De Vorsterman Bijbel

§ Dat .x. Capittel.

1

⁺DEse wijsheyt bewaerde dien die erste van God ghemaect is een vader des aertrijcs, als hi alleene was geschapen, ende brocht hem wt van zijnder misdaet,

+ A

2

Ende hi brocht hem wt vanden slijme der aerden ende hi ghaf hem crachte alle dinghen te onderhoudene, ⁺

+ Gene. i.d.

3

als die onrechtuaerdige wech ghinc van deser in zijnder gramschappen, ⁺ die broederlicheyt veghinc, ⁺ door die gramschappe des dootslaechs. ⁺

+ Genesis. iiij.b

+ Genesis. ij.b

+ genesis. vij.d

4

Om welcke doen dwater dlandt verdorf, soo heeft die wijsheit wederomme genesen, den rechtuaerdigen, ⁺ door een versmadelijck hout den rechtuaerdighen regerende.

+ genesis. xi.d.

5

Dese wijsheyt, als hen die natien in volginge der hoouaerdichheyt hadden verheuen, so kenden si den rechtueerdighen, ende si behielt hem Gode sonder claginge, ende hi heeft in den kinderen een stercke bermherticheyt bewaert.

6

⁺Dese verloste den rechtueerdigen vliende vanden vergaenden ongodliken, alst vier neder viel inden vijf steden,

+ B

7

den welcken tot eenen ghetuygenisse, dat woeyste lant roocachtich blijft, ende boomen in onsekere tijt vrucht hebbende, ende eenen souts steene staende tot een gedachtenisse der ongeloouigher zielen,

8

Want die die wijsheyt voorbi ghingen, die en vielen niet alleen daer inne dat si die goeden niet en wisten, maer si lieten den menschen een ghedachtenisse haerder onwijsheyt achter, alsoo dat si oock niet verborghen en mochten bliuen inden dingen daer si in sondichden,

9

Maer die wijsheyt verlostese van smerten, die haerder waer nemen.

10

⁺Dese beleyde den rechtuaerdighen voor-[kolom]uluchtighen der gramschapen zijns broeders, ⁺ door rechte weghen, ende hi toonde hem trijcke Gods, ende hi ghaf hem der heyliger kennisse, hi maecte hem eerlijck in den arbeyden, ende hi veruulde zijn arbeyden.

+ C

+ ge. xxviij b

11

Int bedroch der ghenen die hem bedrogen, was si bi hem, ende maecte hem eersaem,

12

Si bewaerde hem vanden vianden, ende beschermde hem vanden verleysters, ⁺ Ende si ghaf hem eenen starken strijt, op dat hi verwinnen soude, ende weten dat die wijsheyt machtigher is dan alle dinck.

+ ge. xxxvij f

13

Dese en heeft den vercochten rechtuaerdighen niet verlaten, maer si verloste hem vanden sondaers, ende si daelde met hem neder in den cuyle,

14

ende si en verliet hem niet in den banden, tot dat si hem dat ceptrum des rijcs toe brochte, ende machticheyt teghen die ghene die hem verdructen, ende si toondese lueghenachtich te wesen, die hem besmetten, ende si ghaf hem eewighe claerheyt.

15

Dese verloste dat rechtueerdighe volck, ende dat zaet sonder claginge verlostede si vanden geslachten, ⁺ die hem verdructen,

+ Exo. i.e.

16

Si ginc in die ziele des knechts Gods, ende stont teghen veruaerlijcke coninghen, in wonderen ende teekenen,

17

⁺Ende si wederghaf den rechtuaerdighen, loon van haeren arbeyde, ende si beleyde die in eenen wonderlijcken wech, ende si was dien, in een bedecsel des daechs, ende snachts in een licht der sterren.

+ D

18

Ende si droechse door die roode zee, ⁺ ende si voerdese door een zeer groot water.

+ Exo. xiiij f

19

Maer dijer vianden verdrencte si in die zee, ende si leydese wt der diepte der hellen,

20

Hierom namen die rechtuaerdighe der booser menschen roof wech, ende si songhen, HEERE, uwen naem is heylich, ende si loefden te gader die verwinnersse uwe handt,

21

Want die wijsheyt dede der stommer mont open, ende si maecte die tonghen der onsprekender kinderen, wel sprekende.