De Vorsterman Bijbel

§ Dat .lij. Capittel.

1

⁺STaet op, staet op, wordet ghecleet met uwer stercheyt o Sion, wort ghecleet metten cleederen uwer grootmakinghe, Hierusalem ^* stadt des heylighen) want hi en sal niet meer toelaten, dat die ombesneden ende besmette meer door v sal gaen.

+ A

* the. ghi stadt der heylicheyt

2

^* Wort wtgheschuddet vanden stof, staet op, ende sidt) Hierusalem, onbint die banden ws necs, gheuanghene dochter van Sion.

* th. Schuddet stof van v, staet op ghi geuanghene.

3

Want dit seyt die HEERE, om niet sidy vercocht, ende sonder siluer suldy verlost worden.

4

Want dit seyt die ^* HEERE God,) mijn volck ghinck neder in Egypten vant beghin, om dat daer een woonende ackerman soude wesen, ende Assyrien sonder sake heuet hem ^* valschelijck beschuldicht.)

* the. heerscappende HERE.

* th. gheplaghet.

5

⁺Ende nv wat is mi hier, seyt die HEERE, dat mijn volck te vergeefs is wech gheleyt zijn heerschappers ^* doen booslijck) seyt die HEERE, ende altoos alle den dach door wort minen naem gheblasphemeert. ☜

+ B

* th. hebben ghehuylt.

6

Daeromme sal mijn volck minen naem ^* weten) in dien daghe, want ick selue die sprack, siet, ick ben hier teghenwoordich.

* the. bekennen.

7

Hoe schoone zijn op die berghen, die voeten des vercondigers, des ghenen die vrede predict, des ghenen die goet vercondighende is, des ghenen die salicheyt predict, seggende,

[p. L4r]

tot Sion, Vwe God sal regneren.

8

Die stemme uwer wachters, si hebben die stemme opgheheuen, si sullen te samen louen, want si sullen ^* van ooghe aen ooghe) sien, als die HEERE Sion bekeert sal hebben.

* th. ooghenschijnlijck.

9

Verblijt ende louet te samen, verlatene Ierusalem, want die HEERE heeft zijn volck vertroost, hi heeft Ierusalem verlost.

10

Die HEERE heeft sinen heylighen arm ^* breet ghemaect,) voor die ooghen van allen Heydenen, ⁺ ende alle die eynden der aerden sullen sien die salicheyt ons Gods.

* h. ontdect

+ C

11

Gaet wech, gaet wech, gaet daer wt, en wilt dat besmette niet aentasten, gaet wt van haeren middele, reynicht v die des HEREN vaten draecht.

12

Want ghi en sult niet met ^* gheruchte) wt gaen, noch ghi en sult inder vluchte niet wech reysen, want die HEERE wandelt voor v, ende Israels God sal v vergaderen.

* the. haeste

13

Siet, mijn knecht salt verstaen, ende hi sal verhoocht worden, ende verheuen, ende hi sal zeer hooch zijn.

14

⁺Ghelijck haer vele ouer v hebben verwondert, also sal zijn aensichte sonder heerlicheyt onder die mans zijn, ende zijn ghedaente onder die kinderen der menschen.

+ D

15

Dese sal veel Heydenen besprenghen, die Coninghen sullen haeren mont toe houden ouer hem, Want den welcken, van hem niet ghebootschapt en is, die hebbent ghesien, ende diet niet ghehoort en hebben, hebbent aenghemerct. ☜

§ Van dat lijden Iesu Christi propheteert hi, Ende dat hi om des lijdens wille niet ghekent en sal worden, Ende van die vruchte zijns lijdens.