De Vorsterman Bijbel

§ Dat .xlvij. Capittel.

1

⁺DAelt neder ende sidt int stof, ghi maghet dochter van Babilonien, sidt in die aerde, Der dochter der Chaldeen en is voort meer, gheenen coninclijcken setel bereydt Want ghi en sult voortaen niet meer ghenoemt worden, saecht ende teedere.

+ A

2

Neemt die muelen, ende malet meel, Ontdect uwe schamelheit, ontdect uwe scouderen, maect bloot uwe beenen, Ghaet door die riuieren.

3

Vwe schamelheyt sal ontdect worden, uwen lachter sal oock ghesien worden, wrake sal ic ontfaen, ende gheen mensce en sal mi wederstaen,

4

Onse verlosser, die HERE der heyrscharen, is sinen naem, die heylige van Israel

5

Sidt swigende, ende gaet in die duysternis-

[p. L2r]

se dochter der Chaldeen, ⁺ want ghi en sult niet meer die vrouwe der conincrijcken heeten.

+ B

6

Ic ben gram geweest op mijn volc, ic heb mijn erffenisse besmet, ende ic hebse in v hant ghegeuen, ghi en hebt geen ontfernherticheden gestelt, op den ouden hebdi v ioc alte zeer beswaert.

7

Ende ghi hebt geseyt, inder eewicheyt sal ic een vrouwe zijn, dese dingen en hebdi op v herte niet geset, noch ghi en hebt dijns wtersten niet gedacht.

8

Ende nv hoort dese dingen, ghi verleckerde, woonende vrijlijc, die in v herte segt, Ic bent, ende behaluen mi en isser geen meer, Ic en sal geen weduwe sitten, ende ic en sal geen onuruchtbaerheyt weten.

9

Dese twee sullen v snellijc in eenen dage comen, onuruchtbaerheyt ende weduscap, Dese alle gader quamen ouer v, om die menichte uwer touerijen, ende om die ouergroote hartheyt uwer waerseggers.

10

Ende ghi betroudet in v boosheyt, ende ghi hebt geseyt, daer en is niemant die mi siet, ⁺ Dese uwe wijsheyt ende uwe conste hebben v bedrogen, ende ghi hebt in uwer herten geseyt, Ic bent, ende behaluen mi en isser geen ander.

+ C

11

Ende een quaet sal ouer v comen, ende ghi en sult sinen opganck niet weten, ende kattiuicheyt sal ouer v vallen, die ghi niet en sult mogen afsuyueren, ende ellendicheyt sal snellijc ouer v comen, de welcke ghi niet weten en sult.

12

Staet met uwe waersegghers, ende met die menichte uwer touerijen met die welcke ghi gearbeyt hebt van uwer ioncheyt aen, oft ooc mescien yet mocht helpen? oft ghi ooc ^* starcker mocht worden.)

* th. verwinnen mocht

13

☞ Ghi zijt ontbroken in die menichte uwer raden, Laet si staen, die waerseggers des hemels, ende v salich maken die merckende op die sterren, tellende die maenden, ⁺ om dat si v daer wt toecomende dingen souden bootschappen,

+ D

14

Siet, si zijn gheworden gelijc een stoppele, dat vier heeftse verbrant, ende si en sullen haer ziele niet verlossen vander hant der vlammen, daer en zijn geen colen dat si werm werden, noch geen scouwe daer si voor sitten mogen.

15

Also zijn si v geworden met den welcken ghi arbeydet, v coopluyden van uwer ioncheyt, een yegelijc dwaelde in sinen wech, ☞ daer en is niemant die v behoudet

§ Hoe die Heere die hartneckicheyt der Ioden straft door die wijsheyt, waer door hi toecomende dingen weet, door die mogentheyt daer hi alle dinc mede gescapen heeft.