De Vorsterman Bijbel

Dat. viij. Capittel.

1

WIe mocht v mi gheuen, mijn broeder ghi die mijnder moeder borsten suyghet, ⁺ dat ic v daer buyten vinde, ende v cussen mochte, ende dat niemant mi ^* nv en versmade)

+ A

* th. v en be beroofde

2

Ic sal v aengripen, ende v leyden in mijnder moeder huys, ende in die slaepcamer van mijnder moeder, daer sult ghi mi leeren, ende ic sal v dranc geuen van gemaecten wijn ende den Most mijnder Granaetappelen,

3

Sine slincke hant leyt onder mijn hooft, ende sine rechte hant sal mi omhelsen.

§ Die stemme Christi.

4

Ick beswere v, ghi dochteren van Ierusalem, dat ghi mine beminde niet op en wecket, noch en maectse niet wacker, ⁺ tot dat si selue wille.

§ Die Sinagoga vander heyliger kercke.

[kolom]

+ B

5

Wie is dese die daer opuaert vander woestinen, oueruloeyende van wellusticheden ende leent op haeren vrient?

§ Die bruydegom voor die bruyt.

Onder den appelboom wecte ick v, daer heeft uwe moeder ^* haeren maechdom verloren, ende daer is ghekrenct die v ghewonnen heeft.)

§ Die kercke spreect tot Christum.

* the. v ghebaert daer is si met v gelegen die v gebaert heeft.

6

Settet mi ghelijck eenen seghel op v herte, ende ghelijck eenen seghel op uwen arm, Want liefde is starc ghelijck die doot, ende toornighe liefde is hart ghelijck die helle, ^{+ *} Haer lampen zijn als lampe des viers ende der vlammen,)

+ C

* thebr. haer gloet is vierich, ende een vlamme des HEEREN,

7

veel wateren en mochten die liefde niet wtblusschen, noch die stroomen en hebben die niet verdroncken. Al gaue een man alle den rijcdom zijns huys voor die liefde, hi salse versmaden als niet.

§ Christus seyt van die heylighe kercke totter Sinagogen.

8

Onse suster is cleyne ende en heeft gheene borsten, Wat sullen wi onser sustere doen, opten dach alsmense nv sal aenspreken?

Christus antwoort vander kercken.

9

Is si een muer, soo laet ons silueren bolwercken daer op timmeren, Is si een duere, so sullen wise vestigen met cederen tafelen

Die heylighe kercke antwoort van Christo.

10

⁺Ick ben een muer, ende mijn borsten zijn ghelijc eenen thorren, na dat ick ben geworden ^* voor hem) als die ghene die vrede vint.

Die Sinagoge spreect totter kercken.

+ D

* th. voor zijn ooghen,

11

^* Die vreedsame heeft eenen wijngaert in die plaetse, die volc heeft) Hi ghaf den wijnberch den bewaerders, dat elck man voor sine vruchten bracht duysent silueren penninghen.

Christus spreect.

* the. Salomon heeft eenen wijnghaert te Baal Hamon

12

Mijnen wijnberch is voor mi, V behoort duysent toe ghi ^* vreedtmaker,) ende twee hondert den ghenen die sine vruchten bewaren

Die stemme Christi.

* the. Salomon

13

Ghi die in die houen woont, die vrienden mercken op v, laet mi uwe stemme hooren.

/Die heylighe kercke tot Christum.

14

Vliedt mine vrient, ende zijt gelijc eenen rhee oft iognhe hirt op der welruykender cruyden berghen.

§ Hier eyndt dat boeck van Salomons sangen, datmen int latijn Cantica Canticorum noemt.