De Vorsterman Bijbel

§ Dat .vi. Capittel.

1

⁺OM ws vrients wille, ⁺ en wilt ws naesten viant niet worden, Want die quade sal lachter ende versmaetheit beeruen, ende alle sondaer is nijdich ende tweetonghich,

+ A

+ Alle sondaren hebben bisonder eene quade tonge.

2

En verheft v niet inder gedachten uwer sielen, ghelijck een stier, op dat v cracht nyet neder en worde ghestooten door sotheyt,

3

ende ete uwe bladeren, ende verdoe v vruchten, ende dat ghy wort verlaten als een dorre hout in der woestinen,

4

Want een schalcke siele sal hem verliesen die haer heeft, ende si gheeft dien, den vianden tot blijsschappen, ende si brengt hem totter ongodliker lodt,

5

Een soet woort vermenichfuldicht die vrienden, Het vermorut die vianden, ende een welbesette gracieuse tonghe sal oueruloedich zijn in eenen goeden mensche,

6

ghy sult veel vredelike vrienden hebben, ende ghi sult eenen raetsman van dusenden hebben, ⁺

+ Vander warachtighe vrientscap.

7

Ist dat ghy eenen vrient besit, soo besit hem inder tentacie ende en ghelooft hem v seluen niet lichtelic

8

Want daer is een vrient nae sinen tijt, ende hi en sal niet blijuen inden daghe der tribulacien,

9

ende daer is een vrient, die keert hem tot viantschap, ende daer is een dye haet ende ghekijf, ende lachter sal ontdecken.

10

⁺En daer is een vrient die een geselle der tafelen is, ende hi en sal niet blijuen inder tijt des noots,

+ B

11

Ist dat een vrient vast geduert, soo sal hi v zijn, als v gelijc, ende hi sal getrouwelick doen aen v huysghesinne,

12

Ist dat ghi hem verootmoedicht tegen v, ende hem van uwen aensichte verbercht, so suldi goede eenmoedige vrientschap hebben,

13

Wort gescheyden van uwen vianden, ende wacht v van uwen vrienden

14

Een getrouwe vrient, is een stercke bescerminghe, ende die dien vint, die vint eenen schat,

15

Bi eenen getrouwen vrient en is geen gelikenis, ende geen gewichte gouts ende siluers en is weerdich tegen die goetheyt zijn geloofs,

16

Een getrouwe vrient is een medicine des leuens, ende der onsterflicheyt ende die den HERE vreesen sullen hem vinden

17

⁺Die God vreest, ⁺ dye sal euen wel goede vrientscap hebben, want na dat hi is, sal zijn vrient zijn

+ C

+ Die wijse man raet datmen de leeringe zal omhelsen ofte ontfangen

18

Mijn kint ontfanct leeringe van ioncs op ende in uwe oude grijsheyt suldise vinden,

19

ghaet tot haer als dye ploecht ende zaeyt,

[p. F2r]

ende ontbeyt haer goede vruchten,

20

Want ghy sult in haer werck een weynich arbeyden, ende haest sult ghi van haren vruchten eten,

21

Hoe seer scherp is die wijsheyt den geleerden menschen, ende in haer en sal niet blijuen dye onwetende,

22

Die proeuinghe sal in dien zijn, als die cracht des steens ende si en sullen niet vertoeuen die wech te worpen

23

Want die leeringhe der wijsheyt is na haren name, ende si en is niet vele menschen openbaer, Maer den welcken si bekendt is, dye blijft tot Gods aenschouwinghe toe,

24

Hoort sone, ende ontfangt den raet des verstandenisse, ende en worpt minen raet nyet van v,

25

Steect uwen voet in haer boeyen, ende uwen hals in haeren halsbant,

26

Buycht v schoudere daer onder, ende draechtse, ende en wort niet traech van haren banden,

27

In alle uwen ghemoede gaet tot haer, ende hout haer wegen in alle uwe crachten.

28

⁺Ondersoectse, ende si sal v geopenbaert worden, ende als ghi die hebt, so en verlaetse niet, Inden wtersten sult ghi rust in haer vinden,

+ D

29

ende si sal v worden ghekeert tot ghenuechte, ende haer boeyen sullen v worden tot een bescherminghe der starcheyt,

30

ende stuen voeten der cracht, ende haren halsbant sal wesen tot een schoon cleet der glorien,

31

Want die schoonheyt des leuens is in haer, ende haer banden zijn een aenbijndinge der salicheyt,

32

Ghi sultse cleeden met eenen costelijcken cleede der glorien, ende ghi sult v die croone der mede verblijdinghe op setten,

33

Mijne kint is dat ghy my aenmerct, ghy sultse leeren, ende ist dat ghi v ghemoet daer toe gheeft, soo sult ghi wijs zijn,

34

Ist dat ghi v oor neder buycht, ghi sult leeringhe ontfaen, ende ist dat ghy bemint te hooren, so sult ghi wijs zijn,

35

Staet in de menichte der voorsichtiger ouders, ende wort wt der herten haerder wijsheyt toe geuoecht op dat ghi alle gods vertellinge moecht horen, ende dat die bispraken des loofs van v niet en ontulien,

36

Ende ist dat ghi eenen wijsen siet, ontwaect tot hem, ende uwe voet betrede die trappen zijnder dueren,

37

Hebt uwe ghedachten in Gods gheboden, ende zijt aldermeest ghestadich in sine beuelen, ende hi sal v een hert gheuen, ende die begheerlicheyt der wijsheyt sal v ghegheuen worden.