De Vorsterman Bijbel

§ Dat .xi. Ca.

1

⁺DIe wijsheyt des ootmoedighen sal zijn hooft verheffen, ende hi sal hem int midden der grooter van staet doen sitten,

+ A

2

En prijst den man niet in zijn ghedaente, ⁺ noch en versmaet den mensche niet in sinen ghesichte,

+ Men sal niet ordeelen na dat aensichte. Ioha. vij.c

3

Die bye is cleyne onder den voghelen, ende haer vruchte heeft tbeghin der soeticheyt,

4

En beroemt nymmermeer in cleedinghen, noch en verheffet v niet inden dach uwer eeren, Want die wercken des alderhoochste alleen zijn wonderlijck, ende zijn wercken zijn eerwaerdich, ende verborghen, ende onsienlijck.

5

Veel Tyrannen saten inden throon, ende die onuermoedelijcke droech die croone,

6

Veel machtige zijn zeer verdruct geweest, ende die eerwaerdighe zijn inder anderen handen gheleuert,

7

Eer ghi vraecht, so en lastert niemanden, ⁺ ende als ghi gheuraecht hebt, so berispt rechtuaerdelijck,

+ Pro. xviij c

8

En antwoort gheen woort, eer ghijt hoort, ende int midden der ouders en stelt v niet te spreken,

9

Van dier saken die v niet en moeyt, en strijt niet, ende en staet niet mede inden oordeele der sondaren. [kolom]

10

⁺Mijn kint, en laet v wercken niet in veel dinghen zijn, ende ist dat ghi rijck zijt, ⁺ ghi en sult niet ontschuldich zijn vander misdaet, Want ist dat ghi nauolcht, so en suldijs niet achterhalen, ende ist dat ghi voorloopt, ghi en sulles niet ontulien,

+ B

+ Die rijck zijn, en zijn niet sonder sonde.

11

Daer is een mensch arbeydende ende haestende, ende een ongodlijcke smerte hebbende, ende also veel te meer en sal hi niet oueruloeyen,

12

Daer is een dorre mensch behoeuende verhalinghe meer ontbrekende van crachte, ende oueruloeyende van armoede,

13

ende Gods ooghe aenschoude dien int goede, ende rechtet dien op van zijnder nederheyt, ende hi verhief zijn hooft, ende veel verwonderden in hem, ende eerden God,

14

Goet ende quaet, doot ende leuen, armoede ende eerlicheyt zijn van Gode,

15

Wijsheyt ende onderwijsinge ende kennisse der wet zijn bi God, liefde ende der goeder weghen zijn bi hem,

16

Dolinghe ende duysternissen zijn metten sondaren gheschapen, ende die hen verhueghen int quaet, die verouden mede int quaet.

17

⁺Gods gheuinge blijft den gherechtighen, ende zijn profijt sal voortganck hebben inder eewicheyt,

+ C

18

Daer is een, die rijck wort, spaerlijck doende, ende dit is dat deel zijns loons

19

in dien dat hi seyt, ⁺ Ick heb mi ruste gheuonden, ende nv sal ick alleen van minen goeden eten,

+ Luce. xij.c.

20

ende en weet niet dat hem den tijt voor bi gaet, ende dat die doot naect, ende dat hijt altemale den anderen laet, ende sterft,

21

Staet in v testament, ende spreect mede daer in, ende veroudt in dat werck uwer gheboden,

22

Ende en blijft inden sondaers wercken niet, Maer betrout in Gode, ende blijft in v plaetse,

23

want het is licht in Gods ooghen den armen onuerhuets eerlijck te maken,

24

Die ghebenedijnghe Gods haest haer tot des gherechtighen loon, ende si maect sinen voortganck vruchtbare in snelder eeren,

25

En segt niet, wat is mi van node, ende wat goeden sullen mi daer af comen,

26

En segt niet, Ick ben mi seluen genoech ende wat sal ick hier af worden ghepijnicht.

27

⁺Inden daghe der goeden en zijt niet onghedachtich der quaden, ⁺ ende inden daghe der quaden, en zijt niet onghedachtich der goeden,

+ D

+ Naum. xviij.

28

Want het is licht voor Gode, eenen yeghelijcken inder doot na zijn weghen te verghelden,

29

Dat quade van eender vren, maect vergetenheyt van groter oncuyscheyt, ende in des menschen eynde is ontdeckinge zijnder wercken,

30

En prijst gheenen mensch voor zijn doot want een man wort in sinen kinderen bekent,

31

En leyt niet elcken mensch in v huys, want daer zijn veel laghen des bedrieghenden mensche,

[p. F4r]

32

Want ghelijck die binnenste des herten der stinckender oprispen, ende ghelijck een velthoen wordt ingheleyt in die keuye, ende als die wilde gheyte inden stricke, also is oock der houaerdigher herte, ende ghelijck een besiender, siende den val zijns naesten,

33

Want dat goet int quaet verkeerende, leyt hi laghen ende in die wtuercorene sal hi een vlecke insetten,

34

want van eender voncken, wort dat vyer vermeerdert, ende van eenen bedriechlijcken mensche wort dat bloet vermeerdert, maer een mensch die een sondaer is, leghet den bloet laghen,

35

Wacht v vanden quaetdoenden, want hi smedet quade dinghen, op dat hi niet messchien beschimpinghe ouer v en brenghe inder eewicheyt,

36

Laet eenen vremdelinc tot v comen, ende hi sal v verderuen in eenen storm, ende hi sal v veruremden van uwen eyghen weghen.