De Vorsterman Bijbel

§ Dat .ix. Capittel.

1

⁺DIe wijsheyt timmerde haer huys, ende hieuw seuen calomnen,

+ A

2

ende si ^* dede haere offerhanden) ende mengde den wijn ende bereyde haere tafele,

* the. sloech.

3

Ende sandt haere deernen wt, om te nooden op dat pallays, ende die vesten der stadt,

4

Wie een cleyn kint is, die come herwaerts tot mi, Ende totten onwisen sprac si,

5

Coemt, etet van minen broode, ende drincket vanden wijn, dien ic v gemengt hebbe.

6

Verlaet die kijntsheyt, ende leuet, ende gaet door den wech der voorsinnicheyt.

7

⁺Wie den spotter castiende onderwiset, die doet hem seluen schande, ⁺ Ende wie den ongodliken straft, die wint voor hem seluen een smette,

+ B

+ § spotter, heet Salomon al die verachters. ende wederspannighe der waerheyt.

8

En wilt niet straffen den spotter, op dat hi v niet en hate, Straft den wisen, ende die sal v beminnen,

9

Gheeft den wijsen een oorsake, soo sal hi noch wijser worden, Leert den oprechten, ende hi sal haesten om te ontfanghen.

10

Der wijsheyt beginsel, is die vreese des HEREN, Ende die verstandenisse is die kennisse der heiliger dingen,

11

want door mi sullen uwe dagen vermenichfuldicht worden, ende die iaren ws leuens sullen vele worden.

12

Sijt ghi wijs, so zijt ghi v seluen wijs. Sijt ghi een spotter, so sult ghi alleene dat quaet ongeluc dragen.

13

Een dwaesachtich roepende onrustich wijf, vol vleeschelike wellusticheyt, en weet niet,

14

die sidt in die duere haers huys opten stoel, in een hooge plaetse van die stadt,

15

om te nooden alle die voorbi den wech gaen, ende die haeren wech wandelen,

16

Wie is cleyn ende onwijs, die come tot

[p. C3v]

mi herwaerts, Ende totten sotte spreect si,

17

Die ghestolen wateren, zijn veel soeter, Ende dat verborghen broot, is vele ghenoechliker.

18

Maer hi en weet niet dat daer ^* ruesen) zijn ende haere gasten in die diepte der hellen. ^* Want die met haer tsamen geuoecht wordet, sal neder dalen ter hellen, Want die van haer wech ghaet, sal behouden worden.)

* th. dooden.

* ten is niet int hebree.

§ Van den wijsen ende dwasen sone, van den rechtuaerdighen ende ongoddelijcken vanden oprechten ende boosen, van die liefde ende vanden haet, ende van dat goet ende quaet der tonghen.