De Vorsterman Bijbel

§ Dat .xlviij. Capittel.

1

⁺HOort dese dingen Iacobs huys, die geheeten zijt metten name van Israel, ende die vanden wateren van Iuda wt zijt gegaen, die inden name des HEREN sweret, ende des Gods van Israel zijt gedachtich, Maer niet inder waerheyt, noch rechtuaerdicheyt.

+ A

2

Want si zijn ge-[kolom]noemt vander heyligher stadt, ende op Israels God zijn si vast gemaect, wiens naem is die HEERE der heyrscaren.

3

^* Die eerste van dier tijt heb ic) vercondicht, ende si zijn van minen monde wtgegaen, Ende ic hebse v doen hooren, ic hebt snellijc gedaen, ende si quamen.

* the. Ic heb v langhe voorgangen dinghen

4

☞ Ic wiste dat ghi hart zijt, ende uwen nec een yseren senuwe is, ende v voorhooft metalen.

5

Ende ic seyt v ^* te voren van dier tijt), eer dat gebuerde, ⁺ dede ict v hooren, op dat ghi messchien niet en soudet segghen, mijn afgoden hebben dese dinghen gedaen, ende mijn geghroefde, ende mijn gegoten godekens hebben dese dingen geboden.

* th. lange te voren

+ B

6

Siet, altemale dat hebdi gehoort, maer ghi en hebbet niet vercondicht, Ic heb v van doen voort aen, nieuwe dingen doen hooren, ^* ende si zijn bewaert) die ghi niet en wist.

* the. die verborgen waren

7

Nv zijn si ^* gescapen ende niet van doen), ende voor desen dach, ende ghi hebtse niet gehoort op dat ghi messcien niet en segt, siet, ic hebse ghekent.

* th. wat gheworden ende niet lange

8

Ooc en hebdise niet gehoort, noch gekent, noch van dier tijt en is v oore niet geopent, Want ic wiste dat ghi ^* ouertredende ouertreden) sult, ende van moeders liue heb ic v ouertreder geheeten.

* the. zeer ouertreden

9

Om mijns naems wille sal ic mijn toornige raserije verre doen ende met minen loue sal ic v ^* breydelen,) ⁺ om dat ghi niet en sout steruen.

* th. onthouden.

+ C

10

Siet, ic heb v beproeft ende niet als siluer, Ic heb v ^* vercoren) inden ouen der armoeden.

* thebre. beproeft.

11

Om minent twille, om minent twille sal ic dat doen, dat ic niet gheblasphemeert en worde, ende mijn eere en sal ic eenen anderen niet geuen.

12

Hoort mi Iacob ende Israel dien ic roepe, ic selue, ic ben die eerste, ick ben oock die laetste.

13

Ooc heeft mijn hant daertrijc gefundeert, ende mijn rechter hant heeft die hemelen gemeten, ic salse roepen, ende si sullen tsamen staen.

14

Ghi alle, wort vergadert, ende hoort, wie van hen heeft dese dingen vercondicht? Die HERE beminde hem hi sal sinen wille doen aen Babilonien, ende sinen arm aen die Chaldeen,

15

Ic ic heb gesproken ende hem geroepen, ic heb hem toegeleyt ende sinen wech is wijslijc gescict,

16

Coemt hier tot mi ende hoort dese dingen, want vanden beginne en heb ic niet int verborgen gesproken, vander tijt eert gesciede, was ic daer, Ende nv die HERE die God heeft mi gesonden, ende sinen gheest.

17

⁺Dit seyt die HEERE v verlosser die heylige van Israel, Ic ben die HEERE v God, leerende v orbaerlijcke dingen, regerende v inden wech ouer den welcken ghi wandelt.

+ D

18

Och oft ghi hadt aengemerct mijn geboden, uwen vrede soude als eenen stroom hebben ghemaect gheweest, ende uwe rechtuaerdicheyt ghelijck die vloet der zee.

19

Ende v zaet soude

[p. L2v]

hebben geweest gelijc dat sant, ende die spruyten ws buycs gelijc zijn steenkens, ten soude niet vergaen zijn, noch sinen naem en soude niet in twee gewreuen hebben geweest van minen aensichte.

20

Gaet wt van Babilonien, vliet vanden Chaldeen metter stemmen der verhueginge, vercondiget, laet dese dingen hooren, brenget dit te voorscijne, totten eynde der aerden toe, segt, die HERE heeft sinen knecht Iacob verlost,

21

Si en hebben niet gedorst in de woeste plaetse, doen hise wtleyde, hi heeft hen water vanden steen doen vloeyen, ende hi ^* sneedt) den steen, ende die wateren vloeyden.

* the. splittede.

22

Die ongoddelijcke en hebben gheenen vrede, seyt die HEERE.

§ Die woorden des soons totter kercken onder den naem der eylanden, daer hi seyt dat hi gesonden is totter salicheyt so wel der heydenen als der Ioden, Die vader spreect totten sone vanden bekeerden, God vertroost die kercke onder den naem van Sion, daer hi seyt, dat die geloouige van alle siden tot hem sullen vergadert worden.