheyt, als hi ghelijck eenen crachtighen stroom sal comen, dien des HEREN ^* gheest sal dwinghen.)

* th. wijnde opdrijft.

20

Ende die verlosser sal tot Sion comen, ende tot den ghenen die wederom keeren in Iacob van boosheyt, seyt die HEERE.

21

Dit is mijn verbont met hen, seyt die HEERE, minen gheest die in v is, ende mijn woorden die ick in uwen mont gheset heb, en sullen niet wech gaen van uwen monde, ende vanden monde ws zaets (seyt die HEERE) van nv aen tot inder eewicheyt.

§ Van Hierusalem die eerste kercke, Ende van die heerlicheyt der heyligher kercken, Ende van Christo, ende van die toecomende salicheyt.