De Vorsterman Bijbel

§ Dauids .C.v. Psalm. Alleluya. ⁺ § Confitemini domino.

+ int. heb. den C.vi. psal.

1

^* BElijdet) den HEERE, want hi goet is, want zijn bermherticheyt is inder eewicheyt.

* the. danct

2

⁺Wie sal die machticheden des HEEREN wtspreken? ⁺ Ende verhoort maken alle sine louen?

+ A

+ Iudi. iij.c.

3

Salich zijn si die dat oordeel bewaren, Ende doen rechtueerdicheyt in alle tijt.

4

HEERE ghedenct onser, na uwen goeden wille, dien ghi tot uwen volck hebt, Besoeckt ons, met uwe salicheyt.

5

Dat wi beschouwen, dat goet uwer wtuercorenen, ende ons verblijden, in die blijschappe ws volcs, Ende mi verhueghen, met uwen erfdeele.

6

Wi hebben gesondicht met onsen vaderen, Wi hebben onrechtueerdeliken ghedaen ende boosheyt volbracht.

7

⁺Onse vaderen in Egypten, en verstonden uwe wonderen niet, ⁺ Si en ghedachten niet die menichten uwer ontfermherticheden.

^* Ende waren verweckende uwen toorne opclimmende in die zee) te wetene, aen de roode zee.

+ B

+ Iud. vij.b

* th. Ende waren onghehoorsaem aen die zee

8

Maer hi behieltse om zijns naems wille dat hi sine machticheyt bekent soude maken.

9

Ende hi berispte die roode zee, doen wert si drooge, Ende hi leydese door die diepten

[p. A8v]

gelijck in die woestine.

10

Ende hi halpse vander hant, des ghenen diese haette, ende hi verlostese vander hant des viants.

11

Ende hi bedecte haer wederpartijders met water, datter niet een ouer en bleef te liue.

12

Doen gheloofden si, aen sine woorden, ende songhen sinen lof.

13

Maer si vergaten terstond zijnder wercken, si en behielden sinen raet niet.

14

Ende si werden belust inder woestinen, ende temteerden God, in die plaetse sonder water,

15

⁺Ende hi gaf hen haer bede, Ende seyndede ^* versaetheyt in haere zielen.)

+ C

* h. genoech nae hueren wille

16

Ende si verwecten Moysen inden leger, Aaron den heylighen des HEEREN.

17

Die aerde dede haer open ende verslont Dathan, ende bedecte die vergaderinge Abiron.

18

Ende vier wert in haer ^* synagoge) aengesteken, Die vlamme verbrande de ongodlike.

* the. vergaderinghe

19

Ende si maecten een calf in Oreb, Ende aenbaden ^* eenen ghehouwen afgod)

* the. dat gegoten beelt

20

Ende veranderden haer eere, In een ghelikenisse eens ^* calfs dat) hoy etet.

* thebre. osse die

21

Si vergaten Gods haers salichmakers, Die so groote dingen in Egypten gedaen hadde,

22

Wonderlicheden inden lande Cham, ende veruaerlijcke wercken aen die roode zee.

23

Ende hi sprack, Dat hise vernielen soude, En hadde Moyses zijn wtuercorene niet ghestaen uoor hen, teghen den brueke, Dat hi sine verbolghentheyt af soude keeren, op dat hise niet verstroyen en soude.

24

Ende si achteden voor niet, dat lant het welck weert was, begheert te worden. Si en gheloofden sinen woorde niet,

25

ende murmureerden in haer tenten, Si en gauen der stemmen des HEEREN geen gehoore.

26

Ende hi hief sine hant op teghen hen, Dat hise neder soude slaen, inder woestinen.

27

Ende haer saet onder die heydenen soude worpen ende verstroyense in die landen.

28

Ende si hebben ghewijt geweest Beelphegor ende aten vander offeranden der dooden.

29

Ende vertoornden hem met haeren doene, Doen vermenichfuldichden die plaghen oock onder hen.

30

⁺Phinees stont, ende slichte die sake, Doen wert die plage gheweret.

+ D

31

Ende het wert hem gherekent tot rechtueerdicheyt, van gheslachte tot gheslachte, tot inder eeuwicheyt.

32

Ende si vertoornden hem aen tgeschilwater, Ende ^* Moyses is ghequelt) om haeren wille,

* th. het ginc moisi qualijck.

33

^* Want si sinen geest tot gramscap verwecten) [kolom] Ende hi ondersceydet met sinen lippen,

* the. want si waren sinen gheest ongehoorsaem

34

Si en hebben niet vernielt die volcken, Daer af hen die HEERE gheseyt hadde.

35

Ende si mengden hen onder die heydenen, Ende leerden haer wercken,

36

Ende dienden haeren afgoden, Die waren hen tot verargeringhe.

37

Ende si offerden haer sonen, ende haer dochteren den ^* duuelen.)

* th. den veltduuelen

38

Ende stortteden ontschuldich bloet, dat bloet haerder sonen ende haerder dochteren die si offerden den afgoden van Chanaan. Ende dat lant is beulect met bloedige sonden,

39

Ende dat aertrijc is besmet met haer wercken Ende in haer nieuwe vonden, nhebben si van god met afgoden gheboeleert.

40

Doen verbolch die toornicheyt des HEEREN, ende creech een afgriselicheyt aen sinen erfdeele.

41

Ende gafse in die handen der heydenen, Dat ouer hen heerschapten, diese haten.

42

Ende haer vianden queldense zeere, ende werden verootmoedicht onder haere handen,

43

hi verlostese dicwils. Maer si verwecten hem tot stuerheyt met haeren voornemen, Ende werden vernedert door haer misdaet.

44

Ende si sach haeren noot aen, doen si gequelt werden, ende hi verhoorde haere ghebeden,

45

Ende ghedacht voor hen op zijn verbont, Ende het berouwede hem na sine menichfuldicheden der barmherticheyt.

46

Ende gafse tot ontfermherticheyt, Voor alle diese gheuanghen hadden.

47

Maect ons salich HEERE onse Godt, Ende brenct ons tesamen wt den heydenen. Dat wi ^* belijden) uwen heyligen name, ende ^* glorieren) in uwen loue.

* th. dancken

* the. beroemen

48

Ghebenedijt si die HEERE die God van Israel van eewicheyt tot eewicheyt, Ende alle tvolc segghe, dat moet so gheschieden ^* dat moet so gheschieden.)

* thebr. Alleluya