De Vorsterman Bijbel

§ Dat .xlvi. Capittel.

1

⁺BEl is ^* gebroken) Nabo is ^* in twee gewreuen) haer afgods beelden zijn den dieren ende vee geworden, Vwe lasten met swaer gewichte tot vermoeitheit,

+ A

* thebre. ghebuycht

* the. gecromt

2

Si zijn ^* versmolten ende tesamen in twee gebroken) Si en moch-[kolom]ten den dragenden niet salichmaken, ende haer ziele sal in die gheuanckenisse ghaen.

* h. gecromt ende te samen ghebuycht

3

⁺Hoort ghi mi, Iacobs huys, ende alle ouerbleuene, des huys van Israel, die ^* van minen buycke gedragen wort, die gedragen wort van mijnder vrouwelicheyt.

+ B

* th. die ic van moeders buyc opgeladen, ende vander geboorten aen gedraghen heb, Dwelc ick noch doen sal, tot int ouderdom ende v dragen tot dat ghi grijs wort Ic salt doen ende v op mi nemen, ick sal v dragen ende daer van v brengen.

4

Totten ouderdom toe sal ic selue wesen, ende totter grijsheyt van ouderdom sal ic dragen, Ic hebt gedaen, ende ic salt liden, ende ic sal draghen, ende ic sal salich maken.)

5

Wien hebdy mi gelijc gemaekt ende gelijck geacht, ende mi geleken, ende gelijc gherekent?

6

ghi die te samen brengt dat gout, wter tasscen ende dat siluer in een wage weecht, den goutsmidt huerende, dat hi eenen God make ^* ende vallen neder ende bidden hem aen.)

* th. voor den welcken ghi nijcht ende aenbidt.

7

Si dragent op die scouderen, ende si dragen hem, ende setten hem in zijn plaetse, ende hi sal daer staen, hi en sal van zijnder plaetsen niet beweecht worden, Maer oock als si roepen sullen tot hem, so en sal hi niet hooren, vanden drucke en sal hise niet verlossen.

8

☞ Gedenct deses, ende wort bescaemt ghi ouertreders, keert weder totter herten.

9

⁺Ghedenct der eerster werelt, want ic ben God, ende daer en is gheen God meer, noch daer en is niemant gelijc ic,

+ C

10

vercondigende vant beginne, die laetste ende vanden beghinne die noch niet en zijn gesciet, seggende, minen raet sal staen, ende alle minen wille sal gescieden

11

Ic roep eenen voghel vanden oosten, ende den man mijns wils van verren lande, ⁺ ende ic heb ooc gesproken, ende ic salt ooc toebrengen, ic hebt geschapen, ic salt ooc doen.

+ D

12

Hoort mi, ghi harde van herten, die verre zijt vander rechtuaerdicheyt.

13

Ick heb mijn rechtuaerdicheyt na bi gedaen, si en sal niet verre zijn, ende mijn salicheyt en sal niet verbeyden, Ic sal gheuen in Sion salicheyt, ende in Israel, mijn eere.

§ Dat woort Gods tegen Babilonien, daer haer hoouerdie bewesen wordt, ende haer vernederinghe, ende verderuinghe.