De Vorsterman Bijbel

§ Dat .xxxij. Capittel.

1

⁺SIet een Coninc sal inder rechtuaerdicheyt regeren, ende die princen sullen zijn voor int oordeel.

+ A

[p. K4r]

2

Ende die man sal ^* zijn ghelijck een die verborgen is voor den wint, ende die die hem verborcht voor den stormen des onweders) ghelijck die beken der wateren inden dorste, gelijc die schaduwe der swaerder steenroetsen die in dat landt sonder watere wt steect,

* h. eenen yegeliken zijn ghelijc een toeultcht, voor den windt, ende eenen hoec voor den plasregen

3

Ende die ooghen der sienders en sullen niet verduysteren, ende die ooren der hoorender, sullen naerstelijck aenmercken.

4

Ende dat herte der sotten sal die konste verstaen, ende die tonghe der ^* stamelaers) sal haestelijck recht wt spreken.

* theb. lurghender

5

⁺Die onwijs is, en sal voortmeer gheen prince geheeten worden, ende die ^* bedriechlike) en sal niet meer een ^* ouerste) heeten.

+ B

* the. vrecke

* h. eerwaerdich

6

Want die sot, sal soete dinghen spreken, ende zijn herte sal onrechtuaerdicheyt doen op dat hi geueynstheyt volbrenghen mach ende spreken bedriechlicheyt totten HEERE, ende op dat hi die zielen des hongherengens wtmerghele, ende dat hi die lauinghe den dorstighen ontrecke.

7

^* Des bedriechelikens) vaten zijn die alder quaetste, Want hi selue sal die ghedachten bi een voeghen, om te verderuen die sachtmoedige, met die redene der luegenen, als hi den armen sprac doordeel,

* th. des vrecken

8

Maer waerlijc, die prince sal dencken dingen die eenen prince waerdich zijn, ende hi sal ouer die hertoghen staen.

9

Ghi rijcke vrouwen, staet op, ende hoordt mijn stemme ^* betrouwende) dochteren luystert na mijn wtsprake.

* th. sorgheloose

10

Na den dach ende dat iaer suldy verstoort worden ^* betrouwende) want dat wijnsniden is ontbroken, die vergaderende en sal voort meer niet comen.

* th. sorgheloose

11

Verwondert ghi rijcke vrouwen, wort verbaest, ghi ^* betrouwende) ontcleet v, ende ghi sult beschaemt worden Schort op uwe lendenen op uwe borsten,

* th. sorgheloose

12

schreyt ouer dat begheerlijcke lantschappe, ouer den vruchtbaren wijnghaert.

13

Ouer die aerde mijns volcs zijn ^* bramen) ende doornen gesteken, Hoe veel temeer ouer alle huysen der blijschappen der verhuegen der stadt.

* th. distelen

14

Want dat huys is verlaten, die menichte der stadt, is verlaten ^* duysternissen ende castijnghe zijn geworden ouer die speluncken inder eewicheyt,) blijschap der wilder Ezels zijn die weyden der kudden.

* th. die thorrens ende tbolwerck sullen eewige speluncken worden

15

Tot dat den gheest ouer ons wt worde gestort vander hoochten, Ende die woestine sal wesen in ^* Chermel,) ende Chermel sal tot warandtbossch gherekent worden.

* h. bouvelt

16

Ende in de woestine, sal dat oordeel woonen Ende die rechtuaerdicheit sal in Chermel sitten [kolom]

17

⁺☞ Ende dat werc der rechtuaerdicheyt sal vrede zijn, ende den dienst der rechtuaerdichey sal zijn, swighen, ende vriheit sal zijn inder eewicheyt.

+ D

18

Ende mijn volck sal in die schoonheyt des vreedts sitten, ende in die wooningen der betrouwenisse, ende in de rijcke ruste.

19

^* Maer den haghel inden nederganck des wouts, ende in die vernederinge sal die stadt vernedert zijn.)

* th. Ist dat haghelt, so salt toch neffens dwout afgaen, ende de stadt sal wel ondere inden gront ligghen

20

Salich zijt ghi, die zaeyende zijt, aen alle wateren, daer latende den voet des Os ende Ezels.

§ Hi spreect teghen Sennacherib ende coemt weder totter laetster geuanckenissen, Vanden ghenen die den HERE sien sullen.