De Vorsterman Bijbel

§ Dat .xxv. Capittel.

1

⁺DIt zijn oock Salomons bispraken, die welcke ouergeset hebben die mannen Ezechie des conincs van Iuda.

+ A

2

Het is gods eere een heymelijc dinc te verbergen, Maer der coningen eere ist een dinc te ondersoecken.

3

Den hemel is hooch ende die aerde diep, maer der coningen herte is ongrondeerlijck.

4

Doet den roeste wech vanden siluer, Soo sal een reyn vat daer wt comen.

5

Doet wech dat ongodlijc wesen van des Conincs aensichte, So wort sinen throon met gherechticheyt geuesticht.

6

⁺En verthoont v niet heerlijc voor den coninck, Ende en staet niet in die plaetse der grooter.

+ B

7

Want het is v beter datmen tot v segge, Coemt herwaerts op, dan dat ghi voor den prince vernedert wort.

8

^* Dat uwe ooghen gesien hebben en brengt niet volliken wt in twistachtighe kijuagie, dat ghi bi auontueren namaels niet en moecht beteren) als ghi uwen vrient onteert hebt.

* the. dattet uwe oogen sien moeten En vaert niet ter stont wt om te kijuen Want wat suldi daer nae maken

9

Handelt v sake met uwen vrient, Ende en openbaert ^* eenen vremden uwe) verholentheyt niet,

* theb. eens anders

10

Op dat hijt [kolom] v niet en verwijte als hijt gehoort heeft, ende dat hi niet op en houde van v te verspreken, ^* Genade ende vrientscap die verlossen, die welcke ghi v behoudet, dat ghi niet versmadelijc en wordet)

* ten is niet int heb.

11

Een woort gesproken tot zijnder tijt, is gelijc gulden appelen in silueren ^* bedden.)

* th. scotelen

12

Wie eenen wisen straft die hem hoort, die is ghelijck eenen gulden oorrinck ende ^* blinckende peerle.)

* the. gulden halsbant

13

Ghelijck die coude des sneeus ter tijt des oofts, ⁺ Soo is een getrou bode dien die hem gesonden heuet, ende zijns Heeren ziele doet hi rusten.

+ C

14

Een beroemelijck ghelouende man, ende die niet en geeft, Die is ghelijck wolcken ende windt sonder reghen.

15

Door verduldicheyt sal een prince versoent worden, Ende een saechte tonghe sal breken die hardicheyt.

16

☞ Vindi hoenich, so eedt dies so vele dattet v ghenoech si, dat ghi niet, als ghi te sadt wordet, wt en braket.

17

Ontrect uwen voet vanden huyse ws naesten, Op dat ^* hi in eenich tijt als hi sat is, v niet en hate.)

* the. hem ws niet en verdriete ende v hate

18

Wie tegen sinen naesten valsche getuygenisse spreect, Die is een spiesse, swaert ende scherpe pijl.

19

^* Die zijn hope stelt op eenen ongetrouwen inden dach der bangicheyt,) die is gelijc eenen verrotten tant, ende eenen slipperenden voet die moede is, ende sal sinen mantel verliesen inden dach der couden.

* the. Die hope des onachsamen inden tijt des noots

20

⁺Wie eenen boosen, herte liedekens singt, dat is ghelijck edic op vol aerde.

^* Gelijc een motte den cleede ende een worm den houte, also let droefheyt des mans herte.)

+ D

* ten is niet int hebre.

21

Hongert uwen viant, so spiset hem met broode, Dorstet hem, so drencket hem met water.

22

Want ghi sult colen, op zijn hooft vergaderen, Ende die HEERE salt v vergelden.

23

Den noorden windt verdrijft den reghen, Ende een suere aensicht, die achterclappende tonge.

24

Het is beter inden hoecke vanden huyse te sitten, Dan bi een kijfachtighe vrouwe in ^* een ghemeyn) huys.

* the. eenich

25

Een goet geruchte wt verren lande is gelijc cout water eender dorstiger zielen.

26

Een rechtueerdige die voor eenen ongodliken valt, is gelijc een fonteyne metten voeten omgeroert, ende een veruuylde water adere.

27

Gelijc als die te vele honichs etet, hem dat niet goet en is ^* So die een ondersoecker der maiesteyt is, sal vander eeren verdruct worden.)

* th. Ende wie swaere dingen ondersoect dien wordet te swaer

28

Een man die sinen geest ^* int spreken niet gehouden) en can, is gelijck een open stadt sonder mueren.

* th. niet behouden

§ Van des sotten eere ende vanden vermaledien ende vanden sotte, ende datmen den sotte niet prediken en sal laten, vanden wederkeerende totten sonden. Vanden tragen, vanden onlijdtsamen, vanden oorblasere, vanden bedriechlijcken vrient