De Vorsterman Bijbel

§ Dat .x. Capttel.

1

⁺WEe die boose wetten instellen, ende schrijuende hebben gheschreuen onrechtuaerdicheden,

+ A

2

op dat si verdrucken souden die armen inden oordeele, ende ghewelt doen souden der saken der ootmoedighen mijns volcs, op dat die weduwen souden zijn haeren roof, ende dat si die weesen beroouen souden.

3

Wat wilt ghi doen, inden daghe der besoeckinghe, ende der katiuicheyt die van verre comen sal? Tot wiens hulpe sult ghi vlieden, ende waer sult ghi v heerlicheyt laten?

4

Op dat ghi niet ghebuycht en wort onder die banden, ende met den verslaghenen niet en valt? Van allen desen en is zijn toornighe verbolghentheyt niet afghekeert, maer zijn hant is noch wtghestrect.

5

Wee Assur, want hi selue is die roede mijnder verbolghentheyt, ⁺ ende den stock, ☞ in haere hant is mine veronwaerdicheyt.

+ B

6

Ick sal hem seynden totten bedriechlijcken volcke, ende ick sal hem ghebieden teghen dat volck mijnder gramschappen, dat hi den roof rooue, ende die plonderinghe plondere, ende dat hi dat stelle tot een vertredinghe, ghelijck dat slijck der straten.

7

Ende hi en sal also niet dencken, ende sine herte en sal also niet wanen, ☞ maer zijn herte sal wesen om in twee te wrijuen, ende om doot te slaen, niet luttel Heydenen.

8

Want hi sal segghen,

9

En zijn mijn Princen niet alle te samen Coninghen?

⁺ En is Chalano niet ghelijck Charkamis? is Arpad oock niet ghelijck Hemath? is Damascus oock niet ghelijck Samarien?

+ C

10

Ghelijck mijn hant die Conincrijcken des afgods gheuonden heeft, also sal hi oock vin-[kolom]den die ghelijckenissen der beelden van Ierusalem ende Samarien.

11

En sal ick Ierusalem ende haeren gheroofden beelden niet doen, ghelijck ick Samarien ende haeren afgoden ghedaen heb? ⁺

+ § Verstaet dat dan dat werck des coninx van Assyrien.

12

Ende het sal zijn wanneer die heere alle zijn werck sal volbracht hebben aenden berch van Sion, ende in Ierusalem, also sal ick besoecken ouer die vruchte der grootheyt des herten des Conincs van Assyrien, ende ouer die eere der hoocheyt zijnder ooghen.

13

Want hi heeft gheseyt, ☞ Door die crachte mijnder hant heb ick dat ghedaen, ende in mine wijsheyt heb ict verstaen, ende ick nam die palen der volcken wech, ende ick beroofde haer ^* princen,) ende ick trecte die sittende waren int hooch af, als een machtighe.

* the. koren kisten.

14

Ende mijn hant vont die stercte der volcken, ⁺ ghelijck eenen nest, ende ghelijckerwijs die eyeren die verlaten zijn vergadert worden, also heb ick alle dat lant vergadert, ende daer en was niet dat den vloghel roerde, ende den ^* mont) open dede, ende die ^* ruynede.)

+ D

* th. beck.

* th. ghepijp gelaten had

15

Sal die bijl oock beroemen teghen den ghenen die daer mede houwet? oft sal die saghe oock verheuen worden teghen den ghenen van welcken si ghetrocken wort, ☞ Alleleens oft een roede verheuen werde teghen den ghenen diese ophief, ende oft verheuen werde den stock, die sekerlijck hout is.

16

Daerom sal die heerschapper die HERE der heyrscharen, magherheyt seynden op zijn vette, ende onder zijn heerlicheyt aenghesteken, sal hi verbranden, ghelijck met verbarninghe des vyers.

17

Ende Israels licht sal tot vyer zijn, ende zijn heylighe totter vlamme, ende zijn ^* doornen ende bramen) sullen ontsteken ende verblint worden in eenen daghe.

