De Vorsterman Bijbel

§ Dat .xxx. Capittel.

1

⁺WEe den kinderen die ^* verlaters) zijt seit die HERE, dat ghi eenen raet makende zijt ende niet wt mi, ende dat ghi een webbe scheert ende niet door minen geest, dat ghi vergaderen sout die een sonde op dander sonde.

+ A

* th. eygen sinnich.

2

Die wandelt, dat ghi neder dalen sout tot Egipten, ende ghi en hebbet minen mont niet geuraecht, hebbende hope van hulpe, van Pharaos stercte, ende hebbende betrouwen in Egyptens scaduwe.

3

Ende Pharaos stercte sal v [kolom] tot scanden zijn, ende dat betrouwen in Egiptens scadue, tot oneeren.

4

⁺Want in Taphnis waren uwe princen, ende uwe boden genaecten tot Chanes toe.

+ B

5

Si zijn alle bescaemt geworden ouer dat volc, dwelc hen niet baten en mocht, Si en waren niet tot hulpe, noch tot eenige nutticheyt, maer tot scanden ende verwiten.

6

☞ Den last der beesten vant zuyden lant, inden lande der benautheyt, ende der noot, de leeu ende die leeuwinne daer wt, die Basiliscus, ende die vliegende adere, die op die scouderen der vuelens, haer rijcdommen dragen, ende op der kemelen bulte, haeren scat, totten volcke dat hen niet baten en sal moghen.

7

Egypten sal te vergeefs ende ydelijc helpen, daerom riep ic hier op, Het is alleen houaerdie, Rust nv, als ghi daer in comen zijt,

8

so scriuet op ^* buecken hout), ende groeuet naerstelijc in eenen boec, ende tsal totten wtersten dage zijn tot een getuigenisse tot inder eewicheyt.

* the. een tafelken

9

☞ Want dat is een volc tot gramscappen verweckende, ende ^* luegenachtige) kinderen, ende kinderen, die die wet des HEREN niet en willen hooren.

* th. trouweloose.

10

⁺Si die seyden, den aenscouwers, en wiltse niet aenscouwen, Den sienden, en wilt ons gheen rechte dingen sien, Spreect ons behaechlike dingen, siet ons dwalingen,

+ C

11

Haelt van mi den wech, Neyget van mi den pat, Laet rusten van onsen aensichte die heylighe van Israel.

12

Daerom seyt dit die heylige van Israel, om dat ghi hebt verweten dit woort ende hebt gehoept ^* in valsce besculdingen) ende opten oploop, ende hebt daer opgestaen,

* the. op ghewelt.

13

Daerom sal v dese onrechtuaerdicheyt zijn, gelijc die scueringe vallende gesocht inder hooger mueren, want haer vernielinge sal snellijc onuersiens comen, alsment niet en sal hopen,

14

Ende si sal gemindert zijn, gelijc eens potbackers scherf gebroken wort, met een starcke brekinge, ende het en sal niet een scerfken geuonden worden, daermen een vierken vanden brande in drage oft een weynich waters wt den putte mede scheppe.

15

Want dit seyt die HERE die heylige van Israel, Ist dat ghi ^* wederom coemt, ende rustet) so suldi salich zijn, in swigen ende in hope sal v starcheyt zijn, ende ghi en hebt niet gewilt

* th. stille weset ende rustet.

16

⁺Ende ghi seyt, Neen, maer wi sullen totten paerden vluchten, daerom suldi vlieden, ende wi sullen op die snelle climmen, daerom sullen die v veruolgen, snel wesen.

+ D

17

Duysent menscen vant aensichte der veruaertheden eens, ende vant aensichte der veruaertheden van viuen, suldi vlien, tot dat ghi verlaten zijt gelijc eenen mastboom des scips, op dopperste des berchs, ende gelijc een teeken op den hueuelen.

18

Ende daerom verwacht die HERE, dat hi uwer ontferme. Ende daerom sal hi verheuen worden v sparende Want die HE-

[p. K3v]

RE is een God des oordeels, salich zijn si alle die hem verwachten.

