De Vorsterman Bijbel

§ Dat .ix. Capttel.

1

⁺INden eersten tijt, is ghelicht dat lant Zabulon ende dat lant Nephthalim, ende ten laetsten is ^* verswaert gheworden) den wech der zee, ouer die Iordane van Galileen der Heydenen.

+ A

* th. heerlijc ghemaect.

2

Dat volck dat wandelende was in duysternisse, sach een groot licht, den ghenen die inden lande der schaduwe des doots woonende zijn, hen is dat licht opghegaen.

3

Ghi hebt tvolck vermenichfuldicht, ende ghi en hebt die blijschap niet vermenichfuldicht, si sullen verblijden voor v, ghelijck die hen verblijden inden oogst, ghelijck hen verblijden die victoriose verwinners, wanneer si den buet wtdeelen.

4

Want dat iock zijns lasts ende die roede zijnder schouderen, ende dien schepter zijns verschatters hebt ghi ^* verwonnen,) ghelijck inden daghe Madian. [kolom]

* h. gebroken

5

Want alle gheweldighe roouinghe is met gheruchte, ⁺ ende dat bloedighe cleet sal verbrant worden, ende een spijse des vyers wesen

+ B

6

Want een cleyn kint is ons gheboren, ende een sone is ons ghegheuen, ☞ ende die heerschappie sal op zijn schouderen zijn, ende sinen naem sal, wonderlijck, gheheeten worden, een raetsheere, God, sterck, een vader der toecomender werelt, een prince des vreets.

7

Sijn heerschappie sal vermenichfuldicht worden, ☞ ende zijns vreets en sal gheen eynde wesen, op Dauids Conincs stoel, ende op zijn rijck, dat hijt vast make, ende dat hi dat sterck make met oordeel ende in rechtuaerdicheyt, van nv tot inder eewicheyt. Die vreeselijcke liefde des HEEREN der heyrscharen sal dit doen.

8

Die HEERE sant een woort in Iacob, ende het viel in Israel.

9

⁺Ende dat gheheel volck van Ephraim salt weten, ende die tot Samarien woonen in hoouaerdicheyt, ende in grootheyt des herten, segghende.

+ C

10

Die tichel steenen zijn gheuallen, maer wi sullen met effenen viercanten steenen timmeren, die wilde vijchboomen hebben si afghehouwen, ende die Cederboomen sullen wi daer stellen.

11

Ende die HEERE sal verheffen die vianden Razin ouer hem, ende sal zijn vianden in eenen oploopende gherucht ende strijt verkeeren.

12

Syrien vanden Oosten deele, ende die Philistijnen vanden Westen, ende si sullen Israel met gheheelen monde verslinden.

In allen desen en is zijn verbolghen toorne niet afghekeert, maer zijn hant is noch wtghestrect.

13

Ende dat volck en is niet wederomme ghekeert, ☞ totten ghenen diet sloech ende den HEERE der heyrscharen en hebben si niet ghesocht.

14

Ende die HERE heeft afghehouwen van Israel, dat hooft ende den steert, den ^* buygher ende arch quaetmaker) beyde op eenen dach.

* the. stock ende tack.

15

Die lanck leuende ende die eersame, hi selue is dat hooft ende die Propheet lueghenen leerende, is den steert.

16

Ende die dit volck salich maken sullen, ☞ zijn verleyders, ende die salich gheseyt worden, ⁺ zijn van bouen neder ghestooten.

+ D

17

Daerom en sal die HERE ouer zijn ^* ionghelinghen) gheen wellusticheyt hebben, ende zijnder weesen ende zijnder weduwen en sal hi niet ontfermen, want een yeghelijck van hen is een ⁺ hypocrijt, ende schalck, ende metten monde spreect hi sotheyt. In allen desen en is zijn verbolghen toorne niet afghekeert, ☞ maer sine hant is noch wtgestrect. ^* Ende dat volck en is niet wederghekeert totten ghenen diet sloech.)

* th. wtghelesene.

+ § Hypocrijt een geueynsde

* ten is niet int heb.

18

Want die ongodlicheyt

[p. I4v]

is ontsteken ghelijck vyer ^* het sal die bramen ende doornen) verslinden, ^* ende het sal die dicten der bosschagien aensteken, ende sal te samen worden ghewonden in die houaerdicheyt des roocs.)

* th. dwelck distelen sal

* h. si moeten hooch ouer hen inden roock daer af varen

19

Dat lant sal ^* verstoort) worden door die verbolghentheyt des HEEREN der heyrscharen, ende dat volck sal worden ghelijck spijse des vyers, Een man en sal sinen broeder niet sparen,

* th. verduystert.

20

ende hi sal ^* wijken) tot die rechter hant, ende sal hongheren, ende eten op die slincker hant, ende en sal niet versaet worden, ☞ een yegelijck sal dat vleesch zijns arms verslinden. Manasse sal Ephraim verslinden, ende Ephraim Manasse, die selue tsamen teghen Iuda,

* th. snijden.

21

In allen desen en is sinen verbolghen toorne niet afghekeert, maer zijn hant is noch wtghestrect.

§ Die dreyghinghe teghen die ghene die die arme ende weduwen verdrucken. Ende hi prooheteert teghen Sennacherib, ende beschrijft zijn houaerdicheyt, ende vanden ouerbleuenen van Israel, ende van die vercortinghe, ende van dat lijden Christi.