De Vorsterman Bijbel

§ Dat .xvi. Capittel

1

^+* HEt behoort den mensche toe, zijn ziele te bereyden, ende den HEERE die tonge te regeren.

+ A

* h. Die mensche nemet wel vore ter herten maer vanden HEERE coemt dat antworden der tongen, Eenen yegeliken duncken zijn wegen suiuer te zijn. Maer die HEERE drijft den moet. Beueelt

2

Alle die weghen des menschen zijn , sinen ooghen openbaer, Maer die HEERE is die wegher der gheesten.

3

Ontdect) den HEERE, uwe wercken, So sullen uwe opsetten voort gaen.

4

Die HEERE heeft alle dinghen ghemaect, om zijns selfs wille, Ooc den ongodliken, totten quaeden daghe.

5

Een stout herte, is den HEERE een agriselicheyt, Ende en sal niet onschuldich zijn, al dedemen alle die handen te samen.

6

Door barmherticheyt ende waerheyt, wort die misdaet versoent, Ende door die vreese des HEEREN, schouwetmen dat quaet.

7

Als yemants weghen den HEERE wel behaghen, Soo sal hi ooc sine vianden totten vrede bekeeren.

8

Het is beter weynich met rechtuaerdicheit, dan vele vruchten met boose onrechtuaerdicheyt.

9

Des menschen herte oordineert sinen wech, Maer ^* het behoort den HEERE, te vorderen) sinen ghanck.

* th. die HERE vordert.

[p. C6r]

10

Wanneer prophecie int herte des conincs is, so ^* en sal sinen mont) int oordeel niet faelgeren.

* the. sullen zijn lippen

11

⁺Wage ende gewichte zijn die oordeelen des HEEREN, Ende alle ^* steenen der werelt) zijn sine wercken.

+ B

* th. ponden in den sac.

12

Die onduechdelijcke wercken doen, zijn den coninck afgriselic Want door rechtuaerdicheit wort den throon gheuesticht.

13

Rechtuaerdige lippen zijn der coninghen welbehaghen, Ende so wie oprechtelic spreect, die sal ^* gheschicteliken gheuordert) worden.

* th. bemint

14

Die verbolgentheyt des conincs, is een dootlijck bode, Maer een wijs man sal hem versoenen.

15

In die vrolicheit des conincs aensichts is tleuen.

Ende zijn goedertierenheit is ghelijck een auontregene

16

^* Besidt) die wijsheyt, Want si is beter, dan gout, Ende verwerft verstandighe voorsichticheyt, want si is edelder, dan siluer.

* the. verwerft

17

Der oprechtigher wech schouwet dat arghe ende wie sinen wech bewaert, die behoudt zijn leuen.

18

Hoouaerdicheit ghaet voor dat verderuen henen, Ende voor den val sal den gheest verheuen zijn.

19

Het is beter vernedert te wesen met den saechtmoedighen, dan roof wt te deelen met den hoouaerdighen.

20

Die ^* geleert is int woort) die sal goede dinghen vinden, ende die is salich, die in den HEERE hopet.

* h. een sake cloeckelijc voert

21

Die wijs is van herten, sal voorsichtich genoemt worden, ende die soet is van ^* wtsprake sal meerder dinghen vinden.)

* th. lippen, betert, die leeringhe.

22

Die onderwijsende leeringhe, is den besittere een fonteyne des leuens, ⁺ Maer die leeringhe der sotten, is sotheyt.

+ C

23

Des wijsen herte, sal onderwijsende, sinen mont leeren, ende sal toe doen bequaem beuallicheit, sinen lippen.

24

Welghestelde woorden zijn honichraten, Soeticheyt der zielen, ende ghesontheyt der ghebeenten.

25

Daer is eenen wech, die den mensche recht dunct te wesen, Maer zijn laetste eynden leyden ter doot.

26

^* Een siele des arbeyders arbeit voor haer seluen) Want daer toe heeft haer haeren mont gedwonghen.

* th. Een onsalige ziele is haer seluen swaer

27

^* Een ongodlijc) man grauet na quaet, ⁺ ende in sinen lippen bernet vier.

* the. Belial

+ D

28

Een verkeerde mensche verwect twist, ende een aenbrengher maect princen oneens.

29

Een onrechtuaerdich mensch ^* suycht in quaet) sinen vrient, ende en leyt hem op gheenen goeden wech.

* th. loct.

30

^* Wie dat met verbaesden oogen quaet dencket, bijtende op zijn lippen, sal hijt quaet volbrenghen.)

* h. wie metten oogen wenct, en denct niet goets, Ende wie metten lippen teeken doet, die volbrenget tquaet

31

Die ouderdom is een croone der eerwaerdicheit, Die in der rechtuerdicheits weghen sal geuonden worden.

32

Een verduldige, is beter, dan een starcke [kolom] man, Ende die zijns moets heere is, dan die steden winnet.

33

Tlot wort inden schoot gheworpen, Maer vanden HEERE, worden si gheeyndet.

§ Een blijnde consciencie, Ende vanden kender der herten, van de alder bequaemste perle van eenen rechten vrient ende den regeerder der zielen, van die ooghen der sotten, vanden rechtuaerdighen rade, van die tonghe te dwinghene.