De Vorsterman Bijbel

Dat .viij. Capittel.

1

⁺EN roepet die wijsheyt niet? ende die verstandenisse laet haer stemme hooren?

+ A

2

In die alderhoochste hueuelen, staet si openbaerlijc, aenden wege, ende aen die straten,

[p. C3r]

3

ende omtrent der stadt poorten in die dueren ^* spreect si, seggende)

* th. roept si

4

O ghi mannen, ic roepe tot v, ende mijn stemme tot den kinderen der menscen.

5

Verstaet ghi cleyne kinderen cloecheyt, ende ghi onwise, nemet ter herten.

6

Hooret, want ick sal van grooten dinghen spreken, ende mine lippen sullen opghedaen worden, om rechte dingen te spreken,

7

Want mine kele sal die waerheyt wtspreken, ende mine lippen sullen den ongodliken verachten.

8

Alle die redenen mijns monts zijn recht, Daer en is niet verkeerts noch valschs in.

9

Si zijn alle recht wt, den ghenen diese verstaen, ende oprecht, den genen die kennis vinden.

10

⁺Ontfanct mine castiende onderwisinge, ende niet siluer, ende verkiest die ^* leeringe) meer dan costelijc gout,

+ B

* th. kennis

11

Want wijsheyt is beter dan alle costelike ^* rijcdommen) ende allet datmen wenschen mach, en can haer niet ghelijcken.

* th. peerlen

12

Ic wijsheyt woone inden raet, ende ick ben in die geleerde ghedachten,

13

Die vreese des HEEREN hatet die arghe, die hoouaerdicheyt, den hoochmoet, ende den quaden wech, ende den ^* mont met twee tongen) verachte ic.

* th. verkeerden mont

14

Den raet is mine, ende die rechtuaerdicheyt, ende die voorsichticheyt is mine, ende die starcheyt is mine,

15

Door mi regeren die coningen, ende die wetsetters ^* oordeelen dat recht is)

* h. setten dat recht

16

Door mi gebieden die princen ^* ende die machtige ondersceiden de rechtuaerdicheyt)

* th. ende heerscappen opter aerden

17

Ick beminne die mi beminnen, Ende die ^* tot mi vroech waken) sullen mi vinden,

* thebre. my vroech soecken

18

Rijcdom ende heerlike eere is bi mi, rijcdom van bouen ende gherechticheyt.

19

Mine vrucht is beter dan gout ende ^* costelike steenen) Ende mine ^* spruyten) beter dan wtgecoren siluer,

* h. fijn gout

* th. incomen

20

Ic wandele op ^* die wegen der rechtuaerdicheyt) ⁺ Opter straten des oordeels,

* th. den rechten wech.

+ C

21

Dat ick rijc maken soude, die mi beminnen, ende haere schatten vol soude maken.

22

Die HERE heeft mi ^* beseten) int beghinsel zijnder wegen, Eer hi yet maecte van tbeginne,

* th. gehadt

23

Ic ben ingeset vander eewicheyt, ende vanden ouden tijden, eer die aerde gemaect wert,

24

Die diepten en waren noch niet, doen was ic gereedt, Noch die fonteynen en waren niet wtghespronghen,

25

noch die bergen en waren niet ^* vast staende, door swaer gewichten) voor die hueuelen was ick gereedt,

* the. inghesenkt

26

Hy en hadde daerde noch niet gemaect, ^* noch die riuieren, noch de harren) des aertrijcs,

* the. ende wat daer aen is noch de berghen.

27

Doen hi die hemelen bereyde, doen was ick aldaer. Doen hi die diepten met sinen perc beuinck,

28

Doen hi de ^* lochte) bouen vast hechtede, Doen hi ⁺ lostede) die fonteynen der wateren,

* th. wolcken

+ th. vestichde

29

Doen [kolom] hi der zee, tperc stelde, ende de wateren een wet settede, dat si niet en souden ouer gaen haer palen. Doen hi dat fundament der aerden leyde,

30

was ic bi hem, ende spoedichde dat, ⁺ Ende hadde minen wellust daghelics, ende speelde voor hem alle tijt,

+ D

31

Ende speelde op sinen aertbodem, ende mijn wellust is, met den kinderen der menschen te wesen.

32

Also hoort dan mi nv, mine kinderen, Salich zijn die ghene, die mijn wegen bewaren,

33

Hoort die castiende onderwisinge, ende wort wijs, ende en wiltse niet verworpen.

34

Salich is die mensche, die mi hoort, ende waket aen mijnder dueren dagelics, ende met eere waernemet aen die stijlen mijnder dueren.

35

Wie mi vindt, die vindt dat leuen, ende sal salicheyt vanden HEERE scheppen.

36

Maer die tegen mi sondicht, die quetst sine ziele, Alle die mi haten beminnen die doot.

§ Van die wercken der wijsheyt, Ende roept ons van die kintsheyt, Ende van haerder beloften, Ende van die ouerspelighe vrouwe ketterije.