De Vorsterman Bijbel

§ Dauids Psalm liet, Den .c. ende .vij. Psalm. ⁺ § Paratum cor.

+ int heb. den C.viij. psa

2

⁺GOd, mijn herte is bereit ^* mijn herte is bereit), Ick sal singen, ende dichten in mijn eere.

+ A

* ten is niet int hebree.

3

Staet op souter ende Harpe Ick sal opstaen inder dagheraert.

4

Ick sal v beliden HEERE, onder die volcken, Ick sal uwen lof singen in die geslachten der heydenen.

5

Want uwe ontfermherticheit is groot tot bouen den hemel, Ende uwe waerheit tot aen die wolcken.

6

O God verheft v bouen die hemelen, ende uwe eere bouen alle dat aertrijck.

7

Op dat uwe lieue vrienden verlost worden, maect gesont met uwer rechter hant, ende verhoort mi.

8

God heeft ghesproken in zijn ^* heylicheyt), Ic sal bliden zijn ende wtdeelen Sichem, ende ic sal afmeten dat dal ^* der tabernakulen.)

* theb. heilige plaetse.

* h. Sucoth

9

⁺Galaad is mijn, Manasses is ooc mijn, ende Ephraim is die stercheyt mijns hoofts, Iuda is mijn ^* coninck,)

+ B

* th. leeraer

10

Moab is mijnder hopen coperen pot. Ic sal minen schoen ouer Edom wtstrecken die vremdelingen zijn mijn vrienden geworden

11

Wie sal mi voeren in die vaste stadt? wie sal mi leyden in Edom?

12

Suldijt niet doen o God die ons hebt verstooten, ende en trect niet wt God, met onsen heyrcrachten.

13

Doet ons bistant inder noot, Want menschen hulpe is ydel

14

In God willen wi stercheyt bewisen, Hi sal onse vianden te niet doen.