De Vorsterman Bijbel

§ Dat .xxviij. Capittel.

1

⁺DIe ongodlijcke vlucht als hem niemant en iaecht. Maer die rechtuaerdige sal ghelijck eenen leeuwe betrouwende ende moedich zijn.

+ A

2

☞ Om des lants sonden wille moet het vele princen hebben, ^* ende om des menschen wijsheyts wille, ende die conste der dinghen diemen seyt) sal tleuen des hertogen verlengt worden.

* the. om der luyden wille die verstandich, ende bescheyden zijn

3

Een arm man die den armen leedt doet, is gelijc eenen stofregen ^* door den welcken dieren tijt coemt.)

* th de vruchte verderft

4

Die die wet verlaten, louen den ongoddeliken, Maer diese bewaeren, worden gram tegens hem.

5

Quade luyden en mercken niet op dat oordeel, Maer die na den HEERE vraghen, mercken op alle.

6

Een arme dye in die simpelheyt voortgaet, is beter dan een rijcke die in verkeer-[kolom]den weghen ghaet.

7

⁺Wie die wet bewaert is een verstandich kint, Maer so wie sluymers voet, beschaemt sinen vader.

+ B

8

Wye sine goet vermenichfuldicht met woecker, ende ouersettinghe, die vergaderet tot profite der armer.

9

Wie zijn oore afkeert die wet te hooren, diens gebet sal een afgriselijck vereysen zijn.

10

Wie die rechtuaerdige verleyt op eenen quaden wech, Dye sal in sinen ^* doot) vallen, maer die eenuoudige sullen goet beeruen.

* the. gracht

11

Een rijcke duncket dat hi wijs is, Maer een arme verstandige ondersoect hem.

12

Inder blijschappen der rechtuaerdigher, is veel beroemens, Maer als die ongodlike ^* regeren,) vallen die menschen.

* th. opcomen

13

Wie sine misdaet verberget, dien en salt niet gelucken, Maer wiese belijdet ende laet, die sal ontfermherticheyt vercrighen.

14

Salich is die mensche die altoos vreest, maer wie hartmoedich is, sal in ongeluc vallen.

15

Een ongoddelike prince die ouer een arm volc regeert, ⁺ dat is eenen briesschenden leeu, ende ghierigen beyr.

+ C

16

Een prince sonder verstant salder vele met valschen belieghen oueruallen, Maer so wie die ghiericheyt haet, die sal lange leuen

17

Een mensche die aent bloet eender zielen onrecht doet, die en wort niet onderhouden, al waert dat hi oock tot inder helle vloot.

18

Die simpelijc henen ghaet, die sal salich zijn, Maer wie van verkeerden weghe is die sal eens veruallen.

19

Wie sinen acker bouwet, die sal broots ghenoech hebben. Maer wie na ledich gaen ghaet, sal met armoeden veruult worden.

20

Een ghetrouwe man sal zeer ghepresen worden, Maer wie haestet rijck te worden, ☞ die en sal niet ontschuldich bliuen

21

^* Die int oordeel persoonen kent, en doet niet wel) Want dese laet die waerheyt achter, om een bete broots.

* the. In dat oordeel dat aensicht te kennen en is niet goet

22

Wie tot rijcdom haestet, ende is nidich ouer dandere, Die en weet niet dat hem ^* armoede) ontmoeten sal.

* the. ongheual

23

⁺Wie eenen mensche straft, die sal naemaels ghonste vinden, Meer dan dye hem bedriecht, doort smeeken der tongen.

+ D

24

Wie sinen vadere oft moedere heymelic yet neemt, ende seit, Het en is geen sonde Die is des dootslagers mede deelachtich.

25

Die hem seluen beroemt, verwect gekijf, Maer wie hem opten HEERE verlaet, ☞ sal ^* behouden worden

* the. vet.

26

Wie hem op zijn herte verlaet, is een sot, Maer wie met wijsheyt gaet, sal ^* gepresen worden,)

* h ontloopen

27

Wie den arme geeft, dien en sal niet gebreken. Maer wie zijn ooghen afkeert, die sal ghebreck lijden.

[p. D2v]

28

Als die ongodlijcke op comen, so verbergen hen die luyden, Maer als si vergaen soo worden dye rechtuaerdighe vermenichfuldicht.

§ Van eenen stijfneckighen, van eens ongodlijcken ghewelt, van eenen rechtuaerdighen coninck, van die roede die den sone onderwijst, van een prophecie, van een lecker kint.