De Vorsterman Bijbel

§ Dat .xxxiij. Capittel.

1

⁺WEe v, die rooft, en sult ghi ooc niet berooft worden? Ende ghi die versmaet sul ghi ooc niet versmaet worden? Als ghi volbracht sult hebben uwe beroouinghe, dan sult ghi oock berooft worden, ende als ghi mat wesende, aflaten sult vant versmaden, sult ghi vesmaet worden.

+ A

2

HEERE, ontfermt onser, want v hebben wi verwacht, zijt onsen arm smorghens vroech, oock onse salicheyt inden daghe der bedructheyt.

3

Vander stemmen des Enghels vloden die volcken, van uwer verhooginge zijn de heydenen verstroeyt.

4

Ende uwe roouen sullen vergadert worden gelijcmen vergadert die ^* sprinchanen,) gelijck als die grachten van hen veruult zijn.

* th. vruchtcappers

5

⁺Die HEERE is groot ghemaect, want hi woonde int hooge Hi heeft Sion veruult met oordeel, ende rechtuaerdicheyt.

+ B

6

Ende tghelooue sal in uwen tijden zijn, rijcdom, salicheit, ende wijsheit ende konste, die vreese des HEEREN, si is sinen schat.

7

Siet, die sienders sullen daer buyten roepen, die ^* Enghelen) des vredes sullen bitterlijck weenen.

* the. boden

8

Die weghen zijn verwoest, ^* die doorgaende den wech, heeft gherust,) Tverbont is ghebroken, hi heeft die steden wech gheworpen, hi en heeft die menschen niet gheacht.

* th. niemant en wandelt meer

9

De aerde truerde ende is verquolen, Libanus is bescaemt geweest, ende is vuyl geworden, Saron, ⁺ is geworden gelijc een woestine, ende Basan ende Carmelus zijn te samen geschuddet.

+ § Saron, dat is, een effene.

10

Nv sal ic opstaen, seyt de HEERE, nv sal ick verhoocht worden, nv sal ick verheuen worden.

11

Ghi sult ontfanghen die hitte, ghi sult stoppelen baren, uwen gheest sal ghelijck een vier v verslinden.

12

Ende die volcken sullen ^* zijn als assche van den brande, die vergaderde doornen sullen metten vier verbrant worden.)

* the. eenen kalcbrandt ende ghelijck wtgetrocken doornen verbrandt worden

13

Hoort, ghi verre gesetene, wat ic gedaen

[p. K4v]

hebbe, ende ghi ghebueren, bekennet mijn starcheyt.

14

Die sondaers zijn in Sion veruaert gheworden, Die scroomighe heeft die gheueynsde hypocriten beseten.

Wie van ^* v) sal met dat verslindende vier moegen woonen? wie wt ^* v) sal woonen met die eewige hitte?

* thebr. ons

* thebr. ons

15

⁺Die wandelt in rechtuaerdicheden, ende spreect die waerheyt, die wech worpt ghiericheyt wt valsche beschuldinge ende wt schuddet zijn handen van allen gauen, stoppende zijn ooren, dat hi gheen bloet en hoore, ende sluytende zijn ooghen toe, dat hi tquaet niet en sie.

+ C

16

Dese sal in die hoochte woonen, die borchten der steenen zijn, zijn hoochte, hem is broot gegeuen, zijn wateren zijn ghetrouwe.

17

Sijn ooghen sullen den coninck sien in zijn schoonheyt, ende si sullen tlant van verre sien.

18

V herte sal vreese peynsen Waer is die schriftgheleerde? ⁺ Waer is die ^* weghende die woorden des wets?) Waer is die ^* leeraer der cleynder kinderen?)

+ i.corin. i.d

* theb. schatmeester

* the. cancellier

19

Ghi en sult dat ^* onwijs) volck niet sien, dat volck der dieper redenen, alsoo dat ghi niet en moecht verstaen die ^* behendicheyt) zijnder tongen, daer gheene wijsheit inne en is.

* theb. machtich

* th. stamelinghe

20

Siet op Sion, die stadt onser feesten, v ooghen sullen Ierusalem sien, ⁺ die rijcke wooninghe, den Tabernakel die niet ^* ouerghedraghen) en sal moghen worden, zijn naghelen en sullen inder eewicheyt niet wech ghenomen worden, ende alle zijn koorden en sullen niet ^* gheschoert) worden.

+ D

* the. verandert

* the. opghewonden

21

Want alleene is daer onse ^* grootdoende HEERE Godt) die plaetse der stroomen, die riuieren ruyme, ende openbaer, daer door en sal gheen schip des roeyers ghaen, ende gheen geweldich schip en sal niet daer door gaen

* the. starke HEERE

22

☞ Want die HEERE is onse rechter die HEERE is onse wetgheuer, die HEERE onse coninck, hi selue sal comen, ende ons salich maken ☜

23

Vwe koorden zijn wtghespreyt, Maer si en sullen niet machtich zijn, Also sal uwen mastboom zijn, dat ghi dat teeken niet wtstrecken en moecht, Dan sullen wtgedeelt worden, die bueten van vele roouen, die cruepelen sullen den roof wech nemen,

24

Noch die ghebuere en sal niet seggen Ick ben verquolen, tvolc datter in woont, van hem sal de ongerechticheit genomen worden.

§ Van dat oordeel ouer dat Ioetsche landt, hoe dat selue landt verwoest ende vernielt sal worden.