De Vorsterman Bijbel

§ Dat .xxiij. Capittel.

1

⁺ALs ghi sidt, om te eten met den princen So merct daer naerstelijcken op, wat voor v aensichte gheset wort.

+ A

2

⁺ En stellet een messe in v kele, Ist nochtans bi alsoo, dat ghi v ziele in uwer macht hebbet.

+ § Stelt een mes etc. Dat is een ghemeyn woordt ghelijcmen seyt Tis quaet metten heeren kerssen eten etc.

3

En wenschet v niet van zijnder spisen, in dewelcke is der loghenen broot.

4

En wilt niet arbeyden, om rijck te worden, Maer ^* stelt uwer voorsichtigher wijsheyt maniere.)

* th. Laet af van uwen verstande

5

En laet uwe oogen niet derwaerts vlieghen tot rijcdomme die ghi niet hebben en moecht, want si sullen maken voor hen seluen vlogelen, ⁺ gelijc eenen Arent, ende vliegen ten hemel.

+ B

6

En etet gheen broot bi eenen nidigen, ende en wenschet v niet van zijnder spisen

7

Want inder gelikenis eens ^* waerseggers ende ghuychelaers oordeelt hi, dat hi niet en weet, Hi sal seggen) eet ende drinct, Ende zijn herte en is nochtans niet met v.

* the. onweders in zijnder zielen so seyt hi,

8

Vwe beten die ghi gheten hebt moet ghi wtbraken, Ende sult uwe lieflike woorden verliesen.

9

En spreect niet voor der onwijser ooren, want si sullen verachten die leeringe uwer reden.

10

^* En raect der cleynder palen niet) Ende en ghaet niet opter weesen acker,

* thebre En dringt niet achterwaerts de oude palen

11

want haer ^* naeste vrient) is machtich, ende die sal haer sake tegen v oordeelen.

* the. verlosser

12

Laet uwe herte gaen totter leeringe, ende uwe ooren totten woorden der ^* konsten.)

* th. bescheydentheyt

13

En wilt niet onttrecken den iongelinc, die onderwisinge, Want al slaet ghi hem metter roe-

[p. C8v]

den hi en sal daer niet af steruen.

14

Ghi sult hem slaen metter roede, ⁺ Ende ghi sult zijn ziele vander hellen verlossen.

+ C

15

Mijn sone, ist dat uwen moet wijs is, so sal mijn herte met v vrolijck zijn.

16

Ende mijn nieren sullen van blijschappen opspringhen, Als uwe lippen spreken, dat recht is.

17

V herte en volghe niet na in liefden, die sondaers, Maer weest daghelics in der vreesen des HEEREN,

18

Want ghi sult int eynde die hope hebben, Ende uwe verwachten, en sal niet wech ghenomen worden.

19

Mijn sone, hoort ende zijt wijs, Ende schict v herte wel opten wech.

20

En wilt niet zijn in die maeltijden der dronckaerden, Noch in die houeringen der ghenen die vleesch om te eten gheuen.

21

Want die hen tot droncken drincken gheuen, en die ghelaghen te voren gheuen, sullen ^* verteert worden) ende die ^* slapinghe sal met doecken) ghecleet worden.

* the. verarmen

* th. slapers moeten met geschuerde cleederen

22

Hoort uwen vader, die v gewonnen heeft, ende en veracht uwe moeder niet, als si out geworden is.

23

Coopt waerheyt, ende en wilt niet vercoopen wijsheyt, leeringe ende verstandenisse.

24

Een vader des rechtuaerdigen verblijt hem met blijschappen, Ende wie eenen wisen gewonnen heeft, sal hem daer in verblijden.

25

⁺Laet hen uwe vader ende moeder verbliden, Ende vrolijck zijn die v gebaert heeft.

+ D

26

Gheeft mi, mijn sone, v herte, ende laet ^* uwe ooghen mijn wegen wel verwaren.)

* the. uwen ooghen behaghen

27

Want een hoere is een diepe gracht, ende die vremde vrouwe is eenen enghen put.

28

Si leet oock inden wech ghelijc een ^* moordenaer), Ende die si onachtsaem vint ^* die doot si.)

* th. roouer

* th. vergadert si

29

Wie heeft wee? Wiens vader is wee? Wie heeft twist? Wie heeft kuylen?

Wie heeft wonden sonder oorsake? Wie heeft roode ooghen?

30

En zijnt niet die ghne, die inden wijn woonen, ende doen naersticheyt, om potten wt te drincken?

31

En siet den wijn niet aen, als hi rootachtich is, ende als in tgelas zijn verwe blincket, Hi ghaet saechte inne.

32

Maer ten laesten sal hi biten ghelijc een slanghe, ^* Ende zijn fenijn wtstortten, ghelijck een Basiliscus.)

* th. ende breydet hem wt ghelijc een ader

33

Vwe oogen sullen vremde wiuen sien, Ende v herte sal verkeerde dingen spreken,

34

Ende sult zijn gelijc een die midden in die zee slaept, Ende gelijc een ^* stierman die slaepdroncken is, ende heeft den boom des roers verloren,

* the. die bouen opten mastboom slaept

35

ende ghi sult segghen) Si slaen mi, maer ten doet mi niet zeer, Si trocken mi, maer ick en gheuoelde dat niet. Wanneer sal ick ontwaken, ende ^* wederomme wijn) vinden.

* theb. meer

§ Vander wijsheyt ende vanden wisen man, Ende van den [kolom] dwaes ende vanden mistroostigen, Van die ghene die ter doot gleyt worden Van des rechtuaerdigen ende des viants val, Ende van die traecheyt.