De Vorsterman Bijbel

§ Dat .ix. ca.

1

⁺GOdt mijnder vaderen, ende HEERE der ontfermherticheyt, die alle dingen met uwen woorde hebt ghemaet,

+ A

2

ende den mensche midts v wijsheyt hebt gestelt, dat hi die creatuere soude regeren in heerscapie die van v gemaect is,

3

op dat hy dat aertrijc soude beschicken in gelijcheyt, ende rechtueerdicheyt, ende dat hi in stueringhe des herten dat oordeel soude oordeelen,

4

gheeft my dye wijsheyt, die een bistaenster uwer setelen is, ende en wilt mi niet versteken van uwen kinderen,

5

want ic ben v knecht, ende dye sone uwer dienstdeernen, een onsterc mensch van corter tijt, ⁺ ende cleyndere totten verstande des oordeels ende der wetten,

+ Psal. c.vi.

6

Ende so wie volmaect sal zijn onder der menscen sonen, ist dat uwe wijsheyt van hem is, hi sal voor niet worden gherekent

7

⁺Maer ghi hebt my tot eenen coninck dynen volck vercoren, ende eenen rechter uwer sonen ende dochteren, ⁺

+ B

+ i.par. xvi.a ij.para. i.b.

8

Ende ghi seyt mi eenen tempel te timmeren in uwen heyligen berch ende eenen outaer in die stadt uwer wooninghe, een ghelijckenisse ws heylighen tabernakels, ⁺ welck ghy van tbegin bereyt hebt,

+ Pro. viij.c.

9

ende v wijsheit met v, die welcke uwe wercken weet, die welcke doen daer oock bi was doen ghi dat aertrijc maecte, ende wiste dat uwen ooghen behaechlijck was, ende wat oprecht was in uwen gheboden,

10

Seynt dye van uwen heylighen hemelen, ende van den stoel dijnre grootheyt, op dat si met my si, ende met mi arbeyde, op dat ic mach weten, wat by v aenghenaem si,

11

want die weet, ende verstaet alle dingen, ende si sal mi soberlic seyden in mijn wercken, ende si sal mi bewaren in hare macht,

12

ende mijn wercken sullen aengenaem zijn, ende ic sal v volc rechtueerdelijc bescicken, ende ic sal weerdich zijn mijns vaders setelen.

[p. E4r]

13

Want wat mensche mach den raet Gods weten, ⁺ oft wie mach dencken wat God wil.

+ Isa. xl.c. Ro. xi.d

14

⁺ Want die gedachten der sterfliker menschen zijn vol vreesen, ende onse voorsienicheden zijn onseker,

+ D

15

Want dat lichaem dat vergaet, beswaert die siele, ende aertsche inwooninghe druct den sin neder, die veel denckende is

16

Ende wi werderen zwaerlijc die dinghen, die inder aerden zijn, ende die int aenschouwen zijn, vinden wy met arbeyt, Maer wie sal die dinghen ondersoeken die inden hemel zijn?

17

Wie sal uwen sinne weten, het en si dat ghi wijsheyt gheeft, ende het en sy dat ghy uwen heylighen gheest seyndt vanden alre hoochsten,

18

ende ten si dat die paden der ghenen die inder aerden zijn, gebetert zijn, ende die menschen die dingen geleert hebben, die v behagen, Want door die wijsheyt zijn si ghenesen, die v HEERE behaget vanden beghinne.