De Vorsterman Bijbel

§ Dat .xx. Capitt.el.

1

^* DIe wijn is een oueruloedich oncuysch dinck, Ende dronckenschap twist, wie daer lust toe heeft, en sal nimmermeer wijs wesen.

* thebr. Die wijn maket spotters, ende starcken dranc maect wiltheyt

2

Dat veruaeren des conincs, is ghelijck dat brisschen eens ^* leews) Wie hem vertoornt, die sondicht teghen zijn ziele.

* th. ionghe leews

3

Het is den man een eere, die hemseluen van den twiste scheyt, Maer alle sotten, mengen hen met kiuinghe.

4

Om der kouden wille en wilde die trage niet ploegen, So sal hi dan inden somer broot bidden, ende men en sal hem niet gheuen.

5

Den raet in eens mans herte, is gelijc diep water, Maer een verstandich man sal ^* dien wtputten.)

* the. die wtbrengen

6

⁺Vele menschen worden ghenoemt ontfermhertich te wesen, Maer wie sal vinden eenen ghetrouwen man?

+ B

7

Een rechtuaerdige, die in zijnder eenuoudiger simpelheit wandelt, Die sal salighe kinderen na hem laten.

8

Een coninc die opten stoel sidt te oordeelen, verstroyt alle arghe met sinen aensiene.

9

Wie mach segghen, mijn herte is reyn, ende ic ben suyuer van sonde?

10

Menigherhande gewichte ende mate, is beyde vereysinghe bi den HEERE.

11

Ooc kentmen een knechtken aen zijn doen, oft zijn wercken reyn ende oprecht zijn.

12

Een hoorende oore, ende siende ooghe, die heuet die HEERE beyde ghemaect.

13

En bemint den slaep niet, dat v niet en verdrucke die armoede, Doet op uwe ooghen, ende wort verzadet van broode.

14

⁺Quaet ist, quaet ist ^* seyt alle cooper) ende alst wech ghegaen is, soo beroemtmen dies dan.

+ C

* th. seitmen alsment heuet

15

Daer is gout ende veel perlen, Maer bescheyden lippen der konsten, zijn een costelijc vat

[p. C7v]

16

Neemt dien zijn cleet die voor eenen vremden borghe wort, ende pandet hem, om des onbekenden wille.

17

Dat valsche broot der logenen, is den mensche soet, Maer namaels sal hem den mont vol keselinghen worden.

18

^* Gedachten) worden met raet gesterct, Ende oorloghe salmen met regiment voeen.

* th. aenslaghen

19

En menghet v niet metten ghenen die heymelijcke dinghen openbaert, ende die bedriechlijck wandelt, ende ^* verbreyt) zijn lippen.

* th. bedrieghet met

20

Wie zijn vader ende zijn moeder vloect, dies licht sal wtgedaen worden midden in die duysternisse.

21

⁺Die erffenisse daermen toe hast inden beghinsel, sal int eynde gebenedijnge deruen.

+ D

22

☞ En segghet niet, ick wil quaet loonen met quaet, Maer verbeit den HEERE, ende die sal v verlossen.

23

Menigherley gewichte is bi den HEERE, een vereysen, Ende een valsche waghe, en is niet ghoet.

24

Al der menschen ghanghen worden vanden HEERE geschict, Maer wie vanden menschen sal moghen verstaen sinen wech?

25

Het is den mensche eenen ^* val, den heyligen verlouen, ende daer na die geloften te wederroepen.)

* thebr. stric dat heilige te lasteren ende daer na met geloften omgaen

26

Een wijs coninck verstroyt die ongodlijcke , Ende ^* buycht daer ouer den gewelfden boghe der triumphen.)

* the. brengt dat rat op hen

27

Dat licht des HEEREN, is des menschen adem, Die welcke ^* ondersoect alle heymelicheden des buycs.)

* theb. gaet door tgheheel lichaem

28

Barmherticheyt ende waerheyt bewaren den coninc, ende sinen stoel wort met goedertierenheyt gheuesticht.

29

Der iongelingen ^* verblidinghe) is haer cracht, Ende grijs har is der ouders eerweerdicheyt.

* theb. prijs

30

^* De blauwicheit der wonden wijst af dat quade, ende slagen zijn int hemelike des lichaems.)

* th. wonden verdriuen dat quaet, ende slaghen tgheheele lijf

§ Van eens conincs herte, Van dat lof der barmherticheit ende des rechts, van dongodlike ghewelt, Van een kijfachtich wijf, Van Christus verwinninghe, vanden hoouaerdighen, Van den traghen, Ende vander ongodliken offerhande, van eenen loghenachtighen ghetuyge, van eenen onderdanighen man