De Vorsterman Bijbel

§ Dat .xiiij. Capittel.

1

⁺EEn wijse vrouwe, timmert haers selfs huys, maer die onwise sottinne, sal ooc een huys dat getimmert is, metten handen in stucken breken.

+ A

2

Wie ^* God) vreest, die gaet op die rechte bane ^* die wort van hem versmaet die in eenen oneerliken wech gaet)

* h. den HEERE

* the. Wie hem verachtet die wijckt wt sinen weghe

3

In den mont des sotten, is die ^* roede) der hoouaerdicheit, maer die lippen der wijsen bewarense.

* the.cepter

4

Waer gheen ossen en zijn, daer is die kribbe ydel, Maer waer ^* veel koren zaets is, daer is openbaer die starcheyt des ossen.)

* th. die osse dadich is, daer is veel incomens.

5

Een ghetrouwe ghetuyghe, en liecht niet, maer een valsche geuyghe die brengt loghenen voort.

6

Die spotter soect wijsheyt ende en vintse niet, Maer der verstandighen leeringhe, is licht.

7

Ghaet teghen eenen sotten man, ende hi en kent niet die lippen des voorsichticheyts.

8

Dat is des cloecken mans wijsheyt, dat hi op sinen wegh merct, ende der sotten onwijsheyt ^* is dwalende.)

* the. datter niet dan bedrogh met hen en is

9

Die sotte sal bespotten die sonde, ende die gracie sal woonen onder die rechtuaerdighe.

10

⁺Een herte dat zijnder zielen bedroeffenisse weet, onder des seluen blijschap, en sal hem gheen ander mengen.

+ B

11

Dat huys der ongodliker wort vernielt, maer die tenten der oprechtigher sullen ^* vrucht voortbrenghen.)

* th. meerderen

12

Eenen wech isser die den mensche rechtuaerdich dunct te wesen, maer zijn laetste, leydt totter doot.

13

Dat herte heeft oock smerte in lachen, Ende dat eynde der bliscappen is droefheyt.

14

Die sotte sal van sinen wege veruult worden, maer een goet man sal ouer hem zijn.

15

Een onnoosel ghelooft allen woorden, maer een verstandighe mercket op sinen ghanck.

16

Een wijse vreest, ende schouwet al dat arch is, maer een sot vaerter stoutelijc door.

17

Eeen onuerduldige sal sotheyt doen, maer een voordachtighe hatet dat.

18

Die cleyne kinderen sullen besitten sotheyt, maer die verstandighe sullen ^* die kennisse verwachten.) [kolom]

* th. met bescheydentheyt ghecroont worden

19

Die quade sullen ^* ligghen) voor die goede, Ende die ongodlijcke, voor die poorten des rechtuaerdighen.

* th. moeten bucken

20

Een arme sal ooc hatelijck zijn sinen naesten, ⁺ maer der rijcker vrienden zijnder vele.

+ C

21

Die sinen naesten veracht, doet sonde, maer die der allendigher ontfermt, die sal salich wesen.

22

^* Die ghelooft inden HEERE, heeft die barmherticheyt lief, maer sekerlijc) ^* si dwaelden die quaet doen, die ontfermherticheit ende waerheit, bereiden tgoet)

* ten is niet int hebree.

* h. die archeyt dencken sullen vallen, Maer die goet dencken, dien sal barmherticheyt ende waerheyt geschieden

23

Waermen goeden arbeyt doet, daer is ghenoech, Maer waermen met veel woorden omme gaet, daer is ghemeynlijck gebreck.

24

Den wijsen, is haer rijcdom een kroone, maer die dwaesheyt der sotten, is doch onuoorsichticheyt.

25

Een ghetrouwe ghetuyghe verlost die zielen, Maer ^* die met allen winden hem omme keert, die brengt luegenen voort.)

* h. een cloec lueghenar mist

26

In der vreesen des HEEREN is betrouwen der starcheit, Ende zijn kinderen sullen oock troost hebben.

27

⁺Die vreese des HEEREN, is een fonteyn adere des leuens, op datmen schouwe die stricken des doots.

+ D

28

Die waerdicheyt des conincs, is in die menichte des volcs, ende in die luttelheyt des gemeyn volcs, is die schande van eenen prin

29

Wie verduldich is, die wort geregeert van grooter wijsheit, Maer die onuerduldich is die ^* verheft) sine sotheyt.

* the. thoont

30

Een ghesont herte, is des lichaems leuen, maer nidicheyt is etter den ghebeenten.

31

Wie den behoeflijcken armen leedt doet, die verwijt dat, des seluen scheppere, maer so wie des armens ontfermt, die eert hem.

32

Die ongodlike sal door zijn boosheyt verworpen worde, Maer die rechtuaerdige hoept oock in zijnder doot.

33

In dat herte des verstandigen rust wijsheit ende hi sal ^* allen ongeleerden onderwijsen)

* the. onder de sotten beroemt worden

34

Rechtuaerdicheyt verhooget tvolck, maer die sonde maect dat volck arm.

35

Een kloeck knecht, is den coninck bequaem Maer een onnut knecht, sal sinen toorn verdraghen.

§ Van een goede redene, van die kennisse Gods, van den ongoddeliken offeren, van die vrolicheyt der consciencien, Dat lof der liefden ende vreesen, van der gramscap, traecheyt wijsheyt, ende die weduwe die ghemeynte.