De Vorsterman Bijbel

§ Dat .xxiiij. Capittel.

1

⁺EN zijt niet nauolgende wt liefden die quade luyden, Ende en wenschet niet bi hen te sine.

+ A

2

Want haer herte denct na ^* roof) ende haer lippen spreken van bedroch.

* the. schade

3

Door wijsheyt wort een huis getimmert, ende door verstant salt gesterct worden.

4

Door ^* leeringe) sullen die kelderen veruult worden met alderande costelicke ende zeer scoone rijcdommen.

* th. bescheydentheyt

5

Een wijs man is sterc, Ende een ^* geleert man is sterck ende machtich van crachten.)

* th. bescheyden man is beter, dan die sterc is van crachten

6

Want met raet moetmen oorloge voeren, Ende waer vele raetgheuers zijn, daer sal zijn die behoudenisse.

7

Die wijsheyt is den sotte te hooch, Hi en sal sinen mont, inder poorten niet dorren open doen.

8

Wie quaet voorneemt, sal een ^* sot) gheheeten worden.

* the. boeue

9

Des sotten dichten, is sonde, Ende die achterclapper, is een vereysen voor die luyden.

10

Ist dat ghi wanhoept als ghi zijt geuallen, in den dach der banghicheyt, so sal v cracht verminderen.

11

Verlostse die ter doot geleyt worden, Ende diemen ter doot trect, en wilt niet ophouwen te lossen.

12

Segt ghi, Onse crachten ontbreken ons, ⁺ Die de herten van bennen siende is, merct dat, ende die die sielen behout bekennet dat, ende sal vergedlen, den mensche na sinen wercken.

+ B

13

Mijn sone, eet honich want tis goet, Ende honichseem, is soete in uwe kele..

14

Also is die ^* leeringhe) der wijsheyt uwer zielen, ^* Als ghise vindt, so suldy ten laetsten daghe hope hebben.) Ende uwe hope en sal niet vergaen,

* h. kennisse

* thebre. Als ghise vint Ende so is goede hope daer

15

Legt gheen lagen noch en soect gheen ongodlicheyt int huys des rechtuaerdighen, Noch en verwoestet zijn ruste niet.

16

☞ Want een rechtuaerdige sal inden dach seuenmael vallen, ende wederomme opstaen, Maer die ongodlike sullen in ongeluck vallen.

17

En verblijt v niet als uwe viant geuallen is, Ende v herte en si niet vrolijc in zijn ongeluc,

18

⁺Op dat messcien die HERE dat sage, ende het hem mishaechde Ende sinen toorn van hem wech neme.

+ C

19

En kijft niet metten boosen, ende en benijt den ongodliken niet.

20

Want die quade en hebben geen hope van toecomende dingen. Ende die keerse inder laterne der ongodliker, sal worden wtghebluscht.

21

Mijn kint, vreest den HEERE ende den coninc, Ende en menget v niet met die ^* muytmakers ende achterclappers.)

* the. oploopers

22

Want haer ongheual sal bottelijck opstaen, Ende wie weet haerder beyder val?

23

Dit ^* behoort oock toe) den wisen, dat daensien der personen inden oordeel niet goet en is

* the. coemt oock van

[p. D1r]

24

Wie totten ongodliken spreect, ghi zijt rechtuaerdich, dien sullen vloecken die luyden, ende dien sullen haten die gheslachten.

25

⁺Maer die hem straffen, sullen geloeft worden, Ende daer coemt een ^* gebenedijnge) ouer hen.

+ D

* the. goede gebenedijnghe

26

Hi sal cussen metten lippen, Soo wie rechte woorden antwoort.

27

Beschicket v werc daer buyten, ende bearbeit naerstelijc uwen acker, Daer na timmert v huys.

28

En zijt gheen getuyge sonder oorsake tegen uwen naesten, Ende en ^* bedriecht al suygende) niet met uwen lippen.

* thebre. bedriecht.

29

En segt niet ghelijcmen mi doet, soo wil ick weder doen, Ende eenen yegelijcken na zijn werc verghelden.

30

Ick ghinc voor den acker des luyen, Ende voor den wijnberch des sotten mans.

31

Ende siet, doen was hi al met netelen veruult, Ende die ^* doornen) hadden dien ouerdect ouer al, ende die muer was ingheuallen.

* the. dijstenlen

32

Doen ic dat sach, doen nam ict ter herten, Ende mi daer aen spiegelende nam onderwijs daer wt. ^* Ghi trage, hoe langhe suldi slapen, hoe langhe salt wesen ende ghi sult van uwen droome opstaen?)

* ten is niet int hebr.

33

Ghi sult een weynich slapen, ende een weynich sluymeren, ende een weynich die handen tesamen doen, dat ghi rustet,

34

Maer uwe armoede sal v comen gelijc een wandelaer, ende v nootsaeck om te bidden, gelijc een gewapent man.

§ Datmen die woorden verswighen sal, Van die onsuyuerheyt te verworpen, Van die ootmoedicheyt, van eenen valschen getuyghe, Van eens vrecken droefheyt, van die verstooringhe, Van die oueruloedicheyt der woorden.