De Vorsterman Bijbel

§ Dat .x. Capittel.

1

⁺ EEn wijs rechter sal zijn volck oordeelen ende die heerschappie eens verstandelijc-[kolom]ken sal blijuen staende,

+ Die vasticheyt van een rijc dat is een wijs coninck.

2

Na den rechter des volcs, zijn oock zijn dienaers, ende alsodanich als die regeerder der stadt is, alsodanich zijn oock die inwoonders,

3

een onwijs coninc sal zijn volc verderuen, ende die steden sullen bewoont worden door den sinne der voorsichtigher,

4

Die macht des lants is inder hant Gods, ende alle ongherechticheyt des volcs is te versmaden, ⁺

+ Leui. xix.c

5

Des menschen macht is in Gods hant, ende ouer dat aensicht des schrijuers sal hi zijn eer setten,

6

En ghedenct gheens onrechts ws naesten, ende en doet niet in die wercken des onrechts,

7

Hoouaerdicheyt is hatelijck voor God ende den menschen, ende alle ongherechticheyt der Heydenen versmadelijck,

8

Dat rijck wort vanden eenen volck totten anderen ouergheuoert, om die onrechtuaerdicheden ende onrechten ende versmaetheden, ende om verscheyden bedroch.

9

Maer niet en is sondigher, ⁺ dan een ghierighe, Wat verhoouaerdicht ghi v, aerde ende asschen?

+ Hier versmaet die wijse man die vreckheyt.

10

Gheen dinck en is ongherechtigher dan ghelt beminnen, want dese heeft oock zijn ziele te coope, Want hi heeft zijn binnenste in sinen leuen verworpen,

11

Alle ouerheyt is een cort leuen,

12

Een langhe quale beswaret den medecijn meester, Die medecijn meester snijt een corte quale af, Also is een Coninck huyden oock, ende morghen sterft hi,

13

Want als een mensche sal steruen, so sal hi serpenten ende beesten ende wormen beeruen.

14

Dat beghin der hoouaerdicheyt des menschen is gheheel afkeeren van God, ⁺

+ Hier versmaet hi die houaerdicheyt.

15

want zijn herte is wechghegaen vanden ghenen die hem ghemaect heeft, want het beghin alder sonden is hoouaerdicheyt, Diese hout sal veruult worden met vloecken, ende si sal hem auerecht keeren int eynde,

16

Daerom heeft die HEERE die vergaderinghe der quaden onteert, ende heeftse totten eynde toe verdoruen.

17

⁺God heeft die stoelen der hoouaerdigher hertoghen verdoruen, ende hi heeft de sachtmoedige voor hen doen sitten,

+ C

18

God heeft die wortelen der houaerdigher Heydenen dorre ghemaect,

19

ende hi heeft die ootmoedighe wt dien seluen Heydenen gheplant, God heeft die landen der Heydenen omghekeert, ende heeftse vernielt totten fundamenten toe.

20

Hi verdroochdese wt dien, ende hi vernieldese, ende hi dede haer ghedenckenisse ophouden vander aerden,

21

God heeft der hoouaerdigher ghedenckenisse verdoruen, ende hi heeft ghelaten die ghedenckenisse der ootmoedigher van sinne,

22

Die hoouaerdicheyt en is den menschen niet gheschapen, noch die gramschap

[p. F3v]

den gheslachte der vrouwen.

23

Der menschen zaet dat God vreest, sal gheeert worden, ⁺ Maer zaet dat des HEEREN gheboden voor bi gaet, dat sal onteert worden,

+ Die vreese gods brenget een mensche tot eeren.

24

Int midden der broederen sal haer regeerder in eeren zijn, ende die den HEERE vreesen, sullen in sinen ooghen zijn,

25

Die eere der rijcker eerlijcken, ende der armer is God vreesen,

26

En wilt den rechtuaerdigen armen mensch niet versmaden, ende en wilt den rijcken man die een sondaer is, niet groot maken.

27

⁺Die rechter is groot, ende is machtich in eeren, ende daer en is gheen grooter dan die God ontsiet,

+ D

28

Die vrije sullen den welghesinde knechte dienen, ⁺ ende een voorsichtich ende een welghemaniert man en sal niet murmureren als hi berispt is, ende een onwetende en sal niet gheeert worden,

+ merct hier vanden wijsen ende duechdelijken knechten oft dienaren. Pro. xvi.a

29

en wilt v niet verheffen in v werck te doen, ende en wilt niet twijfelen inder tijt der banghicheyt,

30

Hi is beter die arbeyt, ⁺ ende oueruloeyt in allen, dan die hem verhuecht, ende heeft broots ghebreck,

+ Den arbeyt wert hier ghepresen. Pro. xij.b.

31

Mijn kint, hout v ziele in sachtmoedicheyt, ende gheuet haer eere na haer verdienste,

32

Wie sal hem rechtuaerdighen, die teghen zijn ziele sondicht? ende wie sal dien eeren, die zijn eyghen ziele onteert.

33

Die arme verhuecht door zijn onderwijsinghe ende door zijn vreese, ⁺ ende daer is een mensch die om zijns goets wille gheeert wort,

+ Blijschap der conscientien ende glorie is van god den ghenen die in tribulatie is.

34

Maer die in zijn armoede hem beroemt hoe veel meer in zijn goet, Ende die in goet glorieret, die ontsie armoede.