19

Want ghi volc van Sion sult woonen in Ierusalem, ^* weenende en suldi niet weenen, ontfermende sal hi v ontfermen, totter) stemmen ws roepens, terstont als hijt hoort, sal hi v antwoorden.

* the. ende niet altoos weenen gewis sal hi hem ontfermen ouer die.

20

Ende die HERE sal v ^* een benaudt broot) geuen, ende ^* een cort water), ende hi en sal uwen leeraer voort meer niet wech doen vliegen, ende uwe oogen sullen uwen meester sien,

* theb broot des anxts.

* the. een water der beswaringen

21

Ende uwe ooren sullen dat woort ws vermaenders hooren, achter v seggende, ⁺ Dit is den wech, gaet daer in, ende en keert niet af ter rechter oft ter slincker hant

+ E

22

Ende ghi sult ^* besmetten) die platen der gegroefder afgoden ws siluers, ende ^* dat cleet des gegoten afgoden ws gouts, ende ghi sultse verstroyen, gelijc een onsuyuerheyt van een maencranckige vrouwe) Gaet wt, suldi hem seggen.

* th. ontwijen

* th. den gulden lijfroc uwer afgoden, ende ghi sultse afsceyden ghelijck een bloot wijf.

23

Ende sal uwen zade regen gegeuen worden, waer ghji in die aerde sult zaeyen, ende dat broot der vruchten des lants, sal zijn vet ende zeer vruchtbaer. In dien dage sal ^* dat lam) in uwe erffenisse breede weyden vinden.

* thebr. tvee

24

Ende v stieren ende vuelens der ezelen bouwende dat lant sullen gemengt voeder eten, van gerste gezijct inden dorschuloer gewannet is.

25

Ende op alle hoogen berch, ende op alle verheuen hueuel, sullen loopende water riuieren zijn, in den dach des ^* dootslaens van meninghe), gelijc die thorrens vallen.

* th. grooten slachs

26

Ende dat licht der Manen sal zijn gelijc dat licht der Sonnen, ⁺ ende tlicht der Sonnen sal seuenuoudich zijn, gelijc dat licht der seuen dagen, inden dage, inden welcken die HERE, die instucken wriuinge zijns volcs, verbinden sal, ende den slach haerder wonden genesen sal.

+ F

27

Siet, den naem des HEREN coemt van verre, zijn ^* verbolgentheyt) is bernende, ende ^* swaer om te dragen), zijn lippen zijn veruult met veronwaerdinge, ende zijn tonge is gelijc een verslindende vier.

* the. aengesicht.

* the. wel geladen met last.

28

Ende sinen ^* geest) gelijc een oueruloeyende beke totten midden des hals, om die heydenen te vernielen, ende den thoon der dwalinge, die in die wangen der volcken was.

* the. adem

29

^* V sal een liedeken zijn gelijc een stemme vant geheylichde hoochtijt) ende die blijscap des herten, gelijc des genen die wandelt met een fluyte, dat hi ingae totten berch des HEREN totten starcken van Israel.

* the. Dan suldi singhen ghelijck in eenen nacht daermen een feeste inne heylicht

30

Ende die HERE sal die heerlicheyt zijnder stemmen doen hooren, ende die ^* veruaernisse) zijns arms vertoonen int dreygen zijns verbolgentheyts, ⁺ ende de vlamme des verslindende viers sal slaen in stormen ende hagel steenen.

* h. nederlatinghe

+ G

31

Want Assur sal verscricken van des HEREN stemme metter roeden geslagen wesende.

32

Ende den doorganc der roeden sal vast gefundeert zijn, den welcken die [kolom] HERE op hem sal doen rusten, Met tamboeren ende met harpen, ende sonderlinge oorlogen sal hi tegen hen vechten.

33

Want Tophet is van ghistere bereit, vanden coninc is si bereit, diepe, ende breet, haer voetsel is vier ende veel houten, Dat gheblaes des HEEREN ontsteectse ghelijck een zolpher beke.

§ Hi straft die meer toeulucht namen totter hulpen van deser werelt dan totter godliker, Ende den genen die berou hadden belouet hi die barmherticheyt Gods, Vanden dage des oordeels.