De Vorsterman Bijbel

§ Dat .xlv. Capittel.

1

⁺DIt seyt die HERE tot minen gesalfden coninc Cyro, denwelcken ic bi zijn rechter hant greep, op dat ic die heidenen voor zijn aensichte onderworpe, ende die ^* ruggen der coningen sal ic doen keeren) Ende ic sal voor hen die dueren open doen, ende die poorten en sullen niet gesloten worden,

+ A

* th. lendenen der coningen ontgorde

2

Ick sal voor v gaen, ende ic sal de ^* gloriose der werelt vernederen) ic sal die metalen poorten in stucken wriuen, ende ic sal die yseren grendelen in twee breken.

* the. cromme weghen slecht maken

3

Ende ic sal v die verborgen scatten geuen, ende verborgen heymelicheden, om dat ghi weten sult, dat ick die HEERE si, die v roepe met uwen name, Israels God.

4

Om minen knecht Iocob, ende Israel minen wtuercoren ^* Ende ic riep v met uwen name, ic heb v geleken, ende ghi en kendet mi niet.)

* the. Ic heb metten name genoemt ende v eenen toenaem gegeuen, eer ghi mi kendet.

5

Ick die HEERE, ende daer en is gheen meer, buyten mi en is gheen God, Ic heb v gegordet, ^* ende ghi en kendet mi niet)

* the. eer ghi mi kendet

6

Om dat si weten souden, die vanden opganc der Sonnen sijn, ende die vanden onderganc, datter ^* geen god en is), behaluen, Ic die HERE, ende daer en is gheen meer.

* the. niet en is.

7

Ick make dat licht ende scheppe die duisternissen, ende make vrede, ende sceppe dat quaet, Ick die HEERE doe alle dese dinghen.

8

Ghi hemelen laet dauwe van bouen vallen ende die wolcken den rechtuaerdigen reghenen, ⁺ Laet die aerde opengedaen worden ende si groye den salichmaker, ende die rechtuaerdicheyt spruyte te samen, Ic die HERE heb hem gescapen,

+ B

9

Wee den ghenen die tegen sinen maker seit, dat scarf vander ^* aerden des lants Samos) Sal dat slijck sinen potbackere oock seggen, Wat doedy? ende v werc is sonder handen? ⁺

* th. pot aerden

+ § Sonder handen, dat is, uwe werc en is niet goet.

10

Wee dien die sinen vader seit, wat windi? ende der vrouween, Wat baerdy?

11

Also seyt de HERE die heylige van Israel ende zijn scepper, Vraget mi die toecomende dingen, ouer mijn kinderen, ende ouer dat werc mijnder handen gebiet mi,

12

Ic heb die aerde gemaect, ende ic sciep den ^* mensch) daer op, Ic, mijn handen hebben den hemel wtgherect, ⁺ ende ick heb alle sinen heyre gheboden.

* the. Adam

+ C

13

Ic heb dien verwect tot rechtuaerdicheyt, ende alle zijn weghen sal ick schicken, Hi sal mijn stadt timmeren, ende hi sal mijn gheuanghene wt laten, niet in wisselinghe ende niet in gheschencke, seyt die HERE der heyrscharen.

14

Dit seyt die HEERE, den ar-

[p. L1v]

beyt van Egypten, ende die coomanschap van Moorenlant, ende die hooge mannen van Sabaim sullen tot v ouer comen, ende si sullen uwe zijn Si sullen na v gaen, met die hantboeyen gebonden sullen si na v reisen, ende si sullen v aenbeden, si sullen v verbidden, God is alleen in v, ende sonder v en is gheen God.

15

Warachtelijc ghi zijt een verborgen God, God Israels salichmaker.

16

Si hebben hen gescaemt, ende alle dese zijn ooc beschaemt, die timmerluyden ende smeden der dwalingen gingen tsamen tot oneere.

17

Israel ghi zijt behouden inden HEERE midts eewige salicheyt, ghi en sult v niet scamen, noch niet beschaemt worden tot in die werelden der eewicheyt.

18

Want dit seyt die HEERE die schepper des hemels, hi God selue, die daerde scheppet ende maket, hi die is haer wercker, Hi en schiepse niet ^* te vergeefs) hi schiepse, dat si bewoont souden worden, ⁺ Ic de HERE, ende daer en is gheen ander meer. ☜

* th. woeste.

+ D

19

Ic en heb int verborgen niet gesproken ^* in) een doncker plaetse der aerden, ic en seide, Iacobs zade niet, Te vergheefs hebdy mi ghesocht, Ic ben die HERE die spreect de rechtuaerdicheyt, vercondigende gerechticheden.

* th. noch in

20

Vergadert v ende coemt, ende genaect te samen ghi ^* die behouden zijt wten heydenen, Si en wisten niet, die ophieuen dat hout van haeren ghehouwen afgod, ende bidden) den god, die niet salich en maect.

* th. vluchtige die uwe houtenne goden draget ende niet en verstaet ende aenbidt

21

Vercondicht ende genaect houdt ooc te gader eenen raet, Wie heeft dat doen hooren vanden beghinne, van doen aen vercondichde ic dat? En ben ic die HERE niet, ende daer en is geen ander God meer behaluen mi? een rechtuaerdich God, ende salichmakende, en is niet behaluen mi,

22

Keerdt v tot mi ende ghi sult salich zijn, alle eynden der aerden, want ic ben God, ende daer en is gheen ander meer.

23

Bi miseluen heb ic gesworen, wt minen monde sal een woort der rechtuaerdicheit wtgaen, ende ten sal niet wederkeeren, want mi sal alle knie gebuycht worden, ende alle tonghe sal sweeren.

24

^* Daerom sullen si inden HEERE seggen mi behoort toe rechtuaerdicheyt ende heerscappie, Si sullen) tot hem comen, ende si sullen alle beschaemt worden, die hem wederspannich zijn,

* theb. Mijn gherechticheyt ende starcheyt sal hi seggen heb ic alleen inden Heere, ende dye sal

25

Inden HERE sal gerechtuaerdicht, ende ghepresen worden alle Israels zaet.

§ Van die verderuinghe der afgoden, Godts des vaders woorden totten Ioden ende straftse ende roeptse weder van haeren afgoden ende belouet die salicheyt, door den sone.