De Vorsterman Bijbel

§ Dat .vij. Capittel.

1

⁺MIne kint, bewaert mijn redenen, ende verbercht mijn geboden bi v ^* Mijn sone, eert den HEERE, ende ghi sult weluaren, ende behaluen hem en vreest gheenen vremden)

+ A

* ten is niet int heb.

2

Houdt mijn gheboden, so suldi leuen, ende mijn wet, gelijc uwen ooghen appel.

3

Bintse aen uwe vingeren, Schrijftse op die tafele ws herten.

4

Segget totter wijsheyt, ghi zijt mijn suster, ende noemt die voorsichticheyt uwe vriendinne,

5

Op dat ghi bewaert wort van haer voor dat vremde wijf, voor een andere die haer woorden soet maect. [kolom]

6

⁺Want door die venster mijns huys, sach ic door die tralien ^*) eenen iongelinc,

+ B

* the. onder den thoren

7

ende sach cleyne kinderen, ende ic wert ghewaer onder die kinderen eens sotten ionghelincks,

8

die ghinck opter straten aen eenen hoeck, ende ghinc opten wech aen haeren huyse,

9

inder schemeringe aenden auont des daechs, doent nacht wert ende doncker was.

10

Ende siet, daer gemoette hem een wijf in lichter vrouwen cieringe, ^* bereyt om zielen te bedriegen) clapachtich, wilt ende ongebonden,

* the. listich.

11

dat haer voeten in haeren huysen niet gebliuen en konden,

12

nv is si buyten, nv op die straten, ende leget lagen in allen hoecken,

13

Ende als si den iongelinc gegrepen hadde, custe si hem, ombeschaemt, ende sprack tot hem,

14

Ick hebbe huyden ^* offerhande) voor mi betaelt voor mijn gelofte,

* theb. vreedsaem offer

15

Daeromme ben ic wtgheghaen, om v te ghemoeten, begerende v te sien, ende hebbe v gheuonden,

16

Ick hebbe mijn bedde ^* in een geuoecht met coordekens) ende ouerdect met ghebeelde tapisserie wt Egypten,

* thebr. met vercieringe verciert

17

⁺Ic hebbe minen legher met myrren, Aloes en caneel bespreyt,

+ C

18

Coemt, laet ons vanden borsten droncken worden, ende ghebruycken ^* die omhelsingen) die wi begeert hebben tot dat den dach verlichtet,

* the. die liefde.

19

Want die man en is niet thuys, hi is eenen zeer verren wech getrocken,

20

Hi heeft den ghelt sack met hem genomen, ^* Inden dach der volder Manen sal hi wederomme thuys comen,)

* thebr. Wie weet wanneer hi sal thuys comen.

21

Si stricter hem toe met veel woorden, ende track hem daer inne met haeren smeekende lippen,

22

Hi volchde haer ter stont nae, ghelijc eenen osse ter vleeschbanck gheleydt wort, ende gelijc ^* een verweent lam, ende hi en weet niet, dat die sot totten boeyen geleydt wort,)

* the. totten boeyen, daermen die sotten castijt

23

tot dat hem den pijl die leuere splijtet, Ghelijck een voghel totten stricke haestet, ende en weet niet dattet hem dat leuen gheldet.

24

⁺So hoort mi nv, mijn kinderen, ende aenmerct die woorden mijns monts.

+ D

25

En laet v herte niet wtghetoghen worden op haeren wech, ende en laet v niet verleyden op haerder banen,

26

Want si heefter vele ghewont ende neder geworpen, ende alderley machtige zijn van haer vermoort,

27

Haer huysen zijn helsche wegen, daermen onderwaeerts varet in des doots camere.

§ Hoe die wijsheyt haer leeringe acht, ende bouen alle rijcdommen stelt Ende seyt dat si eewich is den hemelscen vade ghelijc, ende met haer alle dinck ghescapen heeft.