De Vorsterman Bijbel

§ Dauids .C. ende xliiij. Psalm. ⁺ § Exaltabo te deus.

+ int. hebr. den C.xlv. psal.

1

IC sal v verheffen mijn God ghi die zijt een coninc, Ende uwen naem louen altoos, ende van eewe tot eewe.

2

Ic sal v dagelics gebenedijen, ende uwen naem louen altijt, ende van eewe tot eewen.

3

⁺Die HERE is groot ende seer loeflic, ende zijn grootheit en is niet begripelick.

+ A

4

Kints kinderen sullen uwe wercken prijsen, ende van uwer macht seggen.

5

^* Si sullen spreken) die mogentheit der eerlicheit uwer heerlicheit, ende vertellen uwe wonderlicheden.

* th. ic sal spreken

6

Ende si sullen spreken vander stercten uwer wonderen, ende si sullen vertellen uwe grootheit.

7

Si sullen wtspreken die gedachtenisse vander oueruloedicheit uwer soetheyt Ende van uwe rechtuaerdicheit hen verbliden.

8

Die HERE is genadich ende ontfermhertich lancmoedich, ende van groter bermherticheit

9

Die HERE is allen menschen vriendelijck Ende zijn ontfermhertichheden bouen alle zijn wercken.

10

⁺HERE alle uwe wercken moeten v dancken Ende uwe heyligen moeten v louen.

+ B

11

Si sullen seggen vander eeren ws conincrijcs, ende spreken van uwer macht.

12

Op dat si uwe macht den kinderen der menscen kenlijc maken, Ende die eerlijcke der mogentheit ws conincrijcs.

13

V rijck is een rijc tot allen tiden, Ende uwe heerscappie duert van geslachte tot geslachte.

14

Die HERE onderhout alle die daer vallen Ende rechtet op alle die nedergeslagen zijn.

15

Alder oogen verhopen op v, Ende ghy geeft hen hen spijse tot zijnder bequamer tijt.

16

⁺Ghi doet uwe hant open, ende veruullet al wat leeft met uwe ghebenedijnge.

+ C

17

Die HERE is rechtuaerdich in alle sinen wegen, Ende heylich in alle zijn wercken.

18

Die HERE is bi alle die hem aenroepen, alle die hem ^* inder warachticheit) aenroepen.

* th. trouwelijck

19

Hy sal doen dat welbehagen der ghenen die hem vreesen, Ende hi sal haer gebeden verhooren, ende salse ghesont maken.

20

Die HERE bewaert alle die hem beminnen, Ende sal alle ongodlike vernielen.

21

Minen mont sal des HEREN lof segghen

[p. B8r]

Ende alle vleesch loue sinen heylighen name altoos ende eewelijck.