De Vorsterman Bijbel

§ Dat .xxxi. Capittel.

1

⁺WEe den genen die neder dalen in Egipten om hulpe, hopende op die paerden, ende betrouwen op die wagenen, wanter vele is, ende op die reysenaers, want si zeer machtich zijn, Ende si en hebben niet betrout op den heyligen van Israel, ende den HERE en hebben si niet gesocht.

+ A

2

Maer hi die wijs is, heeft dat quaet toegebracht, ende hi en heeft zijn woorden niet wech genomen, ende hi sal tegen der boosen huys opstaen, ende tegen dat behulp der genen die onrechtueerdicheyt doen.

3

Die Egiptenaer is een mensce, ende niet God, ende haer paerden vleesch, ⁺ ende niet een geest, ende die HERE sal zijn hant wtrecken, ende die hulper sal vallen, ende dien hulpe ghedaen wort, sal vallen, ende si sullen altesamen verdoruen worden.

+ B

4

Want dit seyt die HERE tot mi, gelijc als wanneer den leeu ende den iongen leeu ouer sinen roof briescht, ende al coemt die menichte der harders te gemoet tegen hem, van haerder stemmen niet verscricken en sal, ende van haerder menichte niet verscroomt en sal worden, also sal die HERE der heyrscharen nederdalen, op dat hi stride, opten berch Sion ende op sinen hueuele.

5

⁺Gelijc vliegende vogelen, also sal die HERE der heyrscaren Ierusalem bescermen, bescermende ende verlossende, doorgaende, ende verlossen.

+ C

6

Wort bekeert also vele als ghi int diepe zijt gedaelt midts afuallinge, ghi kinderen van Israel

7

Want in dien dage sal een yegelijc verworpen die afgoden zijns siluers ende dafgoden zijns gouts, die welcke uwe handen v tot sonden hebben gemaect.

8

Ende Assur sal vallen metten swaerde, niet des mans ende tswaert niet eens menscen, sal hem verslinden, ⁺ Ende hi sal vlieden niet vanden aensichte des swaerts, ende zijn iongers sullen tzijnsbaer wesen.

+ D

9

^* Ende zijn starcheyt sal van veruaernisse doorgaen) ende zijn princen die veruaert zijn, sullen vlieden, seyt die HEERE, wiens vier in Sion is, ende sinen schoorsteen in Ierusalem.

* h. van vrese sal hi in sinen steen cruypen

§ Van Christus toecoemst ende der Apostelen, Ende vanden rijcken vrouwen die geuangen sullen worden ende vernielt ende beschaemt sullen worden