De Vorsterman Bijbel

§ Dat .xlv. Capittel.

1

⁺MOses van Gode ende den menschen bemint wiens gedachtenisse in gebenedijnghe is.

+ A

2

Hi maecte hem gelijc inder heyligen eeren ende hi maecte hem groot in de vreese der vianden, ende in sinen woorden versaechte hi die wonderlicheden.

3

Hi maecte hem heerlick in dat aenscouwen der coningen, ende hi geboot hem voor sinen volcke, ende hi toonde hem zijn eeren.

4

In zijn gelooue ende sachtmoedicheit maecte hi hem heylich, ende vercoos hem wt alle vleesch.

5

Hy hoorde hem ende zijn stemme, ende hi leyde hem in die wolcke.

6

Ende hi gaf hem een herte totten geboden ende die wet des leuens ende der onderwisingen Iacob zijn testament te leren, ende Israel zijn oordelen..

7

Hi maecte Aaron sinen broeder hooch ende hem ghelijc vanden gheslachte Leui.

8

⁺Hi stelde hem eem eewighe testament, ende hy gaf hem die priesterscap des volcs, ende hi maecte hem salich inde eere,

+ B

9

ende omgorde hem metten gordel der gerechticheit, ende hi dede hem tcleet der eeren aen, ende hy cleede hem metten vaten der duecht,

10

behaegelike nedercleederen, ende den lijfrock maecte hi hem. Ende gorde hem met veel gulden bellekens al om,

11

om te verluyden in sinen ganc, tgeluyt te doen hooren inden tempel, den kinderen zijns volcs tot een gedachtenis.

12

Hy gaf hem een cleet eens wisen mans, gewrocht werck van goude, ende gheel side ende scharlaken,

13

het werc eens constenaers, van roode side ghewrocht, met costelike paerlen in goude ghegraeft, het werck eens steenmeesters tot een ghedachtenisse, na den gheslachten der kinderen van Israel.

[p. G8v]

14

Een gulden croone op sinen miter, wt ghedruct met eenen teeken der heylicheit, ende die glorie der eeren, ende dat werck der cracht, verciert wt der begeerten der ooghen.

15

Alsodanighe schoone dinghen en hebben voor hem niet gheweest, totten oosten toe,

16

Gheen vreemdelinc en heeft die aen ghedaen, maer alleen sine sonen, ende sine neuen alle den tijt door.

17

Sijn offeranden zijn daghelics met den viere voleyndt,

18

⁺Moses vulde zijn handen ende hi salfde hem met heylighe olye, ⁺

+ C

+ Deu. viij.b

19

Het is hem tot eenen eewighen testament ghemaect, ende sinen zade als dye daghen des hemels, die priesterscap te bedienen, ende lof te hebben, ende zijn volck heerlic te maken sinen name.

20

Hi heeft hem vercoren van alle leuende, Gode te offeren offerande bernende, wierooc, ende goeden ruecke, tot ghedachtenisse te versoenen voor dat volck.

21

Ende hi ghaf hem in sine gheboden macht in die testamenten der oordeelen. Iacob die ghetuygenissen te leren, ende Israel een licht te gheuen in zijn wet,

22

Want teghen dien stonden die vreemde, ⁺ ende om de benidinghen omringden hem menschen inder woestinen die met Dathan ende Abiron waren, ende die vergaderinghe Chore inder gramscappen,

+ Nu. xvi.a.

23

Die HEERE God sach dat, ende het en behaechde hem niet, ende si zijn vernielt in die duysterheyt der gramschappen.

24

Hy maecte hen wonderen, ende vernieldese in die vlamme des viers,

25

Ende hi deder Aaron eere toe, ende gaf hem erffenisse, ende die eerste vruchten des corens der aerden deylde hy hem,

26

Hy bereyde zijn broot inden eersten tot satheyt, Want si sullen des HEEREN offeranden eten, die hi hem ende sinen zade gaf.

27

Voort meer, en sal hi onder dat gemeijn niet eruen, ende hi en heuet gheen deele int volcke, ⁺ Want hi selue is zijn deele ende zijn erffenisse,

+ D

28

⁺ Phinees die sone Eleazari die derde inder glorien hem naeuolghende inder vreesen des HEEREN

+ Nu. xxv.c. i.Macha.

29

ende te staen in die eerweerdicheyt des volcs, in goetheit ende vlijticheyt zijnder sielen behaechde Gode Israels.

30

Daer om stelde hy hem dat testament des vreets, ende eenen prince der heylighen, ende zijns volcs, op dat die weerdicheit des priesterschaps, hem ende sinen zade sy inder eewicheyt,

31

Ende hy maecte den coninck Dauid, den sone Iesse, vanden gheslachte Iuda, een testamente, een erffenisse hem ende sinen sade, op dat hi wijsheyt in onse herte soude gheuen, zijn volcke te oordeelen in gherechticheyt, ende dat haer goeden niet [kolom] afghedaen en souden worden, ende hi maecte haer glorie eewich in haren volcke.