* the. doornen ende distelen

18

Ende die eere zijnder bosschagien ende ^* carmeli) sal vanden ^* zielen totten vleesche) toe ⁺ verteert worden, ende sal zijn vluchtich van veruaertheden.

* the. bou velts

* th. luyden ende vee.

+ E

19

Ende die ouerbleuene der boomen zijns wouts, sullen om die luttelheyt ghetelt worden, ende een kint salse moghen scrijuen.

20

Ende het sal in dien daghe zijn, dat douerblijfsel van Israel, ☞ ende die vluchtighe, ende Iacobs huys hem niet voorder meer verlaten en sal op den ghenen die hem slaet, maer het sal stuenen op den heylighen HEERE van Israel inder waerheyt.

21

Dat ouerblijfsel sal bekeert worden, dat ouerblijfsel, segghe ick van Iacob, tot God den starcke.

22

Alwaer v volck o Israel, ghelijck dat zant byder zee, so en sal maer dat ouerblijfsel wederomme keeren wt hen, Die afghecorte volbrenginghe, sal oueruloeyen rechtuaerdicheyt.

23

Want die heerschapper die HERE der

[p. I5r]

heyrscharen, ⁺ sal een voleyndinghe ende afcortinghe maken, int middel alle der aerden.

+ Rom. ix.f.

24

⁺Daerom seyt die HEERE die God der heyrscharen, en wilt niet vreesen, mijn volck, bewoonder van Sion, van Assyrien. Metter roeden sal hi v slaen, ende hi sal sinen stock ouer v heffen ^* inden wech van Egypten.

+ F

* the. op die manier van Egypten, Want tis noch om een weyniger dan weynich te doen

25

Want noch een weynichsken ende een weynichsken,) Ende mijn veronwaerdinghe sal voleynt worden, ende mijn verbolghen toornicheyt ouer haer misdaden.

26

Ende die HEERE der heyrscharen sal die gheessel ouer hen verwecken, ⁺ ghelijck in die plaghe van Madian, aenden steen Oreb ende zijn roede, ^* ouer die zee, ende salse heffen inden weghe van Egypten.)

+ Iudi. vij.g

* h. sal hi ouer hen verheffen, ghelijc hi ouer die zee, ende in Egypten verheuen heeft.

27

Ende het sal in dien daghe zijn, dat sinen last van uwer schouderen afghenomen sal worden, ende zijn iock van uwen necke, ende dat iock sal veruuylen ^* van dat aensichte der olijen.)

* h. van vette

28

Hi sal comen in Aioth, hi sal doorgaen in ^* Magron) bi Machmas sal hi ^* beuelen zijn vaten.

* h. migron

* th. monsteren, zijn getuygen sullen ouer die hauen comen in onse herberghe Gibaa.

29

Si doorghinghen haestelijck loopende, Gabaa is onsen stoel,) Rhama schroemde, Sauls Gabaath vluchte.

30

Neyet met uwer stemmen, ghi dochter van Gallim, Aenmerct Laisa, arme wijfken Anathoth.

31

Mademana is wechghegaen, ⁺ ghi bewoonders van Gebim wort ghesterct.

+ G

32

⁺Tis noch eenen dach datmen in Nob sal staen, so sal hi zijn hant beweghen tegen den berch der dochteren van Sion, den hueuele van Ierusalem.

+ C

33

Siet, die heerschapper die HEERE der heyrscharen, sal ^* dat flesken) breken met veruaertheden, ende die hooghe van lengden sullen afghehouwen zijn, ende die hooghe sullen vernedert worden.

* th. den tack

34

Ende die dicten der bosschagien sullen metter bylen wtghehouwen worden, ende Libanus ^* metten boghen sal) vallen.

* th. door den stercken.

§ Van Christus gheboorte, ende vanden Christenen volcke Vanden lijden Christi. Ende van die bekeeringhe der ouerbleuenen van Israel. Ende vanden ghelooue der Heydenen.