De Vorsterman Bijbel

§ Dat .xxxvi. Ca.

1

⁺ONtfermt onser God alre dingen ende aensiet ons, ⁺ ende toont ons dat licht uwer ontfermherticheden,

+ A

+ Tobie. ix.b

2

ende seynt uwe vrese ouer die heydenen die v niet en hebben gesocht, op dat si bekennen datter geen Godt en si dan ghi, op dat si v grootdadicheden vertellen,

3

Heft op uwe handt ouer die vremde lieden, dat si v macht sien,

4

Want gelijc ghi in haer aenschouwen geheylicht zijt in ons, also sult ghi in onsen aenschouwen groot ghemaect worden in hen,

5

op dat si v ooc bekennen, gelijc wi v bekent hebben,

6

Vernieut die teekenen, ende verandert de wonderlicheden

7

Maect heerlic v hant ende uwen rechteren arme,

8

⁺Verwect die verborgentheyt, ende stort wt die gramscap,

+ B

9

Verheft dye wederpartie, ende quelt den viant,

10

Haeste tijt, ende gedenct eynde, op dat si uwe wonderen vertellen,

11

Hy moet in die gramscap der vlammen verslijnt worden, die behouden wort, ende die v volck mishandelen, moeten verdoemenisse vinden,

12

Wrijft dat hooft der princen in stucken, ende

[p. G5r]

der vianden die seggen, daer en is geen ander dan wi.

13

Vergadert alle de geslachten Iacobs, ende si moeten bekennen datter geen ander God en is dan ghi, op dat si v groote daden vertellen ende ghi sultse eruen gelijc vant beginne.

14

⁺Ontfermt ws volcs, ouer welcke uwen name aengeroepen is, ende Israels dien ghi uwen eerst gheboren sone ghelijc hebt ghemaect.

+ C

15

Ontfermt der stadt uwer heilichmakinge Ierusalem der stadt uwer rusten.

16

Veruult Sion in uwe onuertellike crachten, ende v volc met uwe eeren.

17

Gheeft getugenisse want si zijn vant begin uwe creaturen, ende verwect die bedingen, die de eerste propheten in uwen name hebben gesproken.

18

Gheeft loon den genen die v ontbeyden, op dat v propheten getrou geuonden worden, ende verhoort die gebeden uwer knechten.

19

Geeft uwen volc na die benedijnge Aaron, ⁺ ende stiert ons inden wech der gerechticheit, op dat si alle die de aerde bewoonen mogen weten dat ghi God zijt, aenscouwer der werelden.

+ Num. vi.d.

20

Den buyc sal alle spise eten ende die een spise is beter dan die andere.

21

Die kinnebacken raken die spise aen, ende een onwijs herte die luegenachtige woorden.

22

⁺Een sceef herte sal droefheyt gheuen, ende een geleert mensce sal dien wederstaen.

+ D

23

Een wijf begeert altoos een knechtken te baren, ende een dochter is beter dan een soon.

24

Eens wijfs schoonheit verurolict haers mans aensichte ende si sal ouer leyden die begeerte bouen alle begeerlicheit des menschen.

25

Ist een tonghe der ghenesinghe, so ist ooc een tonghe der versaechtinghe, ende der ontfermherticheyt, haer man en is nyet na die kinderen der menschen.

26

Wie een goede vrouwe besidt, die beghint die besittinge, si is een hulpe na hem ende een colomne als een ruste,

27

daer ghenen tuyn en is, daer sal die besittinge ontrooft worden, ende daer gheen wijf en is, daer versucht die behoeuende.

28

Wien ghelooft hi die ghenen neste en heeft, ende die afbuyghende is so waer dat doncker wort, als een opgheschort moordenaer, wtspringhende vander eender stadt in dandere.