De Vorsterman Bijbel

§ Dat .lviij. Capittel.

1

⁺ROept, ^* ende en hout niet op,) verheft v stemme ghelijck een trompette, ende vercondicht minen volcke haer ^* ouertredinghe) ende Iacobs huyse haer sonden.

+ A

* th. wter kelen en sparet niet.

* the. boosheyt.

2

☞ Want si soecken mi van daghe tot daghe ende willen mijn weghen weten, ghelijck volck dat rechtuaerdicheyt ghedaen heeft, ende dat oordeel zijn Gods niet en heeft verlaten, Si bidden mi om oordeelen der rechtuaerdicheden, ende willen God ghenaken.

3

Waeromme hebben wi gheuast, ende ghi en hebt dat niet aenghesien? wi hebben onse zielen vernedert, ende ghi en hebbes niet gheweten? Siet inden daghen ws vastens wort v wellusticheyt gheuonden, ende ghi maent alle v schuldenaren.

4

Siet, ghi vastet tot kijuinghe ende twistinghe, ende ghi slaet metter vuyst ongodlijck, En wilt niet vasten ghelijck ghi tot desen dach toe gheuast hebt, dat v stemme [kolom] ghehoort worde inder hoochten.

5

⁺Ist oock aldusdanigen vasten, dwelck ick vercoren heb? dat die mensche den dach dore zijn ziele quelle? Ist niet dat hi zijn hooft draeye ghelijck eenen reep, ende eenen sack ende asschen spreyde, Sult ghi dit vasten noemen? ende den welbehaechlijcken dach des HEEREN.

+ B

6

En is dit niet meer dat vasten dat ick vercoren hebbe? ontdoet die bindinghen der ongodlicheyt, onbint die ^* busselkens) der bedructen, ende laet die ^* ghebrokene) vrij, ende schoert alle last van een.

* th. ioczeelen

* the. verdructen.

7

Breect den hongherenden v broot, ende die arme dwalende sult ghi in huys leyden, ende als ghi den naecten siet, sult ghi hem decken, ende v vleesch en versmaet niet.

8

Dan sal v licht wtspruyten ghelijck die morghenstont, ende v ghesontheyt sal snellijc wtspruyten, Ende v rechtuaerdicheyt sal voor v aensicht gaen, ende des HEREN heerlicheyt sal v ^* vergaderen.)

* th. ontfanghen.

9

Dan sult ghi aenroepen, ende die HERE salt verhooren, ⁺ ghi sult roepen, ende hi sal segghen, siet ick ben hier, ^* want ick ben barmhertich die HERE dijn God) ist dat ghi van tmidden van v afdoet die ketene, ende aflaet den vingher voort te steken, ende te spreken dat niet orbaerlijck en is,

+ C

* ten is niet int heb.

10

Als ghi den hongherende v ziele wtstorten sult, ende die vernederde ziele versadet, dan sal v licht in die duysternisse opgaen, ende v duysternisse sal ghelijck den middach zijn.

11

Ende die HERE v God sal v altoos ^* ruste gheuen,) ende hi sal v ziele ^* met claerheden) versaden, ende hi sal v beenen ^* verlossen) ⁺ ende ghi sult zijn ghelijck eenen vochtigen hof, ende ghelijck een sprincadere des waters, wiens wateren niet en sullen ghebreken.

* th. leyden.

* the. in die droochte.

* th. vermaken.

+ D

12

Ende die ^* verlatene) der eewen sullen van v ghetimmert worden, die ^* fundamenten des gheslachts ende gheslachten) sult ghi verwecken, ende ghi sult heeten een tuynder des ghebroken tuyns, afkeerende die paden des onrechtuaerdicheden.

* th. woestijnen.

* th. die eewighe fundamenten.

13

☞ Ist dat ghi afkeert dinen voet vanden, Saboth uwen wille in minen heylighen daghe te doen, ende dat ghi noemt den Saboth der wellust, den heylighen des HEEREN, ende ist dat ghi hem eerwaerdicht, als ghi uwe weghen niet en doet, ende dat v begheerlicheyt niet en worde gheuonden, dat ghi gheen onnut woort en spreect.

14

Dan sult ghi inden HEERE verlusticht worden, ende ick sal v verheffen bouen die hoochten der aerden, ende ick sal v opuoeden met die erffenisse Iacobs ws vaders, want des HEREN mont heuet ghesproken.

[p. L6r]

§ Dat God machtich is te helpen, ende goedertieren om te verhooren maer onse sonden behinderent, Ende van die wapenen daer God mede ghewapent is.