De Vorsterman Bijbel

§ Dauids .C. ende .iij. Psalm. ⁺ § Benedic.

+ int. heb. den C.iiij. psal

1

^* GHebenedijt) den HERE mijn ziele, HEERE mijn God, ghi zijt zeer heerlijck gheworden, Belijdinge ende vercieringe hebt ghi aenghedaen.

* theb. louet

2

Ghi dect v met licht gelijc met eenen cleede, Ghi recket wt den hemel, gelijck een ^* vel.)

* h. gardine

3

Ghi weluet zijn ouerste met watere, Ghy maect v de wolcken tot ^* uwe opclimminge) ende gaet op die vederen des wints.

* theb. uwen waghen

4

Ghi maect uwe engelen ^* gheesten), ende uwe dienaers als bernende vier.

* the. winden

5

Ghi die dat aertrijc fundeerde op sinen bodem, dattet niet en sal inder eewicheyt veruoert worden.

6

⁺Den afgront der diepten is haer decsel als een cleet, die wateren sullen op die bergen staen,

+ B

7

Maer van uwe scelden sullen si vlieden, Vander stemmen ws donders sullen si vreesen.

8

Die bergen ^* climmen), ende die beemden dalen totter plaetsen die ghi hen ghefundeert hebt.

* the. schinen hooge

9

Ghi hebt eenen pale gheset, daer si niet voorbi gaen en sullen, ende en sullen niet weder comen, om dat aertrijck te bedecken.

10

Ghi laet fonteynen springen inden leegen dalen die wateren sullen tusscen die bergen henen gaen.

11

Alle dieren des velts sullen drincken, Ende die wilde ezels sullen ^* verwachten in haeren dorste.)

* the. hueren dorst lesscen

12

⁺Op hen sullen woonen die vogelen des hemels, ende laten haer stemmen hooren wt middel der ^* steenroetsen.)

+ C

* the. tacken

13

Ghi maect de bergen vochtich van uwen hoochsten, van de vruchte dijnre wercken salt aertrijc versaedet worden.

14

Ghi laet hoy wassen voor die beesten, ende cruyt voor den arbeyt der menscen, Dat ghi broot wt der aerden brengen soudt.

15

Ende dat den wijn des menscen herte verblide, ende zijn gedaente blincke van olie, ende dat broot des menscen herte stercke,

16

Die boomen ^* der velden) sullen versaedet worden, die cederboomen Libani die hi geplant heeft.

* h. des HEREN Des HEREN boomen heet hi die staen int woudt, ende niet door menscen geplant en zijn.

17

Aldaer sullen de vogelen nestelen ^* thuys des hauicx haer leytsman)

* the. den reygher heeft op den dennenboom zijn wooninge.

18

De hooge bergen zijn toeulucht den ^* herten), die steenroetse ^* den eghelen.) [kolom]

* th. gemsen

* th. den canijnkens

19

Ghi maecte die mane datmen die tijden daer mede kennen soude, de sonne weet haeren onderganc,

20

Ghi steldet duysternisse ende het werde nacht, ^* in haer sullen voorbigaen) alle beesten des wouts.

* thebr. dan roeren hen

21

De ionge leeuwen die daer briesschen na den roof, ende haer spise soecken van gode.

22

Die sonne is opgegaen ende si zijn vergadert, si sullen in haer slaepholen geleet worden.

23

Die mensce sal wtgaen tot sinen arbeyt ende tot sinen wercke ten auont toe.

24

⁺HEERE hoe zijn uwe wercken so menigherley, ghi hebtse alle wijslijck ghemaect, ende die aerde is vol uwer ^* besittinge)

+ D

* theb. haue

25

Deze zee die so grote ende wijdt is, daer zijn cruypende dieren sonder getal, Beyde groote ende cleyne dieren,

26

aldaer sullen doorgaen die scepen. ^* Desen drake dien ghi ghemaect hebt om hem te bespotten.)

* the. Dat is Leuiathan den welcken ghi ghemaect hebt dat hi daer inne spele.

27

Si wachten alle na v, dat ghi hen spijse soudt geuen tot zijnder tijt,

28

Als ghijt hen geeft so vergaderen zijt, als ghi doet uwe hant open so worden si met goede versaedet.

29

Verbercht ghi v aensicht, so verscricken si, Ghi neemt wech haeren adem, so vergaen si, ende sullen weder verkeeren in haeren stof.

30

Laet wt, uwen ^* geeste) so worden si gescapen, Ende verniewet dat aensiene der aerden.

* the. adem.

31

Die eere des HEEREN si eewich, De HERE sal hem verblijden in zijn wercken.

32

Die die aerde aenschouwet ende doetse beuen, die aentast die berghen, so roocken si.

33

Ic sal den HERE singen in mijn leuen, ende minen God lof singen also lange als ic ben.

34

Mijn redene moet hem wel beuallen, maer ic sal mi inden HEERE verblijden.

35

Der sondaeren moet een eynde worden opter aerden, ende der ongodliker tot dat si niet meer, daer en zijn, ^* Ghebenedijt) den HERE mijn ziele, Alleluya.

* theb. louet