De Vorsterman Bijbel

§ Dat .xlij. Capittel.

[kolom]

1

⁺EN dubbelt die redene des gehoors niet vander openbaringhe der verborghender reden, ende ghi sult warachtelic sonder beschaemtheyt zijn, ende ghi sult ghenade vinden int aenscouwen alre menschen, op dat ghi voor alle dese niet bescaemt en wort ende en ontfanct gheenen persoon, dat ghy sondicht,

+ A

2

van des alderhoochsten wet, ende testament, ende vanden oordeelen den ongodliken rechtueerdich te maken,

3

vanden woorde der ghesellen, ende des wandelers ouer den wech, ende vander gheuinghe der erffenisse der vrienden,

4

vander ghelijcheit der waghen ende ghewichten, vander vercrighinghe der veelre, ende der luttelre,

5

ende vander verderffeliker bedrieginge des vercoopens ende der cooplieden, ende van veel castijdender onderwijsinghe der kinderen, ende van den alre quaetsten knechte die side te bebloeden.

6

Ouer een scalc wijf is goet een teeken.

7

Daer veel handen zijn, daer sluyt toe. Ende so wat dat ghi gheuen sult, ⁺ dat telt, ende weghet, ende bescrijft alle wtgheuen ende ontfaen.

+ B

8

Van des onsinnighen ende dwasens onderwisinghe, ende vanden oudere, die vanden ionghelinghen gheoordeelt worden, ende ghy sult geleert zijn in allen, ende prijselic int aenschouwen alre mannen.

9

Die dochter des vaders is verborghen wakinge, ende zijn sorchfuldicheit voor haer neemt sinen slaep wech op dat si niet messchien een ouerspeeldersse in haer iuecht en worde, ende met den man woonende, hatelick worde, op dat si niet eenich tijt ontreynicht en worde in haer maechdelicheit,

10

ende dat si in haer vaders huys niet beurucht geuonden en worde, op dat si niet messchien metten man woonende niet ouer en trede, oft immer onuruchtbaer worde,

11

ouer een oncuysche dochter beuesticht die hoede, op dat si v den vianden niet in lachter en doe comen, in achterclappinge inder ghemeynten, ende bescame v in die ghemeynte des volcs.

12

En wilt alle mensche niet aenmercken in die ghedaente, ende en wilt niet int midden onder die wiuen woonen.

13

⁺Want vanden cleederen coemt die motte voort, ende des mans ongherechticheyt vanden wiue.

+ C

14

Want des mans ongherechticheit is beter dan eens weldoende wijfs, ende een wijf beschaemende in lachtere.

15

Hier om sal ick der wercken des HEEREN ghedachtich zijn, ende zijn wercken die ick ghesien hebbe, sal ick vercondighen inden redenen des HEEREN.

16

Dye verlichtende sonne, heeft door alle dinghen

[p. G7v]

gesien, ende vander eere des HEEREN is alle zijn werc vol.

17

En dede die HEERE de heiligen niet vertellen alle zijn wonderen welcke die almachtige HEERE vast staende in zijn eere, vast ghemaect heeft?

18

Hy heuet den afgront ende der menschen herte ondersocht, ende hi heeft huer loosheit verdacht.

19

Want die HEERE bekende alle kennisse, ⁺ ende hy aensach int teeken der eewicheyt, boetscappende die dinghen, die voorby zijn ghegaen, ende die ouercomen sullen, openbarende die spueren der heymelicheden.

+ D

20

Hem en gaet gheen gedacht voorby, ende gheen redene en verbercht haer van hem.

21

Hy heeft die groote daden zijnder wijsheyt verciert, die voor die werlt is, ende totter eewicheyt toe noch daer en is niet toe gheworpen,

22

noch en sal niet worden vermindert, ende hy en behoeft niemants raet.

23

Hoe begeerlic zijn alle zijn wercken, ende als een voncke die te aenmercken is.

24

Alle dese dingen leuen ende bliuen inder eewicheyt, ende in alle noot zijn hem alle dinghen gehoorsaem.

25

Alle dinghen zijn dubbel een teghen een, ende hi deder niet gebreken

26

Hi sal eens yeghelics goeden beuestigen, ende wie sal versaet worden siende sine eere?