De Vorsterman Bijbel

§ Dat .iiij.Capittel.

[p. E2r]

1

⁺O Hoe schoon is een suyuer geslachte met ^* liefde) Want haer gedachtenis is onsterfelic, want si is bi Gode ende biden menschen bekent.

+ A

* of claerheyt.

2

Als si teghenwoordich is, so volgen sise na, ende si begherense, als si haer wtleydet, ende si triumpheert gecroont inder eewicheyt, verwinnende der onbeulecter strijden loon.

3

Maer die vele gewonnen menichte der ongoddelijcker en sal niet nut zijn, ende de bastaerde planten en sullen gheen diepe wortelen gheuen, noch si en sullen geen staende vasticheyt leggen.

4

Ende ist dat si inde tacken inder tijt groeyen niet vaste gestelt, sullen si vanden winde beroert worden, ende van ouerlast der winden sullen si wt ghewortelt worden.

5

Want de onuolmaecte tacken sullen gebroken worden, ⁺ ende haer vruchten sullen onnut zijn ende bitter om eten, ende nergens toe bequaem.

+ B

6

Want alle de kinderen die vanden ongerechtigen worden geboren, zijn getuygen der schalcheyt, tegen haer ouders, in huer vraginge,

7

Maer ist dat die rechtueerdige, metter doot voorcomen wort, so salt hem een vercoelinge zijn,

8

want de outheyt is eerlijck, niet lange geduerich, noch metten getale der iaren getelt.

9

De sinnen des menschen zijn gryse, ende den tijt des outheyts is een onbesmet leuen.

10

Die Gode behaecht, die is liefgetal gemaect, ende leuende onder de sondaren, is hi ouer geuoertt

11

Hi is wech genomen op dat de quaethiet zijn verstant niet veranderen en soude, ⁺ oft dat de veysinge zijn ziele niet bedrieghen en soude,

+ hebre. xi.d

12

Want de tooueringhe der lueghenachticheyt verdonckert goede dingen, ende de onstantachticheit der quader begeerlicheit, keert om den sin sonder quaetheyt,

13

Voleynt in cortter tijt, heeft hi vele tijden veruult,

14

Sijn ziele was Gode behaechlijck, daerom haeste hy hem dien wt te leyden, van dat midden der ongherechticheden.

⁺ Maer tvolck en siet noch en verstaet dit niet, noch en neemt sulcke dinghen niet ter herten,

+ C

15

dat Goodts ghenade ende barmherticheyt is tot sinen heylighen, ende zijn aenschouwen ouer zijn wtuercorene,

16

want dye rechtueerdighe doode, verdoemt die onrechtueerdighe leuende, ende die ioncheyt snellick voleyndt, verdoemt dat langhe leuen des onrechtueerdighen.

17

Want si sullen dat eynde des wisen sien, ⁺ ende si en sullen niet verstaen wat God van dien ghedacht heeft, ende waerom datten die HEERE vermindert heeft,

+ D

18

want si sullen hem sien ende versmaden, maer Godt salse bespotten, Ende na dese dingen sullen si afuallen sonder ee-[kolom]re, ende in versmaetheit onder de dooden inder eewicheyt.

19

Want hi sal die opgeblasene, sonder stemme verschoeren, ende hy salse beweghen vanden fundamenten, ende si sullen totten ouersten toe verlaten worden, ende si sullen suchtende zijn, ende haer gedachtenisse sal vergaen,

20

Si sullen beureest, in die ghedachten haerder sonden comen, ende haer sonden sullense dweers wroegen tegen hen seluen.