De Vorsterman Bijbel

§ Dat .xxiiij. Capittel.

1

⁺SIet, die HEERE sal daertrijc naect maken ende verderuen, ende hi sal haer aensicht ^* quellen) ende die inwoonders verstroyen.

+ A

* theb. crommen

2

Ende gelijck dat volck sal zijn, so sal die priester zijn, Ghelijck die knecht, alsoo oock zijn heere, Gelijc die dienstmaerte, also ooc haer vrouwe, Gelijc die cooper alsoo die vercooper, Gelijck die woeckenaer, also diet gheleent gelt ontfanct, Die maent, also die sculdich is.

3

Daertrijck sal met verquistinghe verquist worden, ende met beroouinge salt berooft worden, Want die HEERE heeft dat woort ghesproken.

4

Daertrijck heeft ghetruert, ende is afgeuallen ende is cranck gheworden, die werelt is nedergeuallen, die hoochheyt des volcs der aerden is cranc geworden.

5

Ende die aerde ^* is verslagen van) haeren inwoonders, Want si hebben die wetten ouergetreden, ⁺ si hebben dat recht verandert, si hebben dat eewighe verbont verstroyt.

* theb. heeft haer gheueynst

+ Dat is, si is vruchtbaer gescenen

6

☞ Daerom sal die vermaledijnghe die aerde verslinden, ⁺ ende die daer in woonende zijn, sullen sondigen, Daerom sullen daer inwoonders rasen, ende daer sullen luttel menschen gelaten worden.

+ B

7

^* Dat wijngaertsniden) is droeuich gheweest, den wijngaert is cranck geworden alle die verblidende van herten, hebben gesucht.

* thebr. Die most

8

Die blijschap der tamboeren heeft gherust, dat geluyt der verhuegender hielt op, die blischap der harpen, heeft geswegen metten liedeken.

9

En sullen si den wijn niet drinck? Den dranc sal bitter zijn, den genen die dien drincken?

10

Die ^* stadt der ydelheit) is te samen ghewreuen, alle huys is ghesloten, om datter niemant in en ghaet.

* the. woeste stadt

11

☞ Die roepinge sal ouer den wijn inden straten zijn, alle blijscap is verlaten, die blijschap [kolom] der aerden is wech geuoert.

12

⁺In die stadt is woesticheyt gelaten, Iammer sal die poorten verdrucken.

+ C

13

Want dese dingen sullen int midden des aertrijcs zijn, int middel der volcken, Gelijck dat een weynich oliuen, die ouerbleuen zijn, ghesuyuert worden vanden olie, ende wijndruyuen, als die wijnsnidinghe gheyndt is.

14

Dese sullen opheffen haer stemme, ende si sullen louen ^* als die HEERE met eere verheuen sal wesen, sullen si neyen vander zee.)

* th. ende inder heerlicheit des Heeren verhuegen vant westen

15

Daerom verheft met ^* eeren) den HEERE in die leeringhen, in die eylanden der zee den naem des HEREN des Gods van Israel.

* theb. Vrim

16

Vanden eynden der aerden hebben wi gehoort lofsangen, te eeren den rechtuaerdigen, Ende ic seide ^* Mijn secrete heimelicheit is mi, mijn secrete heymelicheyt is mi, Wee mi) Ouertredende ouertraden si, ende si zijn ouergetreden metter ouertredinghe des ouertreders.

* th. wee mi hoe ben ic so magher hoe ben ic so magher

17

Veruaernisse ende gracht ende stric ouer v die een inwoonder der aerden zijt. ⁺

+ Ie. xlviij.g

18

Ende het sal zijn, Die vander stemmen der veruaernisse vliet, sal inden gracht vallen, ende die vanden middele des grachts hemseluen behelpen sal willen, ⁺ die sal in den stric geuaen worden want die venstren zijn open ghedaen vander hoochten, ende die fundamenten des aertrijcs sullen beweecht worden.

+ § Vensteren, dat is, die wolcken brekinghe

19

⁺Die aerde sal midts brekinge ghebroken worden, die aerde sal met intweewriuinge in twee gewreuen worden,

+ D

20

Die aerde sal met beweginge beweget worden. Met iaginge sal die aerde geiaecht worden, gelijc een droncken, ende sal wech genomen worden, ghelijc een hutteken van eender nacht, ende haer onrechtuaerdcheit salse verswaren, ende si sal vallen, ende en sal niet meer opstaen.

21

Ende het sal zijn in dien dage dat die HERE besoecken sal, ouer dat heyr des hemels in die hoochte, ende ouer die coninghen der aerden, die welcke opter aerden zijn.

22

Ende si sullen verghadert worden gelijc in die vergaderinge eens busselkens in eenen kuyle, ende si sullen daer inden kercker worden besloten, ende si sullen na veel daghen besocht worden.

23

Ende die Mane sal haer schamen, ⁺ ende die Sonne sal beschaemt worden, als die HEERE der heyrcharen sal regeren opten berch van Sion ende in Ierusalem, ende als hi met eeren sal verheuen worden voor dat aensichte zijnder ouderen.

+ § Bescaemt dat is, duyster worden

§ Die Propheet danct God van sinen wercken, vanden hemelschen gheselschappe, Van die vernielinghe des doots, ende van die brekinghe des Duyuels.