De Vorsterman Bijbel

§ Dat .xij. Cap.

1

⁺ISt dat ghi weldoet, so weet wien dat ghijt doet, ⁺ ende daer sal veel dancs in uwen goeden zijn,

+ A

+ Hoe ende wie datmen wel doen sal.

2

Doet den gherechtighen wel, ende ghi sult een groote wedergheldinghe vinden, ende en ist niet van hem, warachtelijck so suldyse vanden HEERE ontfaen,

3

want hem en is niet wel die ghestadich inden quaden is, ende gheen aelmoesse en gheeft, want die alderhoochste hatet die sondaers, ende hi heeft ontfermt den ghenen die berou is hebbende,

4

Gheeft den ontfermhertighen, ende en ontfangt den sondare niet, ende ghi sult den ongodlijcken ende den sondaers die wrake betalen, ende beswarense tot dien daghe der wraken,

5

Gheeft den goeden, ende en ontfanghet den sondaer niet,

6

⁺Doet den ootmoedighen wel, ende en gheeft den ongodlijcken niet, Verbiet hem dat broot te geuen, op dat hi in dien niet machtigher en si dan ghi,

+ B

7

want ghi sult dobbele quaden vinden in allen den goeden die ghi hem doet, want die alderhoochste haet die sondaers oock, ende den ongodlijcken sal hi wrake verghelden.

8

Een vrient en sal niet bekent worden inden goeden dinghen, ende een viant en sal inden quaden niet verborghen worden,

9

In eens mans goeden zijn sine vianden bekent, In zijn droefheyt ende in zijn quaetheyt is zijn vrient bekent,

10

⁺En ghelooft uwen viant niet inder eewicheyt, want zijn schalcheyt verroest als yser,

+ C

11

ende ist dat hi verootmoedicht, crom gaet, worpter uwen moet af, ende wacht v van hem,

12

Ghi en sult hem niet neffens v stellen, noch en laet hem niet sitten tot uwer rechter hant, op dat hi hem niet omme en keere, ende sta in v plaetse, op dat hi messchien [kolom] uwen zetel niet en soecke, als hi omghekeeret is in uwe plaetse, ende dat ghi inden wterste mijn woorden bekent, ende wort in minen redenen ghesteken,

13

⁺Wie sal des tooueraers ontfermen die van eenen serpent ghesteken is, ende allen die den beesten ghenaken, Also oock die versellet is inden wech, met eenen ongherechtigen man, ende is bewonden in sine sonden

+ D

14

Een vre sal hi met v blijuen, Maer ist dat ghi afneycht, hi en sal v niet verdragen

15

Een viant versoetet in sinen lippen, ende hi leyt laghen in zijn herte, op dat hi v omme soude worpen inden gracht,

16

Die viant screyt in sinen ooghen, ende ist dat hi tijt vint, hi en sal niet van bloede versaet worden,

17

Ende ist dat v quade dinghen toe loopen, so sult ghi hem daer eerst vinden,

18

ende als helpende sal hi v voeten onder door grauen,

19

Hi sal zijn hooft schudden, ende metter hant slaen van blijschapen, ende veel binnen smonts sprekende, sal hi die ghesteltenisse zijns aensichts veranderen.