De Vorsterman Bijbel

§ Dat .xli. Capittel.

1

⁺O Doot, hoe bitter is v ghedenckenisse den mensche die vreede in zijn goet heuet,

+ A

2

den gherusten man, ende wiens weghen wel gheschict zijn in allen, ende die noch spijse mach ontfaen.

3

O doot uwe oordeel is goet den behoeuenden mensche, ende die ghemindert wort van crachten,

4

ende ghebrekende van outheyt, ende die van allen sorghe heeft, ende den ongeloouelijken, die de wijsheyt verliest.

5

En wilt dat oordeel der doot nyet ontsien. Gedenct de welcke voor v geweest zijn ende welcke v toecomen sullen, dat oordeel is vanden HEERE allen vleesche,

6

ende welcke v ouercomen sullen na den welbehaghen des alderhoochsten, oft dattet thien oft hondert oft duysent iaren zijn.

7

Want inder hellen en is gheen beschuldinghe des leuens.

[p. G7r]

8

⁺Die kinderen der vereysingen, worden kinderen der sondaren, ende die bi den huysen der ongodliker conuerseren.

+ B

9

Dye erffenisse der sondaren kinderen sal verghaen, ende met haren zade een gheduericheyt des lachters,

10

Vanden ongodliken vader claghen die kinderen, want om dien, zijn si in lachter.

11

Wee v ghy boose mannen die de wet des alderhoochsten HEEREN verlaten hebt.

12

Ende ist dat ghi gheboren wort, so sult ghi in vermaledidinghe geboren worden, ist dat ghi sterft, so sal v deel in veruloeckinge zijn.

13

Alle dinghen die vander aerden zijn, sullen weder totter aerden gekeert worden, also die ongodlike vander veruloeckinghe in die verdoemenisse.

14

Der menschen weninge is in haren lichame, maer der ongodliker name sal wtgedaen worden

15

Hebt sorghe van eenen goeden name, want dien sal v meer bliuen, ⁺ dan duysent costelike ende groote schatten.

+ C

16

Des goeden leuens is een ghetal van daghen, maer eenen goeden name sal eewelic bliuen.

17

Mijn kinderen onderhout dye onderwisinghe in vrede, want verborghen wijsheyt, ende eenen onghesiene schat, wat nutticheyt is in beyden?

18

Een mensche die zijn sotheyt verbercht, is beter, dan een mensche dye zijn wijsheyt verbercht.

19

Maer nochtans comt weder om tot dien dat wt minen monde gaet,

20

want het is niet goet alle oneersaemheit te onderhouden, ende alle dinghen en behaghen allen menschen niet wel int ghelooue.

21

⁺Schaemt v voor v vader ende moeder: vander oncuyheyt, ende vanden voocht, ende vanden machtighen vanden lueghene,

+ D

22

ende voor den prince ende voor den rechter vander misdaet, voor die vergaderinghe, ende voor dat volck van ongerechticheit,

23

voor de vergaderinge ende vrient vander onrechtueerdicheyt, ende van der plaetsen daer ghi inne woont,

24

van diefte, vander waerheit Gods, ende testamente, van ter tafelen te sitten biden broode, ende vander verdonckeringhe des wt gheuens, ende ontfanghens,

25

van die groetende van swighinge vanden aenschouwen eens hoereerderschen wijfs, ende vanden afkeeren des aenschijns des maechs.

26

En afkeert v aensicht niet van uwen naesten, ende van dat deel wech te nemen, ende niet weder te keeren.

27

En aensiet eens anders mans wijf niet, ende en ondersoect zijn dienstmaecht niet, noch staet aen haer bedde niet

28

Wacht v vanden vrienden, vanden redenen des verwijts, ende als ghi gheeft, soo en verwijt niet.